Eclesiastes 10:1-20
10 Imaynam miski asnaq aceitetapas wañusqa chuspikuna asnarirachin, chaynam mana yuyayniyuq kaypas yachaytawan ancha riqsisqa kayta yanqachan.+
2 Yachayniyuq runaqa sunqunpim allinlla kawsakuyta munan, mana yachayniyuq runapa sunqunmi ichaqa mana allinllapi kawsakuyta munan.+
3 Mana yuyayniyuq runaqa imaynaña kawsakuspanpas mana yuyayniyuqllam,+ chayna kasqanwanmi riqsichikun mana yuyayniyuq kasqanta.+
4 Kamachiq qampaq piñakuptinqa amayá pasakuychu,+ hawkalla kaspaykiqa manam huchamanqa wichiykunkichu.+
5 Kay pachapiqa rikurqanitaqmi llakikuypaq kaqtapas, rikurqanim munayniyuqkunapa mana allin ruwasqankuta.+
6 Paykunaqa mana yachayniyuqkunamanmi allin llamkaykunata qunku, yachayniyuq runakunamanmi* ichaqa allin llamkaytaqa mana qunkuchu.
7 Rikurqanim sirvientekuna caballopi puriqta, kamachiqpa yanapaqninkunañataq sirvientenkuna hina chakillawan puriqta.+
8 Uchkuta uchkuqqa chay uchkumanmi wichiykunman,+ rumi pirqata uchkuqtañataqmi culebra kachuramunman.
9 Rumita hurquqqa rumiwanmi katurachikunman, yantata chiqtaqpas waqtakurunmanmi*.
10 Laquyasqa hachata mana pipas afilaptinqa aswan kallpawanraqmi waqtana. Yachayniyuq runam ichaqa yachayninman hina imatapas allinta ruwanqa.
11 Sichu manaraq mansoyachichkaptin mansoyachiqninta culebra kachuruptinqa yanqapaqmi mansoyachiy munasqanpas.
12 Yachayniyuq runaqa rimasqanwanmi kuyachikun,+ mana yachayniyuq runam ichaqa rimasqanwan sasachakuypi tarikun.+
13 Imapas rimay qallarisqanqa mana pasaqmi,+ rimay tukusqanpas yanqakunallam.
14 Chayna kachkaptinpas mana yuyayniyuq runaqa hinallam riman.+
Runaqa manam yachanchu imam pasanantaqa. ¿Pitaq willanman wañukusqan qipaman imakuna pasananta?+
15 Mana yuyayniyuq runaqa anchata llamkaspanmi pisipan, payqa manam llaqtaman imayna chayayllatapas yachanchu.
16 ¡Imaynaraq kanqa musullaraq kamachiqniyuq nacionqa!+ ¡Imaynaraq nacionqa kanqa kamachiqpa yanapaqninkuna achikyamusqanmanta mikukuyllapi kaptinkuqa!
17 ¡Mayna kusisqam riqsisqa runapa churin kamachiqniyuq nacionqa! ¡Mayna kusisqam nacionqa kamachiqpa yanapaqninkuna kallpata hapinankupaq horallanpi mikuptinkuqa hinaspa mana sinkakuptinkuqa!+
18 Qilla runapaqa wasinpa qirunkunapas* wichirichkanmi, mana imallatapas ruwakuq runapa wasintaqa param sutun.+
19 Mikuytaqa ruwanku kusikunapaqmi, vinopas kusisqa kanapaqmi,+ qullqim ichaqa imapas pisipuwaqninchikpaq.+
20 Kamachiqtaqa amayá sunqullaykipipas* ñakaychu,+ apu runatapas amayá puñunayki wasipiqa ñakaychu, manachayqa rimasqaykitam alton pawaqkuna aparunman, utaqmi pichinkucha willaykamunman.
Willakuykuna
^ Hebreo rimaypiqa nichkan: “Apu runakunamanmi”, nispam.
^ Ichapas kanman: “Yantawanmi imanakurunmanpas”, niqpas.
^ Utaq: “Kaspinkunapas”.
^ Ichapas kanman: “Camaykipipas”, niqpas.
