Isaias 39:1-8
-
Babiloniamanta willakuqkuna (1-8)
39 Chay punchawkunapim Baladanpa churin Merodac-baladan Babilonia nacionta kamachichkarqa. Unqusqanmanta Ezequias+ allinyarusqanta yacharuspanmi cartakunatawan regalota apachirqa.+
2 Ezequiasqa chay runakunata kusikuywan chaskiykuspanmi qawachirqa wasinpi kaq+ qullqita, qurita, miski asnaq aceiteta chaynataq achka qullqipa chanin huk aceitekunatapas. Qawachirqataqmi peleanapaq kaqkunatapas chaynataq quri-qullqita waqaychana wasipi kaq tukuy imakunatapas. Ezequiasqa wasinpi hinaspa kamachisqan nacionpi kaq tukuy imatam qawachirqa.
3 Chaymantam Diosmanta willakuq* Isaiasqa Ezequiasman asuykuspan nirqa: “¿Imatataq nisurqanki chay runakuna? ¿Maymantataq hamusqaku?”, nispa. Chaynata tapuptinmi Ezequiasñataq nirqa: “Babilonia nacionmantaraqmi hamusqaku”, nispa.+
4 Isaiasqa nirqataqmi: “¿Imatataq wasikipiqa qawachirqanki?”, nispa. Ezequiasñataqmi nirqa: “Lliw quri-qullqiytam. Wasiypi kaq tukuy imaytam qawarqaku”, nispa.
5 Hinaptinmi Isaiasqa Ezequiasta nirqa: “¡Uyariy! Angelkunata kamachiq Jehova Diosmi nin:
6 ‘Hamuchkanmi punchaw wasikipi tukuy imaykikunata hinaspa ñawpaq abueloykikunapa kunankama huñusqankuta Babilonia nacionman apanankupaq. Manam imapas puchunqachu,+ ñuqa Jehova Diosmi chaynata nini.+
7 Ezequias, churikikunam kanqa. Paykunamanta wakintam Babilonia nacionman apanqaku, hinaptinmi kamachiqpa wasinpi yanapakunqaku’”, nispa.+
8 Chaynata niptinmi Ezequiasqa Isaiasta nirqa: “Jehova Diospa nisqankunata willawasqaykiqa allinmi”, nispa. Ezequiasqa nirqataqmi: “Arí, kawsakunay punchawkamaqa allin hinaspa hawka kawsakuymi kanqa.+
Willakuykuna
^ Utaq: “Profeta”.
