2 Reyes 10:1-36
10 Samaria llaqtapim Acabpa+ 70 churinkuna karqa. Chaymi Jehuqa cartakunata apachirqa Samaria llaqtaman, Jezreel llaqtayuq kamachiqkunaman, punta apaqkunaman+ hinaspa Acabpa churinkunata uywaqkunaman. Chay cartakunapim nirqa:
2 “Qamkunawanmi kachkan kamachiqpa churinkuna, peleana carretakuna, caballokuna, peleanaykichikpaq kaqkuna, llaqtaykichikpas murallayuqmi kachkan. Kay cartata leespam
3 akllankichik kamachiqpa aswan allin hinaspa allin ruwaq churinta. Chaymantam taytanpa rantinpi kamachinanpaq churankichik, hinaspam kamachiqpa ayllunrayku peleankichik”, nispa.
4 Cartata chaskiqkunañataqmi mancharikuspanku nirqaku: “Iskay kamachiqkuna Jehuwan peleayta mana atichkaptinkuqa,+ ¿imaynataq ñuqanchikqa atichwan?”, nispa.
5 Chaymi kamachiqpa wasinmanta nanachikuq, llaqtamanta nanachikuq, punta apaqkuna hinaspa Acabpa churinkunata uywaqkuna Jehuman willachirqaku: “Qamyá tantiasqaykita ruway, manam pitapas kamachiqniyku kananpaqqa churasaqkuchu. Ñuqaykuqa runaykikunam kallaniku, imapas niwasqaykikutam ruwallasaqku”, nispa.
6 Chaymi Jehuqa kaqmanta cartata apachispan nirqa: “Ñuqata yanapawayta hinaspa kasuwayta munaspaykichikqa kamachiq Acabpa churinkunatayá wañuchiychik. Hinaspayá paqarin kay horata paykunapa umanta Jezreel llaqtaman apamuwaychik”, nispa.
Kamachiq Acabpa 70 churinkunaqa llaqtapi ancha riqsisqa runakunawan kuskam kachkarqaku, paykunam uywarqaku.
7 Cartata chaskiykuspallankum kamachiqpa 70 qari churinkunata wañurachirqaku,+ hinaspam umankuta canastapi apachirqaku Jehuman, payqa kachkarqa Jezreel llaqtapim.
8 Willakuqmi Jehuman asuykuspan nirqa: “Kamachiqpa churinkunapa umantam aparamunku”, nispa. Chaymi Jehuñataq nirqa: “Llaqtapa punkunpiyá iskay hawaqpi muntumuychik, chaypiyá paqarinkama kachun”, nispa.
9 Jehuqa paqarintintam lliw runakunata nirqa: “Qamkunaqa mana huchayuqmi kankichik. Ñuqam kamachiqniyta qipanchaspay wañurachirqani.+ Ichaqa, ¿pitaq kaykunataqa wañurachin?
10 Kaytam yachanaykichik, Acabpa ayllunmanta Jehova Diospa imapas nisqanqa cumplikunqapunim.+ Manam imapas Jehova Diospa nisqanqa yanqachu kanqa. Jehova Diosqa Eliaswan willachisqanman hinam ruwachkan”, nispa.+
11 Jehuqa wañurachirqataqmi Jezreel llaqtapi Acabpa puchuq ayllunkunatapas, ancha riqsisqa runankunatapas, kuyasqan runakunatapas hinaspa sacerdotekunatapas*.+ Manam mayqillantapas puchurqachu.+
12 Chaymantam Jehuqa Samaria llaqtaman rirqa. Risqan ñanpim karqa ovejakunata rutuna wasi.
13 Chaypim Jehuqa Juda nacionta kamachiq Ocoziaspa+ wawqinkunawan tuparurqa, hinaspam nirqa: “¿Pikunataq kankichik?”, nispa. Paykunañataqmi nirqaku: “Ocoziaspa wawqinkunam. Kamachiqpa churinkunata hinaspa mamanpa wawankunata qawaqmi richkaniku”, nispa.
14 Chayllam Jehuqa runankunata kamachirqa: “¡Hapiychik!”, nispa. Chay 42 runakunata hapiruspankum wasipa hichpanpi kaq pozopa waqtanpi llapankuta wañurachirqaku.+
15 Chaymanta rispanmi Recabpa+ churin Jeonadabwan+ tuparurqa, Jehuwan tupaqmi Jeonadabqa hamuchkarqa. Jehuqa rimakuykuspanmi nirqa: “¿Ñuqa hinachu qampas tukuy sunquykiwan yanapawanki?”, nispa.
Jeonadabñataqmi nirqa: “Arí, yanapasqaykim”, nispa.
Jehuñataqmi nirqa: “Chaynaqa makikita haywarimuway”, nispa.
Chaymi makinta haywariptin Jehuqa carretanman qispiykachirqa.
16 Chaymantam Jehu nirqa: “Hakuchik ñuqawan, Jehova Dios qipanchaqkunata ima ruwasqaytam qawanki”, nispa.+ Chaynata nispanmi carretanpi pasachirqa.
17 Jehuqa Samaria llaqtaman chayaruspanmi Acabpa ayllunmanta puchuqkunata lliwta wañurachirqa.+ Chaynataqa ruwarqa Eliaswan Jehova Diospa willachisqanman hinam.+
18 Chaymantapas Jehuqa llapallan runakunata huñuruspanmi nirqa: “Acabmantapas astawanraqmi Baaltaqa yupaychasaq.+
19 Qayaychik Baal taytachamanta willakuqkunata*,+ Baal yupaychaqkunata hinaspa sacerdotenkunata.+ Lliwyá hamuchunku, Baal taytachapaqmi achka-achkata wañuchipusaq. Pipas mana hamuqqa wañunqam”, nispa. Jehuqa chaynataqa llullakurqa Baal yupaychaqkunata llapallanta wañurachinanpaqmi.
20 Jehuqa nirqaraqmi: “Huñunakuspa Baalta yupaychanapaqyá willakuychik”, nispa. Chaymi willakurqaku.
21 Jehuqa llapallan Israel runakunamanmi willachimurqa. Chaymi Baalta yupaychaqkunaqa llapallanku rirqaku. Hinaspankum Baalta yupaychananku wasipi+ huntay-huntay karqaku.
22 Chaymantam Jehuqa pachakuna waqaychaqta nirqa: “Baalta yupaychaqkunapaqyá pachakunata hurqumuy”, nispa. Chaymi hurqumurqa.
23 Jehuqa Recabpa churin Jeonadabpiwanmi+ Baalta yupaychana wasiman yaykurqaku. Chaypim Jehuqa Baal yupaychaqkunata nirqa: “Allinta maskaychik, kaypiqa manam Jehova Diosta yupaychaqkunaqa kananchu, aswanqa Baalta yupaychaqkunallam”, nispa.
24 Chaymantam Baalpaq animalkunata nakapuspanku kañarqaku. Jehuqa 80 runankunata punkupi churaruspanmi nirqa: “Pipas kay runakunamanta hukllantapas mana wañuchispan lluptirachiqqa kikinmi wañunqa”, nispa.
25 Baalpaqmi animalkuna kañayta tukururqa. Chaymantam Jehuqa soldadonkunata hinaspa soldadokunapa kamachiqninkunata nirqa: “¡Yaykuspaykichik wañuchiychik! ¡Amayá chullapas lluptichunchu!”, nispa.+ Chaymi paykunaqa espadawan wañuchispanku hawaman wischumurqaku, hinaspankum Baalta yupaychananku wasipa ukunkamaraq* wañuchistin yaykururqaku.
26 Chaymantam Baalpaq sayachisqanku kullukunata+ hawaman hurquruspanku kañaykurqaku.+
27 Ñutuparurqakutaqmi Baalpaq sayachisqanku rumitapas.+ Chaymantapas Baalta yupaychananku wasitam+ tuñirachirqaku, hinaptinmi ispakunanku raqayña kunankama rikurirun.
28 Chaynatam Jehuqa Israel nacionmanta Baalta chinkarachirqa.
29 Chaywanpas, Israel runakunata huchallichiq Nebatpa churin Jeroboan hinam huchakunata ruwarqa. Jehuqa Betel llaqtapi hinaspa Dan llaqtapi qurimanta malta torokunataqa manam chinkachirqachu.+
30 Jehova Diosmi Jehuta nirqa: “Tantiasqayman hina Acabpa mirayninkunata wañuchispayki+ allin kaqkunata ruwasqaykiraykum Israel nacionta kamachinqa willkaykipa willkankama”, nispa.+
31 Chaywanpas, Jehuqa manam tukuy sunqunwanchu kasukurqa Israelpa yupaychasqan Jehova Diospa kamachikuyninkunataqa.+ Hinallam huchakunata ruwarqa Nebatpa churin Jeroboan hina. Jeroboanqa Israel runakunatam huchallichirqa.+
32 Chay punchawkunapim Jehova Diosqa Israel runakunapa allpanta taksayachiyta qallaykurqa. Hazaelmi Israel runakunapa allpanta tukuy lawmanta qichuq.+
33 Qichuqqa Jordan mayumanta qallaykuspa intipa qispimunan lawmanmi, Arnon wayqupa waqtanpi Aroer llaqtamanta qallaykuspa Galaad hinaspa Basan lawkama.+ Galaad allpapim karqa Gad ayllupa allpan, Ruben ayllupa allpan hinaspa Manases+ ayllupa allpan.
34 Kamachiq Jehupa imayna kawsakusqanmanta, tukuy ima ruwasqanmanta hinaspa munayniyuq kasqanmantaqa Israel nacionta kamachiqkunamanta willakuq libropim qillqasqa kachkan.
35 Chaymantam Jehuqa wañukurqa, hinaptinmi Samaria llaqtapi pamparurqaku. Chaymi churin Jehoacazña+ kamachirqa.
36 Samaria llaqtamanta Israel nacionta Jehupa kamachisqanmi karqa 28 wata.
Willakuykuna
^ Qaway kay palabrapa ima ninan kasqanta.
^ Utaq: “Baal taytachapa profetankunata”.
^ Ichapas rikchakurqa hatun pirqayuq llaqtaman.
