Salmos 46:1-11
Takiqkunata yachachiqpaq. Coreypa mirayninkunapa+ llañumanta* takisqanku.
46 Diosmi pakaykuwaqninchikqa hinaspa kallpanchawaqninchikqa.+
Payqa sasachakuypipas chaylla yanapaykuwaqninchikmi.+
2 Chayraykum kay allpa pachapi imaña kaptinpas mana manchakusunchu.
Manam manchakusunchu lamar quchaman urqukunaña chinkaykuptinpas.+
3 Manam manchakusunchu lamar quchaña qapariywan timpurimuptinpas.+
Manam manchakusunchu lamar quchaña lluqsimuspan urqukunata katkatatachiptinpas. (Samarinapaq).
4 Pallqaq mayukunam Diospa llaqtanta kusichin.+
Hanaq pachapi Diosninchikpa chuya carpantam kusichin.
5 Diosmi chay llaqtapiqa kachkan,+ manam chay llaqtaqa chinkanmanchu.
Achikyamuchkaptinmi Dios hamunqa yanapananpaq.+
6 Llaqtakunam chaqwakurqaku, kamachiqkunam chinkachisqa karqaku.
Pay qapariptinmi allpapas chullururqaraq.+
7 Angelkunata kamachiq Jehova Diosmi ñuqanchikwan kachkan.+
Jacobpa Diosninmi pakaykuwaqninchikqa. (Samarinapaq).
8 Hamuspaykichikyá qawaychik Jehova Diospa ruwasqankunata.
Qawaychikyá allpa pachapi sumaq ruwasqankunata.
9 Payqa kay allpapi wañuchinakuytapas chinkachinmi.+
Flechatapas chaynataq lanzatapas pakipanmi.
Peleananku carretakunatapas* kañanmi.
10 Paymi nin: “Makiyman churakuspaykichikyá yachaychik Dios kasqayta.
Llapallan llaqtapa hatunchasqanmi kasaq.+
Kay pachapim hatunchasqa kasaq”, nispa.+
11 Angelkunata kamachiq Jehova Diosmi ñuqanchikwan kachkan.+
Jacobpa Diosninmi pakaykuwaqninchikqa.+ (Samarinapaq).
Willakuykuna
^ Hebreo rimaypiqa nichkan: “Alamotpi”, nispam. Qaway kay palabrapa ima ninan kasqanta.
^ Ichapas kanman: “Harkachikunankutapas”, niqpas.
