QAWAY chay runakunapa wantumusqanku frutakunata. Kallmantin uvaskunaqa papay-papayllaña kasqa. Iskay runakuna kaspiman wataykuspankuraq hombromuchkanku. Qawaytaq granadakunatawan higoskunatapas. ¿Maymantataq kayna sumaqllaña frutakunataqa apamuchkanku? Canaan allpa lawmantam. Canaan lawpimá Abraham, Isaac hinaspa Jacob yacharqaku. Chay lawpi muchuy kaptinmi Egiptoman Jacobqa aylluntin pasakurqaku. Chaypaqqa 216 watakuna pasaruptin Israel runakunataqa Moises kaqllamanta Canaan lawman kutichichkarqa. Hinaptinmi chunniqpi Cades llaqta lawtaña richkanku.

Canaan lawpiqa mana allin runakunam yachanku. Chaymi Moisesqa 12 wateqaqkunata kachaspanmi paykunata nirqa: ‘Qawamuychikyá chaypi yachaq runakunaqa ¿asllachu icha achkachu?, ¿kallpasapachu icha manachu? Qawamuychikyá chay allpaqa ¿kawsaykunapa qespinanchu icha manachu? Apamuychikyá chay allpapa rurunta’ nispa.

Wateqaqkuna Cades llaqta lawman kutimuspanku, Moisesta nirqaku: ‘Cheqaptamá chay allpaqa sumaqllaña kasqa’ nispa. Creenankupaqmi apamusqanku frutakunata qawachirqaku. Chunka wateqaqkunam ichaqa nirqaku: ‘Chay allpapi yachaqkunaqa kallpasapa runakunam kasqaku. Chay runakunapa contranpi peleaytaqa manam atichwanchu’ nispa.

Chaykunata Israel runakuna uyarispankum manchakuspanku nirqaku: ‘Amalaya Egipto nacionpi wañukamuchwan karqa otaq kay chunniqpipas wañukuchwan. ¿Guerrawan wañunanchikpaqchu hinaspa warminchikkunatapas chaynataq churinchikkunatapas qechuwananchikpaqchu pusamuwarqanchik? ¡Jefenchikpaq huk kaqninta Moisespa rantinpi churaruspanchik Egiptoman kutikusunchik!’ nispa.

Iskay wateqaqkunam ichaqa Jehová Diospi confiakuspanku Israel runakunapa piñakuyninta amachachiyta munarqaku. Paykunaqa Josueywan Calebmi karqaku. Paykunam nirqaku: ‘Amayá manchakuychikchu. Ñoqanchikwanmi Jehová Diospuni kachkan. Paykunataqa facillata vencerusunchik’ nispa. Runakunam ichaqa mana creespanku Josueytawan Calebta wañurachiyta munarqaku.

Kayta qawaspanmi Jehová Diosqa sinchillataña piñakuruspa Moisesta nirqa: ‘Iskay chunka watayoqmanta hanaymanmi contraypi rimaqkunaqa manam mayqannikichikpas yaykunkichikchu Canaan allpamanqa. Egipto nacionpi chaynataq chunniqpi atiyniywan señal rurasqaykunata qawachkaspanku mana creewankuchu. Chaymi kay chunniqpi tawa chunka wata purinqaku llapallanku wañunankukama. Calebwan Josueyllam Canaan allpamanqa yaykunqaku’ nispa.