2 Cronicas 8:1-18
8 Salomonqa kikinpa wasintawan Jehova Diospa wasintam 20 watapi qispichirqa.+
2 Tukuruspanmi Salomonqa Hirampa qusqan llaqtakunata allichachirqa,+ hinaspam Israel runakunaman quykurqa chaypi yachananpaq*.
3 Chaymantapas, Salomonqa Hamat-zoba llaqtatam munaychakururqa.
4 Chaymantam chunniqpi Tadmor llaqtata allichachirqa*, allichachirqataqmi Hamat lawpi kawsaykuna waqaychanatapas.+
5 Chaymantapas allichachirqam hanay Bet-horon llaqtata,+ uray Bet-horon llaqtata,+ chay llaqtakunaqa karqa murallayuqmi, punkuyuqmi hinaspa trankayuqmi.
6 Allichachirqataqmi Baalat llaqtatapas.+ Hatarichirqataqmi kawsaykuna waqaychana llaqtakunatapas, carretakuna waqaychana llaqtakunatapas+ hinaspa sillakuqkunapa yachanan llaqtakunatapas. Salomonqa Jerusalen llaqtapipas, Libano lawpipas chaynataq munaychakusqan llaqtakunapipas hatarichinanpaq tantiasqantam ruwarqa.
7 Puchuq Amorreo runakunaqa, Het runakunaqa, Perizita runakunaqa, Hev runakunaqa hinaspa Jebus runakunaqa+ manam Israelpa mirayninkunachu karqaku.+
8 Chay runakunapa miraynintam Israel runakuna mana wañuchirqakuchu.+ Paykunatam Salomon huñuchimurqa mana imallapaq llamkachinanpaq, chaynam kunankamapas kachkanku.+
9 Israelpa mirayninkunatam ichaqa mana imallapaqqa mana llamkachiqchu.+ Paykunam karqaku soldadonkuna, soldadokunapa kamachiqninkuna, carreta apaqkunapawan sillakuqkunapa kamachiqninkuna.+
10 Karqataqmi Salomonpa llamkapuqninkunata qawaqkunapas, paykunam karqaku 250 runakuna.+
11 Salomonmi pusachimurqa Egipto nacionta kamachiqpa* warmi churinta+ Davidpa llaqtan sutiyuq llaqtamanta ruwachisqan wasiman.+ Pusachimurqaqa “Jehova Diospa baulninpa kasqan lawkunaqa payllapaqña sapaqchasqam, chaymi warmiyña kaspanpas kamachiq Davidpa wasinpiqa mana yachanmanchu” nispanmi.+
12 Salomonmi Jehova Diospaq animalkunata nakaspan kañarqa,+ kañarqaqa Jehova Diospa wasinpa corredorninpa ñawpaqninpi kaq altarpim.+
13 Chaytaqa ruwaq Moisespa kamachisqanman hinam samana punchawpi*,+ llullu killapi,+ watapi kimsa kuti hatun huñunakuykunapi.+ Chay huñunakuykunaqa mana levadurayuq tantata ruwana punchawmi*,+ cosecha qallariy hatun punchawmi+ hinaspa ramadakuna* ruwana hatun punchawmi.+
14 Chaymantapas, Salomonqa taytan Davidpa kamachisqanman hinam sacerdotekunata+ churarqa ruwayninkuta ruwanankupaq. Leviy ayllukunatapas churarqam Diosta hatunchanankupaq+ chaynataq sacerdotekunata sapa punchaw yanapanankupaq. Punku cuidaqkunatapas churarqam sapa punkuta qawanankupaq+ Davidpa kamachisqanman hina.
15 Paykunaqa lliwmi kamachiqpa nisqanman hina tukuy imata ruwarqaku. Sacerdotekunawan Leviy ayllukunapas kasukurqakum imapas waqaychana kaqpaq ima kamachikuykunatapas.
16 Salomonqa Jehova Diospa wasin cimientay qallarichisqanmanta+ tukuchinankamam tukuy imata sumaqta ruwachirqa. Chaynatamá Jehova Diospa wasin ruwayta tukuchirqa.+
17 Salomonmi rirqa Ezion-guebermanwan+ Elot llaqtaman,+ chayqa karqa lamar quchapa patanpim Edom allpapi.+
18 Chaymanmi Hiramqa+ botekunapi kacharqa lamar quchata allin riqsiq runankunata. Paykunam Salomonpa runankunawan Ofir lawman+ rispanku 15.390 kilo* qurita+ Salomonpaq apamurqaku.+
Willakuykuna
^ Utaq: “Tiyananpaq”.
^ Utaq: “Kaqmanta hatarichirqa”.
^ Utaq: “Faraonpa”.
^ Utaq: “Sabadopi”.
^ Utaq: “Semanantin fiestam”.
^ Utaq: “Chukllakuna”.
^ Utaq: “450 talento”. Qaway B14 kaq yachachikuyta.
