SUMAQCHAM kay warmachaqa, ¿aw? Samuelmi sutinqa. Umachanpi llapchaykuqqa Israel nacionpi sacerdotekunapa jefen Eliy sutiyoq runam. Eliyman warmachata taytan Elcana chaynataq maman Ana pusarqaku.

Samuelqa tawa otaq pichqa watachayoqmi karqa. Ichaqa Jehová Diospa karpanpi qepakunqa Eliy chaynataq sacerdotekunawanpas yachananpaq. ¿Imanasqataq Elcanawan Anaqa taksachallaraq kachkaptin Samueltaqa Jehová Diospa karpanman aparurqaku Diosta servinanpaq? Qawasunchikyá.

Pasaq watakunallapim, Anaqa llakisqa kachkarqa. Qolloq warmi kaspanmi wawata mana wachakuqchu, ichaqa wawa wachakuytam munarqa. Chaynapimá Jehová Diosman asuykuna karpanman rispa mañakurqa kaynata: ‘¡Jehová Dioslláy, ama qonqarullawaychu! Qari wawata qoykuwaptikiqa ñoqam qampaq sapaqchapusqayki kawsanankama’ nispa.

Jehová Diosmi Anapa mañakusqantaqa uyarirqa, chaymi tiempopa risqanman hina Anaqa Samuelta wachakurqa. Anaqa wawachanta kuyaspanmi wawachanmantapacha Jehová Diosmanta yachachirqa. Hinaptin qosantapas nirqa: ‘Samuelta anukaruspayña Jehová Diospa wasinman apaspay presentasaq chaypiña wañukunankama servinanpaq’ nispa.

Chaynatamá Ana chaynataq Elcana rurachkanku dibujopi qawasqaykiman hina. Taytanwan mamanpas Samuelta allintapuni Bibliamanta yachachisqankuwanmi, warmachaqa kusisqam kachkan Jehová Diospa karpanpi servinanpaq. Sapa watam tayta-mamanqa Jehová Diospa karpanpi yupaychanankupaq riqku, chaynataq Samuelta watukuqpas. Hinaptinmi Anaqa sapa wata Samuelpaq pachachanta rurapuspan apaq.

Samuelqa watan-watanmi hinalla Jehová Diospa karpanpi servichkan, paytaqa Jehová Dios chaynataq Israelpa mirayninkunapas kuyarqaku. Ichaqa sacerdotekunapa jefen Eliypa churinkuna Ofni hinaspa Finees sutiyoq sacerdotekunaqa mana allin ruraqmi karqaku. Diosta mana kasukuspanku mana allinkunallata rurarqaku chaynallataq hukkunatapas huchallichirqaku. Eliyqa sacerdote kasqankumantamá qarqomunan karqa, ichaqa manam chaynataqa rurarqachu.

Samuelmi ichaqa Diospa karpanpi ima mana allinña pasaptinpas manam chaywanqa Jehová Diosta serviytaqa saqerqachu. Unay tiempotañam Jehová Diosqa pitapas mana rimamunñachu asllaña payta kuyaqninku kaptin. Samuel wiñaruptinmi Diosqa rimarqa.

Jehová Diosqa Samuelta qayarqa asuykuna karpapi puñuchkaptin. Hinaptinmi Samuelñataq nirqa: ‘¿Imata taytay?’ nispa. Chaymi Eliypa kasqanman kallpaspan nirqa: ‘Taytáy ¿imapaqtaq qayamuwarqanki?’ nispa.

Eliyñataqmi nirqa: ‘Manam ñoqaqa qayamurqaykichu. Kutispaykiyá puñukamuy’ nispa. Chaymi Samuelqa kutirispa siriykurqa.

Huktawan Dios qayamuspanmi nin: ‘¡Samuel!’ nispa. Chaymi Samuelqa hatarispan rirqa Eliypa kasqanman hinaspa nirqa: ‘Taytáy ¿imapaqtaq qayamuwarqanki?’ nispa. Eliyñataqmi nirqa: ‘Manam ñoqaqa qayamurqaykichu, churilláy kutispayá puñukamuy’ nispa. Hinaptinmi Samuelqa huktawan kutirispa siriykurqa.

Hinaptinmi Jehová Diosqa kimsa kaq kutipi ‘¡Samuel!’ nispa qayarqa. Chaymi Samuelqa kallparqa Eliypa kasqanman kaynata nispan: ‘Taytáy ¿imapaqtaq qayamuwarqanki?’ nispa. Hinaptinmi Eliyqa musyarurqa Samueltaqa Jehová Dios qayamusqanta. Chaymi Samuelta nirqa: ‘Kutikuspayki puñukamuy. Yapatawan qayamusuptikiqa kaynatam ninki: “Rimapayaykuwayá Jehová Dioslláy, kay serviqnikiqa uyarichkaykim”’ nispa.

Chaynatamá Samuelqa nirqa yapatawan Jehová Dios qayamuptin. Hinaptinmi Jehová Diosqa Samuelta nirqa Eliytawan churinkunata castigananta. Hinaspam Ofniy hinaspa Finees wañurqaku Filistea runakunawan peleaspanku, chaykunata Eliy uyariruspanmi wichiykuspan kunkanta pakiruspa wañukurqa. Chaynatam Jehová Diospa rimasqan cumplikurqa.

Hinaptinmi Samuelqa yuyayniyoq runaña kaspa Israel runakunapaq payllañam juezninkuqa karqa. Samuel machuyaruptinmi, Israel runakunaqa nirqaku: ‘Churapuwaykuyá huk reyta gobiernaqniyku kananpaq’ nispa. Samuelqa manam munarqachu Jehová Dios paykunapa kamachiqninku kaptin. Jehová Diosñataq nirqa runakunapa mañakusqanta uyarinanpaq.