2 Reyes 24:1-20
24 Jeoyakim kamachichkaptinmi Babilonia nacionta kamachiq Nabucodonosor+ paywan peleaq hamurqa. Hinaptinmi Jeoyakimqa Nabucodonosorpa makinpi karqa kimsa wata. Chaymantam ichaqa manaña kasukurqachu.
2 Chaymi Jehova Diosqa Jeoyakimpa kamachisqan allpaman kacharqa suwa runakunata. Chay suwakunam karqa Caldea runakuna,+ Siria runakuna, Moab runakuna hinaspa Ammon runakuna. Kacharqaqa Juda nacionta chinkachinankupaqmi. Chaytaqa Jehova Diosqa willachirqañam+ willakuqninkunawan*.
3 Chayqa Juda naciontaqa pasarqa Jehova Diospa kamachisqanman hinamá. Paymi Juda nacionta chinkarachiyta munarqa+ Manasespa huchallikusqanmanta+
4 hinaspa Jerusalen llaqtapi mana huchayuq achka runakunata Manases wañuchisqanmanta.+ Chayraykumá Jehova Diosqa pampachayta mana munarqachu.+
5 Jeoyakimpa imayna kawsakusqanmanta hinaspa tukuy ima ruwasqanmantaqa Juda nacionta kamachiqkunamanta willakuq libropim qillqasqa kachkan.+
6 Jeoyakim wañukuptinmi+ churin Joakinña kamachiyta qallaykurqa.
7 Egipto nacionta kamachiqqa manañam haykapipas peleaqqa lluqsirqañachu Babilonia nacionta kamachiq allpanta qichuruptin.+ Qichururqaqa Egipto wayqumanta+ Eufrates mayukamam.+
8 Joakinqa+ 18 watanpi kachkaspam kamachiyta qallaykurqa. Payqa Jerusalen llaqtamantam kimsa killalla kamachirqa.+ Mamanmi karqa Jerusalen llaqtayuq Elnatanpa churin Neusta.
9 Joakinqa taytan hinam Jehova Diospa chiqnisqan kaqkunata ruwarqa.
10 Chay punchawkunapim Babilonia nacionta kamachiq Nabucodonosorpa soldadonkuna hamuspanku Jerusalen llaqtata muyurirurqaku.+
11 Muyuriqninpi kachkaptinkum kamachiq Nabucodonosorqa Jerusalenman hamururqa.
12 Hinaptinmi Juda nacionta kamachiq Joakinqa Babilonia nacionta kamachiq Nabucodonosorpa makinman churakuykurqa+ mamanpiwan, runankunapiwan, ancha riqsisqa soldadonkunapiwan hinaspa kamachiypi yanapaqninkunapiwan.+ Hinaptinmi Nabucodonosorqa presota pusarqa. Pusarqaqa pusaq wataña kamachichkaspanmi.+
13 Apakurqataqmi Jehova Diospa wasinpi* hinaspa kamachiqpa wasinpi lliw quri-qullqitapas.+ Chaymantapas, Jehova Diospa wasinpi kaq qurimanta serviciokunatam pakiparurqa.+ Chaykunaqa Israel nacionta kamachiq Salomonpa ruwachisqanraqmi karqa. Tukuy chayqa pasarqa Jehova Diospa willachisqanman hinam.
14 Chaymantapas, Nabucodonosorqa Jerusalen llaqtamantam pusarqa ancha riqsisqa soldadokunata,+ kallpasapa soldadokunata, carpinterokunata hinaspa herrerokunata.+ 10.000 runatam pusarqa, wakcha runakunallatañam saqirurqa.+
15 Chaynatamá Joakintaqa+ Babilonia+ nacionman presota pusarqa. Pusarqataqmi mamantapas, warminkunatapas, kamachiypi yanapaqninkunatapas hinaspa llaqtapi ancha riqsisqa runakunatapas. Llapallankutamá Jerusalen llaqtamanta Babilonia nacionman pusarqa.
16 Nabucodonosorqa pusarqataqmi 7.000 soldadokunatapas chaynataq 1.000 rumi llaqllaqkunatawan herrerokunatapas. Paykunaqa llapallankum kallpasapa hinaspa peleay yachaq runakuna karqaku.
17 Nabucodonosorqa Mataniastañam Joakinpa rantinpi kamachinanpaq churarurqa, hinaspanmi Sedequiaswan suticharqa.+ Mataniasqa karqa Joakinpa tionmi.+
18 Sedequiasqa 21 watanpi kachkaspam kamachiyta qallaykurqa. Payqa Jerusalen llaqtamantam Juda nacionta 11 wata kamachirqa. Mamanmi karqa Libna llaqtayuq Jeremiaspa churin Amutal.+
19 Sedequiasqa Jeoyakim hinam+ Jehova Diospa chiqnisqan kaqkunata ruwarqa.
20 Tukuy chaykunaqa Jerusalen llaqtapiwan Juda nacionpim pasarqa Jehova Dios llumpayta piñakusqanrayku, chaymi chinkarachirqa.+ Sedequiasqa manañam kasukurqachu Babilonia nacionta kamachiqtaqa.+
