2 Reyes 2:1-25
2 Eliasta Jehova Dios nisyu wayrawan+ puyukunapa kasqanman manaraq huqarichkaptinmi Eliasqa+ Eliseowan+ Guilgal llaqtamanta+ lluqsirqaku.
2 Richkaptinkum Eliasqa Eliseota nirqa: “Ama hina kaspayá kayllapi qipakuy, Jehova Diosmi niykuwan Betel llaqtaman rinaypaq”, nispa. Eliseoñataqmi nirqa: “Jehova Diospa sutinpim niki, manam qipaymanchu, qanwanmi risaq”, nispa. Chaymi iskayninku Betel llaqtaman rirqaku.+
3 Hinaptinmi Betel llaqtapi Diosmanta willakuqkuna* Eliseota nirqaku: “¿Yacharqankichu kunan punchaw yachachisuqniki Eliasta Jehova Dios huqarinanta?”, nispa.+ Chaynata niptinkum Eliseoñataq nirqa: “Arí, yachaniñam. Ama chaymantaqa rimaychikchu”, nispa.
4 Chaymantam Eliasqa Eliseota nirqa: “Ama hina kaspayá kayllapi qipakuy, Jehova Diosmi niykuwan Jerico llaqtaman rinaypaq”, nispa.+ Eliseoñataqmi nirqa: “Jehova Diospa sutinpim niki, manam qipaymanchu, qanwanmi risaq”, nispa. Chaymi iskayninku Jerico llaqtaman chayarurqaku.
5 Hinaptinmi Jerico llaqtapi Diosmanta willakuqkuna Eliseoman asuykuspanku nirqaku: “¿Yacharqankichu kunan punchaw yachachisuqniki Eliasta Jehova Dios huqarinanta?”, nispa. Chaynata niptinkum Eliseoñataq nirqa: “Arí, yachaniñam. Ama chaymantaqa rimaychikchu”, nispa.
6 Chaymantam Eliasqa huktawan Eliseota nirqa: “Ama hina kaspayá kayllapi qipakuy, Jehova Diosmi niykuwan Jordan mayuman rinaypaq”, nispa. Eliseoñataqmi nirqa: “Jehova Diospa sutinpim niki, manam qipaymanchu, qanwanmi risaq”, nispa. Chaymi iskayninku rirqaku.
7 Paykunapa qipantam rirqaku 50 Diosmanta willakuqkuna*, hinaspankum karullamanta qawarqaku. Eliaswan Eliseoñataqmi Jordan mayupa patanpi sayarqaku.
8 Chaypi kachkaptinkum Eliasqa pachanta wankuykuspan+ yakuta waqtarqa, hinaptinmi yakuqa kaylawman waklawman kichakururqa. Chaymi iskayninku chaki allpantaña chimparqaku.+
9 Mayuta chimparuptinkum Eliasqa Eliseota nirqa: “Qampaq imapas ruwanayta munaspaykiqa niykuway manaraq qanmanta rakikuchkaptiy”, nispa. Chaymi Eliseoqa nirqa: “Ama hina kaspayá, qampi kaq Diospa atiyninta+ wakinta*+ quykuway”, nispa.
10 Hinaptinmi Elias nirqa: “Sasa kaqtam mañakurunki. Qanmanta Dios rakiwasqanta rikuwaspaykiqa mañakusqaykitam chaskinki. Mana rikuwaspaykim ichaqa mana chaskinkichu”, nispa.
11 Iskayninku rimastin richkaptinkum qunqaymanta linwachkaq caballokunapa+ aysasqan linwachkaq carreta paykunata rakirurqa. Hinaptinmi Eliasqa nisyu wayrapa chawpinta puyukunapa kasqanman huqarikururqa.+
12 Eliseoñataqmi qawaspan qayakurqa: “¡Taytalláy! ¡Taytalláy! ¡Israelpa carretantawan caballopi sillakuq runakunatam rikuchkani!”, nispa.+ Manaña rikuspanmi Eliseoqa pachanta llikikurqa.+
13 Chaymantam Eliseoqa Eliaspa wichiykachisqan pachanta huqariykuspan+ kutirqa Jordan mayupa patanman.
14 Hinaspanmi chay pachawan yakuta waqtaspan nirqa: “¿Maypitaq kachkan Eliaspa yupaychasqan Jehova Diosqa?”, nispa. Waqtaruptinmi mayuqa kaylawman waklawman kichakururqa, hinaptinmi Eliseoqa chimparqa.+
15 Jerico llaqtapi Diosmanta willakuqkunam Eliseota rikururqaku, hinaspankum nirqaku: “Eliaspi kaq Diospa atiyninmi Eliseopiña kachkan”, nispa.+ Chaynata nispankum asuykurqaku, hinaspankum Eliseopa ñawpaqninpi qunqurakuykuspa kumuykurqaku.
16 Hinaspam nirqaku: “Ñuqaykuwanmi kachkan 50 mana manchakuq runakuna. Paykunayá yachachiqniki Eliasta maskaramuchunku. Ichapas Jehova Diospa atiynin huqariruspan chay-chay urqupi utaq wayqupi saqirun”, nispa.+ Chaynata niptinkum Eliseoñataq nirqa: “Ama maskachimuychikchu”, nispa.
17 Chaywanpas maskachimunankupaqmi hikutarqaku, chaymi Eliseo nirqa: “Chaynaqa maskachimuychikyá”, nispa. Chaymi paykunaqa 50 runakunawan maskachimurqaku. Chay runakunaqa kimsa punchaw maskamuspankupas manam tarimurqakuchu.
18 Maskaqkuna kutiramuptinkuqa Jerico llaqtapim Eliseoqa kachkarqa.+ Paykunatam Eliseo nirqa: “¿Manachu nirqaykichik ama maskamunaykichikpaq?”, nispa.
19 Chaymanta qipamanmi Jerico llaqtapi runakuna Eliseota nirqaku: “Taytáy, yachasqaykipi hinapas kay llaqtaqa allin allpapim kachkan.+ Yakunmi ichaqa mana allinchu, chaymi allpankupipas mana imapas qispinchu*”, nispa.
20 Chaynata niptinkum Eliseoñataq nirqa: “Musuq tazonta apamuspaykichikyá chayman kachita hinaychik”, nispa. Hinaptinmi kamachisqanta ruwarqaku.
21 Chaymantam Eliseoqa yakupa tuqyamusqanman riruspan kachita maqchiykurqa,+ hinaspanmi nirqa: “Jehova Diosmi nin: ‘Kay yakutam allinyarachini. Chaymi manaña pipas wañunqachu, manañataqmi qulluq* warmikunapas kanqañachu’”, nispa.
22 Eliseopa nisqanman hinam yakuqa kunankama allinña kachkan.
23 Jerico llaqtamantam Eliseoqa Betel llaqtaman rirqa. Ñannintakama qispichkaptinmi llaqtamanta lluqsimuq warmakuna asipayaspanku+ Eliseota nirqaku: “¡Qispiy paqla! ¡Qispiy paqla!”, nispanku.
24 Chaymantam Eliseoqa muyuriykamuspan Jehova Diospa sutinpi ñakaykurqa. Hinaptinmi iskay china osokuna+ montemanta lluqsiramurqa, hinaspam 42 warmakunata llikiparurqa.+
25 Eliseoqa Carmelo urqumanmi pasakurqa.+ Hinaspanmi kutirqa Samaria llaqtaman.
Willakuykuna
^ Hebreo rimaypiqa nichkan: “Profetakunapa churinkuna”, nispam. Qaway “profeta” niq palabrapa ima ninan kasqanta.
^ Hebreo rimaypiqa nichkan: “Profetakunapa churinkuna”, nispam.
^ Hebreo rimaypiqa nichkan: “Quwanaykimanta huk chaynatawan”, nispam.
^ Ichapas kanman: “Warmikunaqa malparirun utaq animalkunaqa sullurun”, niqpas.
^ Ichapas kanman: “Malpariruq”, niqpas.
