Oseas 6:1-11
6 Oseasmi runakunata nirqa*: “Llaqtamasillaykuna, Jehova Diosmanyá kutirikusun.
Payqa llikipachkaq+ hina ñakarichiwaspanchikpas hampiykuwasunmi,payqa imataña ruwawaspanchikpas kuyakuyllawanñam hampiykuwasun.
2 Diosqa iskay punchawmantam kawsarichiwasun.
Kimsa kaq punchawpim hatarichiwasun,hinaptinmi paypaqña kawsakusun.
3 Jehova Diostam riqsisun, sumaqta riqsinapaqñam kallpanchakusun.
Achikyay hinam payqa chayamunqapuni,loco para hinam ñuqanchikman hamunqa,puquy para hinam ñuqanchikman chayamunqa”, nispa.
4 Diospas nirqam: “¿Imatataq qamkunawan ruwasaq Efrain kasta runakuna?
¿Imatataq qamkunawan ruwasaq Juda runakuna?
Achikyaptin chaylla chinkaruq puyu hinallam qamkunapa kuyakuynikichikqa*,waspiruq sulla hinallam qamkunapa kuyakuynikichikqa.
5 Chaymi qaqchasqaykichik ñuqamanta willakuqkunapa* rimasqanwan,+rimasqaykunawanmi+ ñuqaqa wañuchisqaykichik.
Qamkunapaq piñakuyniyqa achki hinam kancharinqa.+
6 Ñuqaqa kusikuni imaña kaptinpas hinalla kuyakuq kasqaykichikwanmi*, manam imakunapas quwasqaykichikwanchu.
Ñuqaqa kusikuni allinta riqsiwasqaykichikwanmi, manam kañapuwanaykichikpaq ima ofrendapas* quwasqaykichikwanchu.+
7 Qamkunam ichaqa runalla kasqaykichikrayku contrato* ruwasqanchikta mana kasukurqankichikchu.+
Chaywanmi ñuqata qipancharuwankichik.
8 Galaad llaqtaqa mana allin ruwaq runakunapa llaqtanmi,+chay llaqtaqa yawar chaqchuqkunapa llaqtanmi.+
9 Sacerdotekunapas kanku runamasinta suwananpaq pakakuspa suyaq runakuna hinam.
Paykunaqa Sichem*+ llaqtapa hichpan ñankunapim runamasinta wañuchinku,paykunapa chay mana allin ruwasqankuqa pinqaypaqmi.
10 Israel runakunapim millakuypaq kaqkuna ruwasqankuta qawachkani.
Chaypim Efrain kasta runakuna huchapakunku,+chaymi Israel runakunaqa millakuypaqña kachkanku.+
11 Juda runakuna, qamkunapaqmi cosecha punchaw chayamunqa,runaykunata chiqichisqa kasqankumanta huñuptiymi chayna kanqa”, nispa.+
Willakuykuna
^ Ichapas kanman: “Israel runakunam nirqaku”, niqpas.
^ Kaypiqa rimachkan imaña kaptinpas hinalla kuyakuq kasqankumantam.
^ Utaq: “Profetakunapa”.
^ Qaway kay palabrapa ima ninan kasqanta.
^ Utaq: “Llakipayakuq kasqaykichikwanmi”.
^ Utaq: “Pacto”. Qaway kay palabrapa ima ninan kasqanta.
^ Utaq: “Siquem”.
