Exodo 16:1-36
16 Elinmantañataqmi Israelpa mirayninkunaqa* huklawmanña rirqaku, hinaspam Sin sutiyuq chunniqmanña chayarurqaku,+ chayqa karqa Elinmanta Sinai urquman rinapim. Sin sutiyuq chunniqmanqa chayarqaku iskay kaq killapa 15 punchawninpim, chay killaqa karqa Egiptomanta lluqsimusqanku killapa qatiqnin killam.
2 Chay chunniq qichwapim Israelpa llapallan mirayninkunaqa Moisesmantawan Aaronmanta rimarqaku*.+
3 Paykunaqa Moisestawan Aarontam nirqaku: “¡Kay chunniq qichwapi yarqaymanta wañunaykumantaqa+ aswan allinchá kanman karqa Jehova Diospa piñakusqan punchawpi Egiptopi wañukuyniyku! Egiptopiqa aychatapas hinaspa huk rikchaq mikuykunatapas saksanaykukamam mikurqaniku”, nispa.+
4 Chaymi Jehova Diosqa Moisesta nirqa: “Qamkunapaqmi hanaq pachamanta mikuyta chayachimusaq,+ hinaptinmi Israelpa llapallan mirayninkunaqa punchawpaq kamaqllata sapa punchaw huñunqaku.+ Chaynapim yachasaq kamachisqaykuna kasukusqankuta utaq mana kasukusqankutapas.+
5 Suqta kaq punchawpim+ ichaqa paqarintin punchawpaqwan huñunkichik, hinaspam mikunaykichikpaq yanunkichik”, nispa.+
6 Chaymi Moiseswan Aaronqa Israelpa llapallan mirayninkunata nirqaku: “Inti siqaykuytam yachankichik Egiptomantaqa kikin Jehova Dios pusamususqaykichikta.+
7 Achikyaytañataqmi Jehova Diospa ancha atiyninta qawankichik. Chay atiynintam Jehova Diosqa qawachisunkichik paymanta rimasqaykichikrayku. ¿Imanasqataq ñuqaykumanta rimankichik? ¿Pitaq ñuqaykuqa kaniku ñuqaykumanta rimanaykichikpaqqa?”, nispa.
8 Moisesqa nirqataqmi: “Inti siqaykuyta Jehova Dios aychata qusuptikichikmi hinaspa achikyayta mikuyta qusuptikichikmi yachankichik Jehova Diosqa rimasqaykichikta uyarirusqanta. ¿Pitaq ñuqaykuqa kaniku? Rimaspaykichikqa manam ñuqaykumantachu rimachkankichik, aswanqa Jehova Diosmantam”, nispa.+
9 Chaymantapas Moisesqa Aarontam nirqa: “Israelpa llapallan mirayninkunatayá niy: ‘Rimapakusqaykichikta Jehova Dios uyarirusqanraykum+ kayman huñunakamunaykichik’”, nispa.
10 Chaynatam Aaronqa Israelpa llapallan mirayninkunaman willarqa, hinaptinmi rimayta tukuruptillan paykunaqa muyurispa mana imapa kanan manchakuypaq chunniqta qawarirqaku. Chaypim Jehova Diospa atiynin sayanpa puyupi paykunaman rikuriykurqa.+
11 Jehova Diosqa Moisestam nirqaraq:
12 “Israelpa mirayninkunapa rimasqankutam uyariruni.+ Paykunatayá niy: ‘Inti siqaykuytam aychata mikunkichik, achikyaytañataqmi mikuyta saksanaykichikkama mikunkichik.+ Chaywanmi yachankichik ñuqaqa Jehova Dios kasqayta’”, nispa.+
13 Chaymi inti siqaykuyta achkallay-achka taksa yutuchakuna Israelpa mirayninkunapa kasqanman chayarurqa,+ paqarintinñataqmi Israelpa mirayninkunapa muyuriqninkuqa sullallaña achikyarurqa.
14 Sulla waspiruptinñataqmi pampapiqa chikchi hina yuraqllaña kachkasqa.+
15 Israelpa mirayninkunañataqmi ima kasqanta mana yachaspanku ninakurqaku: “¿Imataq kayqa?”, nispa. Moisesñataqmi paykunata nirqa: “Mikunaykichikpaq Jehova Diospa qususqaykichik mikuymi.+
16 Jehova Diosmi nin: ‘Sapakamayá mikunaykichikpaq kamaqllata huqariychik. Qamkunawan yachaq* sapa runapaqmi kanan hatun matiman*+ kamaqlla’”, nispa.
17 Chayna nisqanman hinamá Israelpa mirayninkunaqa ruwarqaku. Wakinmi achkata huqarirqa, wakinñataqmi asllata.
18 Chay huqarisqankuta matipi tupuykuptinkuñataqmi achka huqariqpaqa mana puchurqachu, aslla huqariqpapas manam pisirqachu.+ Sapakamam huñurqaku mikunankupaq kamaqllata.
19 Moisesqa Israelpa mirayninkunatam nirqaraq: “Amam pipas paqarinpaqqa imatapas puchunqachu”, nispa.+
20 Paykunam ichaqa Moisestaqa mana kasukurqakuchu. Chaymi wakinku paqarintinpaq puchuruptinku urururqa, chaymi millakuypaqta asnarirurqa. Hinaptinmi Moisesqa paykunapaq piñakurqa.
21 Sapa achikyaytam sapakama mikunankupaq kamaqllata huqariqku, chay mikuyqa inti quniruptinmi chulluruq.
22 Suqta kaq punchawpim ichaqa paqarintinpaqwan kamaqta mikuytaqa huqariqku,+ sapakamapaqmi iskay hatun matipi kamaqta huqariqku. Llaqtapi kamachiqkunañataqmi chayna ruwasqankumanta Moisesman willaqku.
23 Moisesñataqmi paykunata nirqa: “Jehova Diosqa nirqa paqarin samana punchaw* kanantam, chaymi paqarinqa Jehova Diospaq sapaqchasqa samana punchaw.+ Chaymi yanunaykichik kaptinqa utaq hornoman hinanaykichik kaptinqa kunan ruwanaykichik.+ Puchuqtañataqmi paqarintinpaq churanaykichik”, nispa.
24 Chaynapim Moisespa nisqanman hina paqarintinkama churarqaku, chay churasqankuqa manam ururqachu nitaq asnarirqachu.
25 Hinaptinmi Moisesqa nirqa: “Mikuychikyá, kunanqa Jehova Diospaq sapaqchasqa samana punchawmi, kunanqa manam pampapiqa imatapas tarinkichikchu.
26 Suqtantin punchawmi huqarinaykichik, qanchis kaq punchawpiqa+ manam imatapas tarinkichikchu”, nispa.
27 Chaynata nichkaptinpas wakinqa samana punchawpas huqariqmi lluqsirqaku, ichaqa manam imatapas tarirqakuchu.
28 Chaynapim Jehova Diosqa Moisesta nirqa: “¿Haykapikamataq qamkunaqa kamachisqaykunata mana kasukunkichikchu?+
29 Ñuqa Jehova Diospa sapaqchasqay samana punchawtaqa manam qunqanaykichikchu.+ Chaymi suqta kaq punchawpiqa iskay punchawpaq kamaqta mikuyta quykichik. Qanchis kaq punchawpiñataqmi mana maymanpas lluqsinaykichikchu, aswanqa hinallapim kanaykichik”, nispa.
30 Chaymi qanchis kaq punchaw sabadopiqa Israelpa llapallan mirayninkuna samarqaku.+
31 Israelpa mirayninkunaqa chay mikuytam suticharqaku “maná*” nispa. Chayqa yuraqmi karqa, hinaspapas culandropa mugun hinam karqa, chaymantapas mielwan chapusqa tanta hinam miski karqa.+
32 Chaymantam Moisesqa nirqa: “Jehova Diosmi nin: ‘Huk matipi tupuykuspayá chay mikuyta sapaqchaspa waqaychaychik,+ chaynapi qipa wiñaykuna ima mikuchisqayta qawanankupaq, chayqa Egiptomanta chunniq qichwanta pusaspay qamkunaman mikuy qusqaymi’”, nispa.
33 Chaymi Moisesqa Aaronta nirqa: “Puyñumanyá hatun matipi huntata tupuykuspa ‘maná’ sutiyuq mikuyta talliykamuy, hinaspayá sapaqchaspa Jehova Diospaq churamuy una-unaypaq, chaynapi waqaychasqa kananpaq”, nispa.+
34 Hinaptinmi Moisesta Jehova Diospa kamachisqanman hina Aaronqa ruwarqa, Aaronqa baulpa* ñawpaqninmanmi+ chaytaqa hinaykurqa churarayananpaq.
35 Israelpa mirayninkunaqa 40 watam Diospa qusqan “maná” sutiyuq mikuyta mikurqaku.+ Paykunaqa mikurqaku Canaan allpapa cantonman chayananku punchawkamam,+ Canaan allpapiqa achka runakunam yacharqa.+
36 Kaypiqa huk mati tupuyllamantam rimachkan, chunka mati tupuyñataqmi karqa huk manka*.
Willakuykuna
^ Utaq: “Huñunasqa runakunaqa”.
^ Utaq: “Rimapakurqaku”.
^ Utaq: “Huk omer”. Qaway B14 kaq yachachikuyta.
^ Utaq: “Tiyaq”.
^ Utaq: “Sabado”.
^ Kayqa yaqachusmi hebreo rimaypi “¿imataq kayqa?” niq rimaymanta karqa.
^ Chaypiqa ichapas documentokunata waqaychaqku.
^ Utaq: “Huk efa”. Qaway B14 kaq yachachikuyta.
