Colosenses 4:1-18
4 Patronkuna, qamkunapas sirvientekichikmanyá imam kaqta qupuychik ama pimanpas sayapakuspa, yachasqaykichikpi hinapas hanaq pachapim qamkunapapas patronnikichik kachkan.+
2 Tukuy tiempoyá Diosta mañakuychik,+ hinaspayá mañakuspaykichik rikchan-rikchanlla kaychik, chaynataqyá agradecekuychik.+
3 Mañakuychiktaqyá ñuqaykupaqpas+ punkuta hina Diosninchik kichaykuwaptinku palabranmanta willakunaykupaq hinaspa Cristomanta* pakasqa sumaq willakuyta rimanaykupaq, chayraykum ñuqapas preso kachkani,+
4 mañakuychiktaqyá chay willakuymanta chaylla entiendekuqta willakunaypaqpas.
5 Diospi mana iñiq runakunawanpas yachaywanyá allinlla kawsakuychik, tiempoykichiktapas amayá usuchiychikchu*.+
6 Rimasqaykichikpas sumaqllañayá kachun kachiwan kachichasqa hina,+ hinaspaqa yachankichikmi sapakamawan imayna rimariyta.+
7 Kuyasqay wawqinchik Tiquicom+ willasunkichik imayna tarikusqaymanta, payqa tukuy sunqunwan señorninchikta serviqmi, hinaspapas ñuqawan kuska serviqmi.
8 Paytam kachamuchkaykichik imayna kasqaykumanta willasunaykichikpaq hinaspa sunquykichikta tiyaykachinanpaq.
9 Paywantaqmi hamuchkan ñuqamanta mana karunchakuq kuyasqay wawqinchik Onesimopas,+ payqa qamkunamanta huknikichikmi. Paykunam willasunkichik kaypi tukuy ima pasakusqanmanta.
10 Presomasiy Aristarcom+ saludamusunkichik, saludamusunkichiktaqmi Bernabeypa primon Marcospas.+ Qamkunam kamachikuyta chaskirqankichik pay watukamusuptikichik allinllata chaskiykunaykichikpaq.+
11 Saludamusunkichiktaqmi Jesuspas, paypa huknin sutinqa Justom. Paykunaqa kanku qari kayninkupi señalasqakunam, paykunallam Diospa gobiernonmanta* willakuypi yanapawaqniykunaqa kanku, paykunaqa anchatam kallpanchawarqa.
12 Jesucristopa serviqnin Epafraspas+ saludamusunkichikmi, payqa qamkunamanta huknikichikmi, paymi tukuy tiempo qamkunapaq tukuy sunqunwan Diosta mañakuchkan, chaynapi allin yuyayniyuq kanaykichikpaq hinaspa Diospa tukuy ima munayninmanta mana iskayrayanaykichikpaq.
13 Ñuqam yachani qamkunarayku Epafraspa ancha kallpanchakusqanta, yachanitaqmi Laodicea llaqtapi kaqkunapaqpas hinaspa Hierapolis llaqtapi kaqkunapaqpas kallpanchakusqanta.
14 Saludamusunkichiktaqmi kuyasqa doctor Lucaspas+ hinaspa Demaspas.+
15 Saludaykapuwaychiktaqyá Laodicea llaqtapi iñiqmasinchikkunatapas, chaynataq Ninfatapas hinaspa wasinpi huñunakuq iñiqkunatapas.+
16 Kay cartata leeruspaykichikmi+ apachinkichik Laodiceapi huñunakuq iñiqkunaman chaynapi paykunapas leenankupaq, qamkunapas leenkichiktaqmi paykunaman apachisqay cartataqa.
17 Wawqinchik Arquipotapas+ niychiktaqyá: “Señorninchikmanta chaskisqayki llamkayta cumplinaykipaqyá anchata kallpanchakuy”, nispa.
18 Ñuqa Pablom makiywanpuni qillqamuspay saludamuykichik.+ Yuyariychiktaqyá presochasqa kasqaytapas.+ Diosninchikpa ancha kuyakuyninyá* qamkunawan kachun.
Willakuykuna
^ Utaq: “Diospa akllasqanmanta”.
^ Griego rimaypiqa nichkan: “Tiempoykichiktapas rantispa”, nispam.
^ Qaway “Diospa gobiernon” niqpa ima ninan kasqanta.
^ Kaypiqa rimachkan mana kuyana kachkaspa kuyasqa kaymantam.
