Jeremias 26:1-24
26 Josiaspa churin Jeoyakim+ Juda llaqtata kamachiyta qallaykuptinmi Jehova Diosqa niwarqa:
2 “Ñuqa Jehova Diosmi niki: ‘Ñuqa Jehova Diospa wasiypa pationpi sayaykuspayki Juda nacionpi llapallan llaqtakunamanta hamuq runakunaman willay, ñuqa Jehova Diosta yupaychawanankupaq wasiyman hamuq runakunaman willay, nisqaykunatam lliwta willanki, amam imatapas upallakunkichu.
3 Ichapas uyarikuspanku mana allin kawsasqankuta saqinmanku, chaynapi imam tantiasqayta manaña ruwanaypaq hinaspa mana allinta ruwasqankurayku paykunaman ñakariyta mana kacharinaypaq.+
4 Paykunatayá nimuy: “Jehova Diosmi nin: ‘Mana uyariwaptikichikqa, qusqay kamachikuyniykunata mana kasukuptikichikqa,
5 ñuqamanta willakuqkunapa* nisusqaykichikta mana uyariptikichikqa hinaspa kuti-kutirispa kachamusqay willakuqniykunata mana uyariptikichikqa+
6 Silo llaqtata hinam kay wasita ruwasaq,+ kay allpa pachapi llapallan nacionkuna qawananpaqmi kay llaqtaqa ñakasqa kanqa’”’”, nispa.+
7 Jehova Diospa wasinpi Jeremiaspa nisqantam uyarirqaku sacerdotekuna, Diosmanta willakuqkuna chaynataq llaqtapi llapallan runakuna.+
8 Llaqtapi llapallan runakunaman Jehova Diospa nisqankunata Jeremias niyta tukuruptinmi sacerdotekuna, willakuqkuna chaynataq llaqtapi llapallan runakuna hapiruspa nirqaku: “Wañunkipunim,
9 ¿imapaqtaq willakurqanki Jehova Diospa sutinpi, ‘kay wasiqa Silo llaqta hinam kanqa’ nispayki, ‘kay llaqtaqa qalaypaqmi qipanqa, mana runayuqmi kanqa’ nispayki?”, nispa. Llaqtapi llapallan runakunam Jehova Diospa wasinpi Jeremiasta chawpicharurqaku.
10 Juda nacionta kamachiqpa yanapaqninkunam chayta uyariruspanku kamachiqninkupa wasinmanta Jehova Diospa wasinman rirqaku. Hinaspankum tiyaykurqaku Jehova Diospa wasinpa musuq punkunpi.+
11 Sacerdotekunawan willakuqkunam kamachiqpa yanapaqninkunatawan llaqtapi runakunata nirqaku: “Kay runaqa wañunanmi,+ uyarisqaykichikman hinapas kay runaqa kay llaqtata ima pasananmantam rimachkan”, nispa.+
12 Jeremiasñataqmi kamachiqpa yanapaqninkunatawan llaqtapi runakunata nirqa: “Jehova Diosmi ñuqataqa kachamuwarqa kay wasitawan kay llaqtata ima pasananmanta willakunaypaqqa, chay nisqaytam qamkunaqa uyarirqankichik.+
13 Mana allin kawsasqaykichiktawan mana allin ruwasqaykichiktayá saqiychik, Jehova Diospa nisqankunatayá kasukuychik, hinaptinqa Jehova Diosqa imam tantiasqantaqa manañam ruwanqachu, ñakariytaqa manañam kacharimusunkichikchu.+
14 Ñuqaqa makikichikpim kachkani. Imam tantiasqaykichiktayá ñuqawan ruwaychik.
15 Ichaqa kaytam yachanaykichik, wañurachiwaspaykichikqa mana huchayuq runata wañuchisqaykichikmantam huchayuq kankichik, qamkunawan llaqta runakunapas chaynataq llaqtaykichikpas huchayuqmi kanqa. Ñuqataqa Jehova Diosmi kachamuwarqa kaykunata qamkunaman ninaypaq”, nispa.
16 Kamachiqpa yanapaqninkunawan llaqtapi runakunañataqmi sacerdotekunatawan Diosmanta willakuqkunata nirqaku: “Kay runaqa manam wañunanchu, payqa Jehova Diosninchikpa sutinpim rimapayawarqanchik”, nispa.
17 Punta apaqkunapas wakinmi sayariykuspanku huñunasqa llapallan runakunata nirqaku:
18 “Moreset llaqtayuq Miqueaspas+ Ezequias+ Juda llaqtata kamachisqan tiempopim Juda llaqtapi llapallan runakunata nirqa: ‘Angelkunata kamachiq Jehova Diosmi nin:
“Sion muquqa tarpuna allpa hinam yapusqa kanqa,Jerusalenpas raqayllanñam kanqa,+Diospa wasinpa* kasqan urqum muqukuna hina monteyanqa”’, nispa.+
19 ¿Chaynata niptinchu Juda runakunawan kuska Ezequiasqa Miqueasta wañurachirqa? Icha ¿Jehova Diosta manchakuspanchu Jehova Diosta qayakurqa? Ezequias mañakusqanraykum Jehova Diospas imam tantiasqantaqa manaña ruwarqañachu. Chayraykum ñakariytaqa manaña kacharimurqachu,+ ñuqanchikpas wañurachispanchikqa hatun sasachakuypim tarikusunchik.
20 Kiryat-jearim+ llaqtayuq Semayapa churin Uriyapas Jehova Diospa sutinpim willakurqa, paypas Jeremias hinam willakurqa kay nacionta ima pasananmanta, kay llaqtata ima pasananmanta.
21 Kamachiq Jeoyakinwan+ hinaspa yanapaqninkunawan soldadonkunam chay nisqanta uyarirqa, chay nisqankunata uyarispanmi kamachiqqa wañurachiyta munarqa.+ Chayta yacharuspanmi Uriyaqa manchakuymanta Egiptoman ayqikurqa.
22 Kamachiq Jeoyakimñataqmi Acborpa churin Elnatantawan+ wakin runakunata Egiptoman kacharqa.
23 Paykunam Uriyataqa Egiptopi hapiruspanku kamachiq Jeoyakinman aparqaku, hinaptinmi kamachiq Jeoyakimqa espadawan wañurachirqa,+ hinaspam wakchakunapa pampakunan panteonman wischuykurqa”, nispa.
24 Jeremiastam ichaqa Safanpa+ churin Aicam+ yanaparqa, chaymi Jeremiastaqa llaqtapi runakunaqa mana wañuchirqachu.+
