Genesis 48:1-22
48 Chaymantam punchawkuna pasayta Joseyman willaykurqaku: “Taytaykim paqwayña kachkan”, nispa. Chaymi Joseyqa churin Manaseswan hinaspa Efrainwan taytan qawaq rirqa.+
2 Chaymantam Jacobman willarqaku: “Churiki Joseymi qawaqniki hamurun”, nispa. Chaymi Israelqa ñakayta camanmanta tiyarirurqa.
3 Hinaspanmi Jacobqa churin Joseyman willarqa:
“Tukuy atiyniyuq Diosmi Canaan lawpi kaq Luz llaqtapi rikuriykuwarqa, hinaspam bendeciwaspan niwarqa:+
4 ‘Miraynikikuna achkallay-achka kananpaqmi yanapasqayki. Qampa miraynikimantam achka nacionkunata hatarichisaq.+ Kay allpatam miraynikikunaman wiñaypaq qusaq’, nispa.+
5 Manaraq kay Egipto nacionman hamuchkaptiymi churiki Efrainwan Manasesqa karqaña. Paykunam ñuqapa churiykuna hinaña kanqa, churiy Rubenwan Simeon hina.+
6 Paykunamanta qipata naceq churikikunam ichaqa qampaqña kanqa. Paykunam churiki Efrainpa hinaspa Manasespa sutinpi herenciata chaskinqaku.+
7 Padan lawmanta kutimuchkaptiymi Canaan lawpi Efrat+ llaqtaman rina ñanpi mamayki Raquel wañukullarqa.+ Chay llaqtaman chayanaykupaq karuraq kasqanraykum ñanpa waqtanpi pamparurqani. Efrat llaqtapa huknin sutinqa Belenmi”, nispa.+
8 Chaymantam taytan Israelqa Joseypa churinkunata qawaykuspan Joseyta tapurqa: “¿Pikunataq paykunaqa?”, nispa.
9 Hinaptinmi Joseyqa nirqa: “Paykunaqa kay nacionpi Diospa quwasqan churiykunam”, nispa.+ Taytanñataqmi nirqa: “Ama hina kaspa asuykachimullaway”, nispa.+
10 Yuyaqyarusqanraykum taytan Israelqa anta-antallataña qawakullarqa. Chaymi Joseyqa iskaynin churinkunata taytanman asuykachirqa, hinaptinmi taytanqa abrazaykuspa muchaykarirqa.
11 Chaymantam Israelqa churin Joseyta nirqa: “Qanwan tupaykuytaqa manam haykapipas piensarqaniñachu,+ ichaqa kayqaya churikikunatapas Diosqa rikuykachiwanraq”, nispa.
12 Hinaptinmi Joseyqa iskaynin churinkunata nirqa taytanpa waqtanmanta asurinankupaq, hinaspam qunqurakuykuspan pampakama kumuykurqa.
13 Chaymantam Joseyqa kaqmanta iskaynin churinkunata taytan Israelman asuykachirqa. Churin Efraintam+ taytanpa ichuq* lawninman asuykachirqa, churin Manasestañataqmi+ taytanpa alliq* lawninman.
14 Taytan Israelmi ichaqa alliq makinta sullka kaq Efrainpa umanman churaykurqa sullka kachkaptinpas, ichuq makintañataqmi Manasespa umanman churaykurqa. Chaytaqa yachastinmi ruwarqa, payqa yacharqam Manases piwi* kasqantaqa.+
15 Hinaspanmi Joseyta taytan nirqa:+
“Abueloy Abrahanpa hinaspa taytay Isaacpa yupaychasqan Diosyá,+nacesqay punchawmanta kunankama waqaychawaqniy Diosyá,+
16 tukuy sasachakuyniypi yanapawaqniy angelyá+ kay churikikunatapas bendecichun.+
Kay churikikunayá abueloy Abrahanpa, taytay Isaacpa hinaspa ñuqapa sutiywan riqsisqa kachunku.
Chaymantapas kay pachapiyá achkallay-achkaman mirachunku”, nispa.+
17 Efrainpa umanpi taytanpa alliq makin hinalla kasqanta Josey qawaspanmi hukmanyarurqa, chaymi taytanpa alliq makinta hapiykuspa Efrainpa umanmanta Manasespa umanman suchuchiyta munarqa.
18 Hinaspam nirqa: “Amayá chaynataqa taytáy, paymi piwi churiyqa,+ paypa umanmanyá alliq makikitaqa churaykuy”, nispa.
19 Hinaptinmi taytanqa mana munaspan nirqa: “Yachanim churilláy. Manasespa mirayninpas ancha riqsisqa hatun llaqtam kanqa. Chaywanpas sullka kaqmi aswan riqsisqaqa kanqa,+ mirayninpas achkallay-achkam kanqa achka nacionkuna hina”, nispa.+
20 Chaymantapas Joseypa churinkunataqa nirqam:+
“Israelpa mirayninkunayá mañakusqankupi nichunku:‘Efraintawan Manasesta hinayá Dios bendecisunki’”, nispa.
Israelqa Efrainpa sutintamá puntata rimarqa Manasespa sutinmantaqa.
21 Chaymantam taytan Israelqa Joseyta nirqa: “Ñam wañukusaqña,+ ichaqa Diosmi hinalla qamkunawan kanqa. Paytaqmi kutichisunkichik ñawpaq abueloykichikpa allpanmanpas.+
22 Qanmanmi wakin wawqikikunamantapas astawan allpata quyki, chay allpaqa Amorreo runakunamanta qichukusqay* allpam”, nispa.
Willakuykuna
^ Utaq: “Paña”.
^ Utaq: “Lluqi”.
^ Utaq: “Punta naceq”.
^ Hebreo rimaypiqa nichkan: “Espadaywan hinaspa flechaywan qichukusqay”, nispam.
