2 Samuel 5:1-25
5 Chaymanta qipatam Hebron llaqtapi+ David kachkaptin Israel ayllukuna llapallanku rirqaku, hinaspam nirqaku: “Ñuqaykuqa aylluykim kaniku.+
2 Saul kamachiwaqniyku kachkaptinraqmi qamqa Israel soldadokunapa kamachiqnin karqanki.+ Jehova Diosmi nisurqanki: ‘Qanmi ovejata michichkaq hina Israel runaykunata kamachinki’”, nispa.+
3 Chaynapimá Israelpi llapallan punta apaqkunaqa Hebron llaqtata rirqaku, hinaptinmi Davidqa paykunawan contratota* ruwarqa+ Jehova Diospa qayllanpi. Chaymantam Davidta churarqaku Israel runakunata kamachinanpaq.+
4 Davidqa 30 watanpim karqa kamachiyta qallaykuspanqa, payqa 40 watam kamachirqa.+
5 Hebron llaqtamantam Juda aylluta kamachirqa qanchis wata parten, Jerusalen llaqtamantañataqmi+ Juda aylluta hinaspa wakin Israel ayllukunata kamachirqa 33 wata.
6 Kamachiq Davidqa runankunapiwanmi Jerusalen llaqtaman rirqa Jebus runakunawan+ peleanankupaq, chaypim Jebus runakunaqa yacharqaku. Jebus runakunam ichaqa asikuspanku Davidta nirqaku: “¡Manamá kayman yaykumuytaqa atinkichu! Qamtaqa ñawsakunawan wiqrukunallaraqmi* wischurusunki”, nispanku. Paykunaqa sunqunkupim nirqaku: “Davidqa manamá haykapipas kayman yaykumuytaqa atinqachu”, nispanku.+
7 Davidmi ichaqa yaykuruspan Sion muqupi llaqtata munaychakururqa, chaymi kunanqa Davidpa llaqtanña.+
8 Chay kutipim David nirqa: “¡Pipas Jebus runakunaman yaykuyta munaspaqa yakupa rinan uchkunta ustuspayá ‘wiqrukunata hinaspa ñawsakunata’ wañuchimuchun, paykunaqa chiqnisqay runakunam!”, nispa. Chaymi runakunapas ninku: “Ñawsakunawan wiqrukunaqa manam haykapipas wasimanqa yaykunqachu”, nispa.
9 Chaymantam Davidqa Sion llaqtapi yacharqa*, chay llaqtatam suticharqaku* “Davidpa llaqtan” nispa. Davidqa pirqakunatawan hatun wasikunatam ruwachirqa chay muqupi*+ hinaspa huklawkunapipas.+
10 Chaynapim Davidqa aswan-aswan riqsisqa rikurirurqa,+ paytaqa angelkunata kamachiq Jehova Diosmi yanaparqa.+
11 Tiro llaqtata kamachiq Hiranmi+ willakuqkunata Davidman kacharqa. Apachirqataqmi cedromanta tablakunatapas,+ rirqakutaqmi carpinterokunapas hinaspa wasi ruwaqkunapas. Paykunam Davidpa wasinta pirqarqaku.+
12 Davidqa chayraqmi yacharurqa Israel runakunapa kamachiqnin kananpaq Jehova Dios yanapasqanta+ hinaspa hatunchasqanta.+ Diosqa runankunaraykumá kamachiq kananpaq churarqa.+
13 Hebron llaqtamanta Jerusalen llaqtaman David astakuruspanqa achka warmikunawanmi casarakurqa,+ karqataqmi sapaq warminkunapas. Chay warminkunapim karqa qari churinkuna hinaspa warmi churinkuna.+
14 Jerusalen llaqtapi naceq churinkunam karqa: Samua, Sobab, Natan,+ Salomon,+
15 Ibar, Elisua, Nefeg, Jafia,
16 Elisama, Eliada hinaspa Elifelet.
17 Filistea runakunam yacharurqaku Israel runakunapa kamachiqnin kananpaq Davidta churarusqankuta,+ hinaspankum llapallanku maskaq rirqaku.+ Chayta yacharuspanmi Davidqa pakakuna sitiopi pakakamurqa.+
18 Filistea runakunaqa chayaruspankum Refaim pampapi karqaku.+
19 Hinaptinmi Davidqa Jehova Diosta tapukurqa:+ “¿Risaqchu Filistea runakunawan peleaq? ¿Makiymanchu paykunata churaykunki?”, nispa. Jehova Diosñataqmi nirqa: “Arí, Filistea runakunataqa makikimanmi churasaq”, nispa.+
20 Chaymi Davidqa Baal-perazim lawman rispan Filistea runakunata chaypi wañurachirqa. Hinaspam nirqa: “Hatun pirqata lluqlla tuñichichkaq hinam Jehova Diosqa chiqniwaqniykunata wañurachin”, nispa.+ Chaymi chay sitiota suticharqa “Baal-perazim” nispa.+
21 Filistea runakunaqa chaypim saqirurqaku taytacha-mamachankuta, hinaptinmi Davidwan runankuna apakurqaku.
22 Chaymanta qipatam Filistea runakunaqa Refaim pampapi kaqmanta kachkarqaku.+
23 Chay kutipipas Davidqa Jehova Diostam tapurqa, payñataqmi nirqa: “Amayá ñawpaqninkutaqa asuykuychu. Aswanqa muyuramuspayá plantakunapa* kasqanpi pakakamuspa qipankumanta wañuchimuy.
24 Chay plantakunapa saqaqaqasqanta uyarispaykim mana iskayrayaspa pawaykunki, chay plantakunaqa soldadokunapa purisqan hinam saqaqaqanqa. Ñuqa Jehova Diosmi yanapasqayki Filistea runakunata wañuchinaykipaq”, nispa.
25 Jehova Diospa kamachisqanman hinam Davidqa ruwarqa, chaymi Gueba llaqtamanta+ Guezer llaqtakama+ Filistea runakunata wañurachirqa.+
Willakuykuna
^ Utaq: “Pactota”. Qaway kay palabrapa ima ninan kasqanta.
^ Utaq: “Wistukunallaraqmi”.
^ Utaq: “Tiyarqa”.
^ Ichapas kanman: “Pay suticharqa”, niqpas.
^ Utaq: “Milo sutiyuq muqupi”.
^ Hebreo rimaypiqa nichkan: “Bekja plantakunapa”, nispam.
