Exodo 20:1-26
20 Chaymantam Diosqa kamachikuykunamanta rimaspan nirqa:+
2 “Ñuqaqa Jehova Diosnikim kani, ñuqam Egipto nacionpi runakuna servisqaykimanta pusamurqayki.+
3 Ñuqallatam yupaychawanayki, amam taytacha-mamachakunataqa yupaychankichu.+
4 Amam taytacha-mamachataqa ruwakunkichu hanaq pachapi kaqman rikchakuqtaqa, kay pachapi kaqman rikchakuqtaqa nitaq yaku ukupi kaqman rikchakuqtapas.+
5 Amam chaykunapa ñawpaqninpiqa qunqurakunkichu nitaq yupaychankichu.+ Ñuqa Jehova Diosqa ñuqallata yupaychawanaykichiktam munani.+ Chiqniwaqniy taytakunapa huchanmantam ñakarinqa churinku, willkanku chaynataq willkankupa churinkupas.
6 Kamachikuyniykunata kasukuspa kuyawaqniykunatam ichaqa ñuqapas mirayninkunatawan imaña kaptinpas hinalla kuyasaq.+
7 Amam yanqapas-yanqaqa Jehova Diosnikipa sutintaqa rimankichu nitaq pinqaymanpas churankichu,+ manachayqa ñuqa Jehova Diosmi wañuchisqayki.+
8 Amataqmi qunqankichu samana punchawqa* ñuqapaq sapaqchasqa punchaw kasqantapas.+
9 Suqta punchawmi imapas ruwanaykitaqa ruwanki,+
10 qanchis kaq samana punchawqa ñuqa Jehova Diospaq sapaqchasqa punchawmi. Chay punchawqa manam llamkanaykichu, manataqmi llamkananchu churikikunapas, nitaq servisuqniki runakunapas, nitaq animalnikikunapas, nitaq llaqtaykipi yachaq* huklaw llaqtayuq runakunapas.+
11 Ñuqa Jehova Diosmi hanaq pachatapas, kay pachatapas hinaspa lamar quchatapas unancharqani, unancharqanitaqmi chaykunapi kaq tukuy ima kaqtapas. Chaykunataqa suqta punchawmi unancharqani. Qanchis kaq punchawpiñataqmi ñuqa Jehova Diosqa samarqani,+ chaymi samana punchawtaqa bendecispay sapaqcharqani.
12 Tayta-mamaykitayá kuyay hinaspa kasukuy,+ hinaspaqa ñuqa Jehova Diospa qunay allpapim unay wata kawsakunki.+
13 Amam pitapas wañuchinkichu.+
14 Amam hukwanqa pierdekunkichu*.+
15 Amam suwakunkichu.+
16 Amam runamasikimantaqa imatapas llullakuspaqa willakunkichu willakunaykipaq qayachisqa kaspaqa.+
17 Amam runamasikipa wasintaqa munapayankichu. Amataqmi munapayankichu warmintapas,+ serviqninkunatapas, torontapas, asnontapas nitaq ima kapuqninkunatapas”, nispa.+
18 Israelpa lliw mirayninkunamá qawarqaku urqupa qusnisqanta hinaspa llipyaykuna kasqanta, uyarirqakutaqmi tunrururusqantapas chaynataq carneropa waqran waqasqantapas. Tukuy chayta qawaspa hinaspa uyarispam manchakuymanta katkatatarqaku, chaymi karullapi sayarqaku.+
19 Hinaspam Moisesta nirqaku: “Amayá Diosqa ñuqaykuwanqa rimachunchu, qamyá ñuqaykuwanqa rimay, ñuqaykuñataq qamta uyarisqaykiku, chaynapi ama wañurunaykupaq”, nispa.+
20 Hinaptinmi Moisesqa paykunata nirqa: “Ama manchakuychikchu. Diosqa imayna sunquyuq kasqaykichikta yachayllatam munan,+ payqa munan kasukuspa mana huchallikunaykichiktam”, nispa.+
21 Chaymi Israelpa mirayninkunaqa karullapi karqaku. Moisesñataqmi Diospa kasqan yana-yanay puyuman asuykurqa.+
22 Hinaptinmi Jehova Diosqa Moisesta nirqa: “Israelpa mirayninkunata niy: ‘Diosmi nin: “Qamkunaqa uyarirqankichikmi hanaq pachamanta rimapayamusqayta.+
23 Ñuqallam Diosnikichikqa kani, amam qullqimanta utaq qurimanta taytachakunataqa ruwankichikchu.+
24 Animalta kañapuwanaykichikpaqyá allpata muntuychik*, hina chaypitaqmi ñuqawan hawkalla kasqaykichikrayku animalta nakapuwankichik vacaña utaq ovejaña kaptinpas. Maypipas sutiyta yuyarinaykichikpaq* akllasqay lawpim+ qamkunawan kaspay yanapasqaykichik.
25 Animalta kañapuwanaykichikpaq altarta ruwaspaqa amam imawanpas llaqllankichikchu.+ Llaqllaruptikichikqa manañam ñuqapaq hinañachu kanqa.
26 Amataqmi chayman qispinaykichikpaq gradastaqa ruwankichikchu, chaynapi qispiptikichik qala chankalla kasqaykichik ama rikukunanpaq”’”, nispa.
Willakuykuna
^ Utaq: “Sabadoqa”.
^ Utaq: “Tiyaq”.
^ Utaq: “Waqllikunkichu”.
^ Utaq: “Altarta ruwaychik”.
^ Utaq: “Yupaychawanaykichikpaq”.
