Salmos 144:1-15
Davidpa takisqan.
144 Jehova Diosqa hatunchasqayá kachun, payqa pakaykuwaqniy hatun rumi hinam.+
Wañuchinakuy punchawpaq makiyta hichu-hichuta ruwaqqa hatunchasqayá kachun.
Wañuchinakuypaq makiyta hichuyachiqqa hatunchasqayá kachun.+
2 Payqa kuyakuqmi*, payqa hatun pirqa hinam,payqa pakakunaymi, payqa imamantapas libraykuwaqniymi.
Payqa harkachikunay hinam, payqa waqaychaqniymi.+
Payqa llaqtakunata makiyman churaqmi.+
3 Jehova Dioslláy, ¿imataq runaqa yuyanaykipaqqa?
¿Imataq wañuqlla runapa churinqa payta nanachikunaykipaqqa?+
4 Runapa vidanqa samay hinallam.+
Vidanqa llantuy hina chinkaruqllam.+
5 Jehova Dioslláy, hanaq pachata waqtanpaykachimuspaykiyá uraykamuy.+
Urqukunatayá llachpaykuy qusnirinankupaq.+
6 Llipyachimuspayá chiqnikuq runakunata kayman-chayman chiqirachiy.+
Flechaykikunata kacharispayá paykuna ukupi manchakuyta hatarichiy.+
7 Hanaq pachamantayá makikita haywarimuy.
Uku-uku yakukunamantayá hurquykullaway, uku-uku yakukunamantayá harkaykullaway.
Huklaw llaqtayuq runakunapa makinmantayá libraykullaway.+
8 Huklaw runakunaqa llullallatam rimanku.
Alliq* makinkuta huqarispam llulla rimaytapas “chiqapmi chayqa” ninku.
9 Taytalláy, musuq takitam takipusqayki.+
Cuerdayuq kaqkuna waqaykamuptinmi takita takipusqayki.
10 Kamachiqkuna vencenanpaq yanapaykuqpaqmi takipusaq.+
Yupaychaqnin Davidta espadawan mana wañuchinankupaq harkaykuqpaqmi takipusaq.+
11 Huklaw runakunapa makinmantayá libraykullaway. Huklaw runakunapa makinmantayá waqaychaykullaway.
Huklaw runakunaqa llullallatam rimanku.
Alliq makinkuta huqarispam llulla rimaytapas “chiqapmi chayqa” ninku.
12 Chayna kaptinqa qari churiykupas chaylla wiñaq plantakuna hinam kanqaku.
Warmi churiykupas kamachiqpa wasinpi llaqllasqa pilarkuna hinam suma-sumaq kanqaku.
13 Taqiykupas tukuy rikchaq kawsaywanmi huntay-huntay kanqa.
Ovejaykupas waranqanpim miranqa, arí, pachak waranqanpim miranqa.
14 Chichu vacaykupas hawkam kanqa, manam sullunqachu.
Llaqtaykupa punkunpiqa manam llakikuymanta qapariyqa uyarikunqachu.
15 ¡Mayna kusisqam chayna llaqtapi kawsakuq runakunaqa!
¡Mayna kusisqam Jehova Diosta Diosninkupaq hapiq runakunaqa!+
