¿YACHANKICHU pikunataq chay runakunaqa hinaspa imatam rurachkanku? Peleaqmi richkanku, soldadokunapa ñawpaqnin riq runakunañataqmi takichkanku. Tapukuchkankipaschá: ‘¿Imanasqataq peleanankupaqqa espadankuta chaynataq lanzankutapas takiqkunaqa mana apankuchu?’ nispa. Qawasunchikyá.

Josafatmi Juda nacionpi iskay ayllukunapa reyninkuqa karqa. Payqa kamachikurqa norte law Israel nacionpi 10 ayllukunata Jezabel chaynataq reynin Acab gobiernachkaptinmi. Rey Josafatqa taytan Asapa tukuy allinkuna rurasqanman hinam kawsarqa. Hinaspanmi sur law Juda nacionpi iskay ayllukunaqa unay watam kusisqa kawsakurqaku.

Chaymantam mancharikunankupaq hina pasarqa hinaspa Josafatman runakuna chayaramuspa willakurqaku: ‘Amonpa mirayninkunapas, Moabpa mirayninkunapas chaynataq Seir orqopi yachaqkunapas contraykipi peleanankupaq hamuchkanku achka-achka tropakuna’ nispa. Chaymi Juda nacionpi runakunaqa huñunakurqaku Jerusalenpi Jehová Diospa yanapakuyninta mañakunankupaq. Temploman riptinku, Josafatqa mañakurqa: ‘¡Jehová Diosnillayku! Manam ñoqaykuqa defiendekunaykupaq ima ruraytapas atinikuchu chaymi qamllaman hapipakamuniku yanapaykuwanaykikupaq’ nispa.

Hinaptinmi Jehová Diosqa mañakusqankuta uyarispa llaqtanman willachimurqa kaynata: ‘Manam qamkunapachu kay guerraqa aswanqa kikin Diospam. Manam qamkunachu peleankichik, chaynaqa qawankichikmi Jehová Diospa imaynam librasusqaykichikta’ nispa.

Hinaptinmi paqarinnintinta Josafatqa llaqtanpi runankunata nirqa: ‘Jehová Diospiyá hapipakuychik’ nispa. Chaymi soldadonkunapa ñawpaqninpi churarqa takiqkunata, paykuna richkaptinku takispanku Jehová Diosta alabarqaku. ¿Yachankichu imataq pasarqa peleanankupaqña kachkaptin? Jehová Diosmi Israelpa mirayninpa enemigonkunata chaqwarachiptin paykunapura wañuchinakurqaku. ¡Hinaptinmi Juda nacionpi kaqkuna chayaramuptinku rikururqaku achka-achkallaña tropakuna pampapi wañusqata!

Josafatqa Jehová Diospi hapipakuspanmi yachayniyoq karqa, ¿chaynachu icha manachu? Chaynata ruraspanchikqa yachayniyoqchá kasunchik.