SALOMONQA mozollaraq kaspam rey karqa. Jehová Diosta kuyarqa taytan Davidpa decretonkunata kasukuspa. Salomonqa Jehová Diospa agradonpaqmi karqa, chaymi huk tuta mosqoyninpi Salomonta nirqa: ‘Mañakuway imam munasqaykita’ nispa.

Chaymi Salomonñataq nirqa: ‘Jehová Dioslláy, ñoqaqa warmaraqmi kani, manam runaykikuna gobiernayta atiymanchu. Chaynaqa qoykuwayá yachayta runaykikunata gobiernanaypaq’ nispa.

Salomonpa mañakusqan Jehová Diospa agradonpaq kaptinmi nirqa: ‘Manamá mañakuwarqankiqa unay wata kawsakuytachu nitaq qori-qollqetachu. Mañakuwarqankiqa entendimientotam allin arreglo ruranaykipaq. Qoykimá yachaytapas, ñawpaqmantapunipas nitaq qepatapas qam hina yachayniyoqqa manam kanqachu. Qoykitaqmi mana mañawasqaykikunatapas, apuyachispaymi ancha reqsisqata rurasqayki’ nispa.

Chay punchawkunallapim iskay warmikuna reypa kasqanman rirqaku atipanakuspanku. Huknin warmim nirqa: ‘Kay warmiwanmi yachaniku huk wasillapi. Ñoqam wawata wachakurqani, kimsa punchawmantam kay warmipas wachakururqa. Kay warmipa wawanmi tuta wañurusqa. Hinaptinmi puñunaykama waqtaymanta wawayta horqoruspa wañusqa wawanta waqtayman churaramusqa. Hatariruspaymi wawata wañusqata qawaykuspay reqsirurqani mana waway kasqanta’ nispa.

Chaymi huknin warmiñataq nirqa: ‘Manam, kawsaq wawaqa ñoqapam, wañusqañataqmi qampa’ nispa. Chaymi punta rimaq warmiñataq nirqa: ‘Manam, wañusqa wawam qampaqa, kawsaqñataqmi ñoqapa’ nispa. Chaynatam reypa qayllanpi atipanakurqaku. ¿Imatataq Salomonqa rurarqa?

Espadata apachimurqa, aparamuptinkum nirqa: ‘Kawsaq wawata chawpimanta partiruspa qoychik partenta sapakamaman’ nispa.

Wawapa cheqap mamanñataq reyta nirqa: ‘¡Amayá! Kay warmimanyá qoychik wawataqa, amayá wañuchiychu’ nispa. Huknin warmiñataqmi nirqa: ‘Amayá kachunchu qampaqpas nitaq ñoqapaqpas, partiychikyá’ nispa.

Chaymi Salomonqa nirqa: ‘Punta rimaq warmiman qoychik chay kawsaq wawata, ama wañuchiychikchu, paymi cheqap mamanqa’ nispa. Salomonqa chayta musyarqa wawapa cheqap mamanqa kawsachkaq wawanmanta sonqonpi llumpayta llakikuspanpas wawanta mana wañuchinankupaq huknin warmiman qoyta munaptin. Chaymanta runakuna reypa allin arreglasqanta yacharuspanku kusikurqaku Diospa yachay qosqanta qawaykuspanku.

Salomonpa kamachikusqan tiempopiqa allpankupas achkallataña rururqa trigotapas cebadatapas hinaspa uvastawan higostapas chaymanta tukuy ima kawsaykunatapas Diospa bendecisqanman hina. Runakunapas allin pachasqa hinaspa sumaq wasikunapipas kawsakurqaku. Llapa ima allin kaqkunamantaqa llapallanpaqmi karqa.