Genesis 37:1-36
37 Jacobqa taytanpa yachasqan* Canaan allpapim yacharqa, Canaanpim taytanqa forastero karqa.+
2 Kaymi Jacobpa mirayninmanta willakuy.
Joseymi+ 17 watanpi kachkaspan wawqinkunawan ovejakunata* michiq.+ Wawqinkunaqa karqa taytanpa warmin Bilapawan Zilpapa wawankunam.+ Huk kutipim Joseyqa taytanman willarqa wawqinkunapa mana allin ruwasqankuta.
3 Israelwan sutichasqa taytanqa wakin churinkunamantam Joseyta astawan kuyarqa,+ yuyaqyayninpiña churin kasqanrayku. Chaymi ruwachipurqa sumaq pachata.
4 Wakin churinkunamantapas astawan Joseyta taytan kuyasqanraykum wawqinkunaqa chiqnispanku piñasqallaña Joseyta rimapayaqku.
5 Huk kutipim Joseyqa sueñokusqanta wawqinkunaman willarqa,+ chaymi wawqinkunaqa astawanraq chiqnirqaku.
6 Joseyñataqmi nirqa: “Wawqillaykuna uyariykullawaychik sueñokusqayta.
7 Sueñoyniypim chakranchikpi gamillakunata watachkasqanchik, hinaptinmi gamillay sayariruptin qamkunapa gamillaykichik muyuriqninpi kumuykurqaku”, nispa.+
8 Wawqinkunañataqmi nirqaku: “¿Ñuqaykupa kamachiqniykuchu qamqa kanki?”, nispa.+ Chayna sueñokusqanta Josey willakuptinmi wawqinkunaqa aswanraq chiqnirqaku.
9 Joseymi huktawan sueñokusqanta wawqinkunaman willarqa: “Kunan sueñokusqaypim intiwan killa hinaspa 11 lucerokuna ñuqaman kumuykamurqaku”, nispa.+
10 Chaytaqa taytanmanwan wawqinkunamanmi willarqa. Chaymi taytanqa piñakuspan nirqa: “¿Ima ninantaq chay sueñokusqaykiqa? ¿Mamaykipiwan wawqikikunachu qayllaykipi qunqurakuspa pampakama kumuykusaqku?”, nispa.
11 Chaymi wawqinkunaqa Joseyta astawanraq chiqnirqaku,+ taytanmi ichaqa Joseypa willasqanpi yuyaymanarqa.
12 Huk punchawmi Joseypa wawqinkunaqa taytanpa ovejankunata Sichempa* hichpanman michiq rirqaku.+
13 Chaymi Israelqa Joseyta nirqa: “Wawqikikunam Sichempa hichpanman ovejanchikkunata michiq rirqaku, qawaramuyá”, nispa. Joseyñataqmi nirqa: “Arí, rirusaqyá”, nispa.
14 Chaymi taytan nirqa: “Qawaramuyá wawqikikuna hinaspa animalninchikkuna imayna kasqanta. Hinaspam kutimunki willawanaykipaq”, nispa. Chaymi Joseyqa rirqa Hebron qichwamanta+ Sichem lawkama.
15 Chaymantam Joseyqa chunniqpi kayman-chayman purichkaspan huk runawan tuparurqa, hinaptinmi chay runa tapurqa: “¿Imatataq maskachkanki?”, nispa.
16 Joseyñataqmi nirqa: “Wawqiykunatam maskachkani. ¿Icha maylawpi michisqankutapas rikukullawaq karqa?”, nispa.
17 Hinaptinmi chay runañataq nirqa: “Kaypi michichkaspankum ninakurqaku ‘haku Dotan lawman’”, nispa. Chaymi Joseyqa Dotan lawman rispan wawqinkunata chaypi tarirurqa.
18 Ichaqa paykunaman manaraq chayachkaptinmi wawqinkunaqa karullataraq hamuchkaqta Joseyta rikururqaku. Chaymi tantianakurqaku imayna wañurachinankupaq.
19 Paykunaqa ninakurqakum: “Qawaychik, sueñokuqllaña wawqinchik wakta hamuchkan.+
20 Wañurachispayá huknin uchkuman wischuykusunchik. Hinaspayá nisunchik purun animal mikurusqanta. Yachasunyá, yaqachus sueñokusqan cumplikurunqa”, nispanku.
21 Chayta Ruben+ uyariruspanmi harkakurqa, hinaspam nirqa: “Ama wañuchisunchu”, nispa.+
22 Nirqataqmi: “Kay chunniqpi uchkumanyá wischuykuychik ama wañuchispalla”, nispa.+ Rubenqa taytankuman Josey kutinanta munaspanmi harkakurqa.
23 Chaymi chayaramuptillan Joseypa sumaq pachanta chustururqaku.+
24 Hinaspam Joseytaqa mana yakuyuq uchkuman wischuykurqaku.
25 Chaymantam mikuchkaspa rikururqaku negociantekuna hamuchkaqta. Paykunaqa Galaadmanta Egipto llaqtaman riq Ismael runakunam karqaku.+ Camellonkupim aparqaku chaninniyuq miski asnaq waytapa wiqinta*, miski asnaq aceiteta* hinaspa wiqisapa sachapa qaranta.+
26 Hinaptinmi wawqinkunata Juda nirqa: “¿Imatataq chaskisunchik wawqinchikta wañurachispa mana pimanpas willakuspanchikqa?+
27 Ama wañuchisunchikchu, aswanqa Ismael runakunamanyá rantikurusunchik*,+ chaynapi ñuqanchik mana huchayuq kananchikpaq. Payqariki wawqinchikmi, huk taytallamantataqmi kanchikpas”, nispa. Chayna nisqanqa allinpaqmi rikchakurqa wawqinkunapaqqa.
28 Chaymi Ismael kasta* negociantekuna+ chayninta pasachkaptinku, Joseyta uchkumanta hurquramuspa 20 qullqillapaq* rantikururqaku.+ Chaymi Ismael kasta runakunaqa Egipto nacionman Joseyta pusakurqaku.
29 Unaymanta uchkupa kasqanman Ruben kutiruptinñataqmi Joseyqa manaña chaypiñachu kasqa, chaymi Rubenqa pachantapas llikikurqa.
30 Hinaspam wawqinkunapa kasqanman rispan qaparispa nirqa: “¡Sullkanchikqa manañam kanchu! Kunanqa, ¿imatataq ruwasaq?”, nispa.
31 Chaymi chivopa kunkanta kuchuruspanku chay yawarman Joseypa sumaq pachanta chapuparurqaku.
32 Hinaspam chay pachanta taytankuman apachispanku nirqaku: “Kaytam tariramuniku, riqsiykuy churikipachu kay pacha icha manachu”, nispa.+
33 Chay pachata qawaykuspanmi taytanqa qaparispan nirqa: “¡Kay pachaqa churiypamiki! ¡Purun animalchiki llikiparuspan churiy Joseytaqa mikurun!”, nispa.
34 Chaymi Jacobqa pachanta llikispan qachqa pachata wiqawninman watakurqa, hinaspam churinmanta achka punchaw waqallarqa.
35 Hinaptinmi llapallan churinkuna warmipas qaripas asuykurqaku sunqunta tiyaykachiq, chaywanpas taytankuqa hinalla llakisqa kaspanmi nirqa: “Wañukunay punchawkamam* churiymantaqa llakisqa kasaq”, nispa.+ Chaynata nispanmi taytanku Jacobqa Joseymanta hinalla waqallarqa.
36 Chaymantam Ismael runakunaqa Egiptoman chayaruspanku Joseyta rantikururqaku Potifarman. Potifarqa karqa Egipto nacionpi kamachiqpa* ancha riqsisqa runanmi+ hinaspa soldadonkunata kamachiqmi.+
Willakuykuna
^ Utaq: “Tiyasqan”.
^ Utaq: “Cabrakunata”.
^ Utaq: “Siquempa”.
^ Utaq: “Ladanota”.
^ Utaq: “Balsamota”.
^ Utaq: “Venderusunchik”.
^ Utaq: “Rumichakuna hina qullqillapaq”.
^ Utaq: “Madian kasta”.
^ Hebreo rimaypiqa nichkan: “Seolman uraykunaykamam”, nispam. Qaway “seol” niq palabrapa ima ninan kasqanta.
^ Utaq: “Faraonpa”.
