2 Reyes 25:1-30
-
Jerusalen llaqtata Nabucodonosor muyurirusqanmanta (1-7)
-
Jerusalen llaqtatawan Diospa wasinta kañaykusqankumanta hinaspa kaqmanta huklawman apasqa kasqankumanta (8-21)
-
Guedaliasta kamachiq kananpaq churarusqankumanta (22-24)
-
Guedaliasta wañuchisqankumanta hinaspa Egiptoman ayqikusqankumanta (25, 26)
-
Joakinta Babiloniapi kachaykusqankumanta (27-30)
25 Isqun wataña Sedequias kamachichkaptinmi Babilonia nacionta kamachiq Nabucodonosorqa+ Jerusalen llaqtaman hamurqa llapallan soldadonkunapiwan.+ Chayqa karqa chunka kaq killapa chunka punchawninpim. Llaqtata muyuriruspankum yaykunankupaq allpata muntururqaku.+
2 Llaqtapa muyuriqninpim karqaku Sedequiaspa kamachisqan 11 watakama.
3 Llaqtapi mikuy mana kaptinmi+ runakunaqa yarqaymanta karqaku.+ Tawa kaq killapa isqun punchawninpim
4 Babilonia soldadokuna* murallata uchkururqaku.+ Chaymi Jerusalen llaqtapi llapallan soldadokunaqa kamachiqpa huertan lawpi punkunta tuta lluptikurqaku. Babilonia soldadokunaqa llaqtapa muyuriqninpim kachkarqaku. Kamachiq Sedequiasqa Araba lawman riq ñannintam ayqikurqa.+
5 Babilonia soldadokunam ichaqa qatispanku hayparurqaku Jerico llaqtapa hichpan pampapi. Hinaspankum paywan riq soldadokunata chiqirachirqaku.
6 Kamachiq Sedequiastañataqmi hapiruspanku+ Babilonia nacionta kamachiqman pusarqaku, payqa kachkarqa Ribla llaqtapim. Chaypim nirqaku Sedequiasta ima ruwanankumanta.
7 Sedequias qawachkaptinmi churinkunata wañurachirqaku. Chaymantam Nabucodonosorqa Sedequiasta ñawsayarachirqa, hinaspam broncemanta cadenawan wataruspan Babilonia nacionman pusarqa.+
8 Pichqa kaq killapa qanchis punchawninpim Jerusalen llaqtaman chayaramurqa+ Babilonia nacionta kamachiq Nabucodonosorpa yanapaqnin Nebuzaradan.+ Payqa karqa soldadokunapa kamachiqninmi. Nebuzaradanqa chayaramurqa 19 wataña Nabucodonosor kamachichkaptinmi.
9 Hinaspanmi kañaykurqa Jehova Diospa wasinta,+ kamachiqpa wasinta,+ ancha riqsisqa runakunapa wasinta+ hinaspa Jerusalenpi lliw wasikunata.+
10 Nebuzaradanqa Babilonia soldadokunapiwanmi Jerusalen llaqtapa murallanta tuñirachirqa.+
11 Soldadokunapa kamachiqnin Nebuzaradanñataqmi llaqtapi puchuq runakunata Babiloniaman pusarqa, pusarqataqmi Babilonia nacionta kamachiqman sayapakuqkunatapas chaynataq wakin runakunatapas.+
12 Qalaypaq wakcha runakunatam ichaqa saqirurqa llaqtapi uvas huertakunata cuidanankupaq hinaspa llamkanankupaq.+
13 Babilonia soldadokunam Jehova Diospa wasinpi broncemanta pilarkunata+ ñutuparurqaku. Ñutuparurqakutaqmi Jehova Diospa wasinpi carretakunatapas+ chaynataq broncemanta ruyru estanquetapas,+ hinaspankum broncetaqa Babiloniaman apakurqaku.+
14 Apakurqakutaqmi baldekunatapas, palakunatapas, nina wañuchinakunatapas, vasokunatapas chaynataq Diospa wasinpi* broncemanta lliw serviciokunatapas.
15 Nebuzaradanmi apakurqa qurimantawan+ qullqimanta+ ruwasqa sansa apanakunata hinaspa tazonkunata.
16 Jehova Diospa wasinpaqmi Salomon ruwachirqa broncemanta iskay pilarkunata, ruyru estanqueta hinaspa carretakunata. Chaykunata ruwachisqan bronce achka kasqanraykum llasayninqa mana yachakurqachu.+
17 Sapa pilarpa sayayninmi karqa pusaq metro*,+ chay pilarkunapa puntanpi broncemanta ruyruniqñataqmi karqa huk metro masnin* sayayniyuq. Chay ruyrupa sikinpi kaq muyuriqninpi mallakuna hinaspa siqinpi granadakunaqa llapanmi broncemanta karqa.+ Chaynallam iskaynin pilarkuna karqa.
18 Nebuzaradanqa pusakurqataqmi ancha riqsisqa sacerdote Serayatapas,+ sacerdote Sofoniastapas+ chaynataq punku cuidaq kimsa runakunatapas.+
19 Llaqtamantaqa pusakurqataqmi soldadokunapa kamachiqnintapas, kamachiq Sedequiaspa pichqa yanapaqninkunatapas, 60 runakunatapas hinaspa soldadokunata kamachiqpa secretariontapas. Paymi peleaq rinankupaq runakunata huñumuq.
20 Llapallankutam Nebuzaradanqa+ pusarqa Ribla llaqtapi+ Babiloniata kamachiqman.
21 Hinaptinmi Babiloniata kamachiqqa Ribla llaqtapi paykunata wañuchirqa, chayqa karqa Hamat+ lawpim. Chaynatamá Juda nacionniyuq runakunaqa pusasqa karqaku.+
22 Babiloniata kamachiq Nabucodonosorqa Juda allpapi puchuq runakunata kamachiq kananpaqmi churarurqa+ Guedaliasta.+ Payqa karqa Aicampa+ churinmi, Aicamñataqmi karqa Safanpa+ churin.
23 Soldadokunata kamachiqkunam runankunapiwan yacharurqaku Guedaliasta runakunapa kamachiqnin kananpaq Nabucodonosor churarusqanta. Hinaspankum Mizpa llaqtata Guedalias qawaq rirqaku. Paykunam karqaku Netaniaspa churin Ismael, Careapa churin Joanan, Netofa llaqtayuq Tanumetpa churin Seraya hinaspa Maacat llaqtayuq runapa churin Jaazanias. Paykunawantaqmi rirqa runankupas.+
24 Chayaruptinkum Guedaliasqa paykunatawan runankunata nirqa: “Amayá manchakuychikchu Babilonia runakunapa makinpi kaytaqa. Hina kay nacionpi yachaspaykichikyá* Nabucodonosorta kasukuychik, hinaspaqa allinmi kankichik”, nispa.+
25 Qanchis kaq killapim kamachiqpa mirayninmanta kaq Ismaelqa+ chunka runankunapiwan Mizpa llaqtaman chayaramurqa. Hinaspankum wañurachirqaku Guedaliasta hinaspa paywan kaq Juda runakunatawan Babilonia runakunata.+ Ismaelqa karqa Netaniaspa churinmi, Netaniasñataqmi karqa Elisamapa churin.
26 Chaymantam runakunaqa soldadokunapa kamachiqninkunapiwan llapallanku ripukurqaku Egipto nacionman.+ Ripukurqakuqa Babilonia runakunata manchakuspankum.+
27 Evil-merodacmi Babilonia nacionta kamachiyta qallaykuspan Juda nacionta kamachiq Joakinta+ preso kasqanmanta hurqururqa.+ Chayqa karqa 37 wataña Babilonia nacionpi Joakin kachkaptinmi. Hurqururqaqa 12 killapa 27 punchawninpim.
28 Evil-merodacqa Joakinta llakipayaspanmi Babilonia nacionpi tarikuq wakin kamachiqkunamantapas aswan riqsisqata ruwarurqa.
29 Joakinqa preso kasqan pachanta mudakuruspanmi wañukunankama kamachiqwan kuska mikurqa.
30 Babilonia nacionta kamachiqqa sapa punchawmi Joakinmanqa wañukunan punchawkama mikuyta qurqa.
Willakuykuna
^ Utaq: “Caldea runakuna”.
^ Utaq: “Templopi”.
^ Utaq: “18 kuchus”. Qaway B14 kaq yachachikuyta.
^ Utaq: “Kimsa kuchus”.
^ Utaq: “Tiyaspaykichikyá”.
