Esdras 8:1-36
8 Artajerjes kamachichkaptinmi Babiloniamanta ñuqawan kutimurqaku ayllunkupi kamachiqkuna hinaspa listasqa runakuna. Paykunam kanku:+
2 Fineaspa+ mirayninmanta Guersom, Itamarpa+ mirayninmanta Daniel, Davidpa mirayninmanta Hatus.
3 Parospa mirayninmanta Secaniaspa ayllun Zacarias. Paywanmi hamurqaku listapi kaq 150 qarikuna.
4 Pahat-moabpa+ mirayninmanta Elio-enai. Paywanmi hamurqaku 200 qarikuna. Elio-enaiqa karqa Zerayaspa churinmi.
5 Zatupa mirayninmanta+ Secanias. Paywanmi hamurqaku 300 qarikuna. Secaniasqa karqa Jaazielpa churinmi.
6 Adinpa mirayninmanta+ Ebed. Paywanmi hamurqaku 50 qarikuna. Ebedqa karqa Jonatanpa churinmi.
7 Elampa mirayninmanta+ Jesayas. Paywanmi hamurqaku 70 qarikuna. Jesayasqa karqa Ataliapa churinmi.
8 Sefatiaspa mirayninmanta+ Zebadias. Paywanmi hamurqaku 80 qarikuna. Zebadiasqa karqa Miguelpa churinmi.
9 Joabpa mirayninmanta Abdias. Paywanmi hamurqaku 218 qarikuna. Abdiasqa karqa Jeyelpa churinmi.
10 Banipa mirayninmanta Selomit. Paywanmi hamurqaku 160 qarikuna. Selomitqa karqa Josifiaspa churinmi.
11 Bebaipa mirayninmanta+ Zacarias. Paywanmi hamurqaku 28 qarikuna. Zacariasqa karqa Bebaipa churinmi.
12 Azgadpa mirayninmanta+ Joanan. Paywanmi hamurqaku 110 qarikuna. Joananqa karqa Haqatanpa churinmi.
13 Adonicampa mirayninmanta+ Elifelet, Jeiel hinaspa Semaya. Paykunawanmi hamurqaku 60 qarikuna. Paykunam karqaku qipallaña kutimuqkuna.
14 Babiloniamantaqa kutimurqakutaqmi Bigvaipa mirayninmanta+ Utaipas chaynataq Zabudpas. Paykunawanmi hamurqaku 70 qarikuna.
15 Paykunatam Ava+ lawman riq mayupa patanpi huñururqani. Chaypim kimsa punchaw samarqaniku. Runakuna ukupi hinaspa sacerdotekuna ukupi maskaspaymi Leviy ayllumanta kaqkunata mana chullatapas tarirqanichu.
16 Chaymi qayachirqani kamachiqkunata. Paykunam karqa: Eliezer, Ariel, Semaya, Elnatan, Jarib, Elnatan, Natan, Zacarias hinaspa Mesulam. Qayachirqanitaqmi yachachiq Joyaribtapas chaynataq Elnatantapas.
17 Paykunatam kacharqani Casifia sutiyuq lawpi kamachiq Idowan hinaspa Diospa wasinpi* yanapakuqkunawan* rimamunankupaq. Chaynapi Diospa wasinpi yanapakunankupaq runakunata kachamunankupaq.
18 Dios yanapawasqankuraykum pusamurqaku allin tantiuyuq Serebiasta+ hinaspa churinkunatawan ayllunkunata. Llapankum karqa 18. Serebiasqa karqa Malipa+ mirayninmi, Maliñataqmi karqa Leviypa willkan, Leviyñataqmi karqa Israelpa churin.
19 Pusamurqakutaqmi Meraripa+ miraynin Hasabiastawan Jesayastapas. Paykunawanmi hamurqaku churinkupas chaynataq ayllunkupas. Llapankum karqa 20.
20 Diospa wasinpi yanapakuqkunatam pusamurqaku 220 runakunata. Paykunataqa ñawpaqtaraqmi Davidwan kamachiypi yanapaqninkuna churarqaku Leviy ayllukunata yanapanankupaq. Paykunaqa llapallankum listapi karqaku.
21 Chaymantam kamachirqani Aava mayupa waqtanpi llapallayku ayunanaykupaq hinaspa humillakuspayku Diosta mañakunaykupaq. Chaynapi tukuy imantin risqaykupi churiykutawan yanapawanankupaq.
22 Ñuqaykuqa kamachiqtam nirqaniku: “Kuyakuq Diosniykuqa yanapanmi maskaqninkunataqa.+ Qipanchaqninkunawanmi ichaqa llumpayta piñakun”, nispa.+ Chaymi pinqakuspay chiqniwaqniykumanta harkawanankupaq soldadokunataqa mana mañakurqanichu.
23 Chayraykum ayunaspayku Diosta mañakurqaniku. Hinaptinmi Diosqa mañakusqaykuta uyariykuwarqaku.+
24 Chaymantam sacerdotekunapa kamachiqninkunamanta rakirqani 12 runakunata. Paykunam karqa Serebias, Hasabias+ hinaspa chunka ayllunku.
25 Paykunamanmi pesaykuspay qurqani qullqita, qurita hinaspa serviciokunata. Chaykunatam Diospa wasinpaq qurqaku kamachiq Artajerjes, yanapaqninkunawan tantiaysiqninkuna hinaspa chaypi kaq Israel runakuna.+
26 Qurqanim 22.230 kilo* qullqita, 68 kilo masnin* qullqipa chanin qullqimanta 100 serviciokunata, 3.420 kilo* qurita,
27 1.000 qullqipa* chanin qurimanta 20 taksa tazonkunata, llipipipichkaq allinnin broncemanta iskay puka serviciokunata. Chay bronceqa karqa quri hina kuyayllapaqmi.
28 Chaymantam paykunata nirqani: “Qamkunaqa Jehova Diospaq sapaqchasqam kankichik.+ Sapaqchasqataqmi kachkan serviciokunapas. Qullqiwan quriñataqmi Jehova Diospaq sunqumanta qusqanku.
29 Chaynaqa, allintayá waqaychaychik Jerusalenpi+ sacerdotekunapa, Leviy ayllukunapa hinaspa ayllukunapi kamachiqkunapa qayllanpi pesasqa kanankama. Pesasqaqa kanqa Jehova Diospa wasinpi kaq cuartokunapim”, nispa.
30 Chaynapim sacerdotekunawan Leviy ayllukunaqa chaskirqaku pesasqa qullqita, qurita hinaspa serviciokunata Jerusalenpi Diospa wasinman apamunankupaq.
31 Punta kaq killapa 12 punchawninpim+ Ava+ mayumanta Jerusalenman hamurqaniku. Hamusqaykupiqa Diosmi yanapawarqaku chiqniwaqniyku runakunamantawan suwakunamanta.
32 Jerusalenman+ chayaramuspaykum kimsa punchaw samarqaniku.
33 Paqarintinñataqmi Diospa wasinpi pesarqaniku qullqita, qurita hinaspa serviciokunata.+ Hinaspaykum qurqaniku Uriyapa churin sacerdote Meremotman.+ Paymi kachkarqa Fineaspa churin Eleazarwan, Leviy ayllumanta Jozabadwan+ hinaspa Noadiaswan. Jozabadqa karqa Jesuapa churinmi, Noadiasñataqmi karqa Binuipa churin.+
34 Lliw serviciokunam yupaspa pesasqa karqa. Hinaspapas hayka llasasqantam listapi churarqaku.
35 Kutimuqkunam Israelpa yupaychasqan Jehova Diospaq kañapurqaku.+ Lliw runapa rantinpim kañarqaku 12 torokunata.+ Kañarqakutaqmi 96 carnerokunatapas+ chaynataq 77 malta carnerokunatapas. Hucharaykuñataqmi kañarqaku 12 chivokunata.+
36 Chaymantam kamachiq Artajerjespa qillqamusqan kamachikuykunata qurqaniku+ kamachiqpa churasqan runakunaman* hinaspa Eufrates mayupa inti siqaykunan lawpi+ kaq llaqtakunapi kamachiqkunaman. Hinaptinmi paykunaqa runakunata yanaparqaku. Yanaparqakutaqmi Diospa wasinpaqpas.+
Willakuykuna
^ Utaq: “Templopi”.
^ Utaq: “Netineokunawan”.
^ Utaq: “650 talento”. Qaway B14 kaq yachachikuyta.
^ Utaq: “Iskay talento”.
^ Utaq: “100 talento”.
^ Kayqa karqa Persia runakunapa darico sutiyuq qurimanta qullqinmi. Qaway B14 kaq yachachikuyta.
^ Hebreo rimaypiqa nichkan: “Satrapakunaman”, nispam.
