¿YACHANKICHU chay sipaschapa ima nisqanta? Chay warmimanmi Jehová Diospa willakuqnin Eliseomanta chaynataq Dios yanapaptin llapa ima admirakunapaq kaqkunata rurasqanmantapas willachkan. Chay warmiqa manam Israel casta warmichu, chaymi Jehová Diostaqa mana reqsinchu. Chaynaqa qawasunchikyá imanasqataq sipaschaqa chay warmipa wasinpi kachkan.

Chay warmiqa Aram nacioniyoq warmim karqa. Paypa qosanñataq Aram nacionpi tropakuna kamachiq Naaman sutiyoq runam karqa. Aram nacionniyoq soldadokunam chay sipaschata Israel nacionmanta presochamurqaku, chaymi Naamanpa warmintaña servirqa.

Naamanqa ñakarichkarqa lepra sutiyoq onqoywanmi. Chay onqoyqa runapa aycha qaran mikuq onqoy hinam. Chaymi sipaschaqa warmiman kaynata nichkan: ‘Amalaya Samaria llaqtapi Jehová Diosmanta willakuqman patronniy rirunman hinaptinqa lepra onqoyninmantachá sanoyarachinman’ nispa. Chaymantañam sipaschapa nisqanta chay warmipa qosanman willarqaku.

Naamanñataqmi onqoyninmanta sanoyaruyta munaspan Israel nacionman rirqa. Chayaruspanmi Eliseopa wasinman rirqa. Hinaptinmi Eliseoqa serviqnillanta kachaspan Naamanta nichirqa Jordan mayupi 7 kutikama challpukaramuspa mayllakamunanpaq. Naamanñataq llumpayta piñakuruspan nirqa: ‘Llaqtaypi mayukunaqa ¿manachum Israelpa mayunkunamantaqa aswan allin?’ nispa. Chaynata nispanmá pasakurqa.

Paypa serviqninkunañataqmi nirqaku: ‘Taytáy, willakuq Eliseo imatapas sasa kaqta kamachisuptikiqa ¿manachum ruraruwaq? Mayllakaramuspaykiqa sanoyarunkim nichkaptillanqa mayllakaramuyá’ nispa. Naamanqa serviqninkunapa nisqanta uyarispam 7 kutikama Jordan mayupi challpukaramurqa. ¡Hinaptinmi cuerponqa sanoyarurqa manaraq onqochkaptin kasqanman hina!

Chaymi Naamanqa kusikurqa. Hinaspam Eliseopa kasqanman kutiruspa nirqa: ‘Kunanmi yacharuni, Israel nacionpi Diosllam kay Pachapi Diosqa. Ama hina kaspaykiyá kay apamusqay regalokunata chaskiykullaway’ nispa. Eliseoñataq nirqa: ‘Manam chaskikimanchu’ nispa. Naamanta Jehová Dios sanoyachisqanmanta yachaspanmi Eliseoqa Naamanpa regalonta chaskiyta mana munarqachu. Eliseopa serviqnin Giezi sutiyoq runam ichaqa chay regalota hapikuruyta munarqa.

Hinaptinmi Naaman pasakuruptinña, Gieziqa kallpaylla hayparuspanmi nirqa: ‘Patronniy Eliseom kachamuwachkan watukuqninkuna chayaramuptin regaloykipa wakillantapas qoykuwanaykipaq paykunaman qoykunanpaq’ nispa. Chaynata nispanmi llullakururqa. Naamanmi ichaqa llullakusqanta mana yacharqachu, chaymi apamusqanmanta Gieziman wakillanta qoykurqa.

Hinaptinmi Giezi kutiramuptin ima rurasqantam Eliseoqa yacharqa Jehová Dios payman willaptin. Chaymi Eliseoqa nirqa: ‘Kay mana allin rurasqaykimantam Naamanpa lepra onqoyninwan qamña onqonki’ nispa. ¡Hinaptinmi chaynam karqa!

¿Imatam kaykunamantaqa yachachwan? Puntataqa, chay sipascha hinam kananchikqa Jehová Diosmanta willakunanchikpaq. Chaynata ruraspaqa runakunata yanapachwanmi. Chaymanta, ñawpaqpi Naaman hatunchakuq kasqanman hinaqa manam kananchikchu, aswanqa Jehová Diospa serviqninkunata kasukunanchikmi. Chaymantapas, manam Giezi hinaqa llullakunanchikchu. Cheqaptamá Bibliapi nisqanmantaqa achkata yachachwan, ¿aw?