2 Cronicas 29:1-36
29 Ezequiasqa+ 25 watanpim Jerusalen llaqtamanta kamachiyta qallaykurqa. Payqa 29 watam kamachirqa. Mamanmi karqa Zacariaspa churin Abias.+
2 Ezequiasqa ñawpaq abuelon David hinam+ Jehova Diospa munasqanman hina allin kaqkunata ruwarqa.+
3 Kamachiyta qallaykusqan watapim punta kaq killapi Jehova Diospa wasinta kicharuspan punkunkunata allichachirqa.+
4 Chaymantam qayachirqa sacerdotekunatawan Leviy ayllukunata, qayarachirqaqa intipa qispimunan lawpi plazamanmi.
5 Hinaspam nirqa: “Uyariwaychik Leviy ayllukuna, yupaychanaykichikpaq alistakuspayá+ Jehova Diospa wasintapas chuyanchaychik. Hinaspapas chuya wasinmantayá taytachakunata hurquychik.+
6 Taytanchikkunam Jehova Diosta qipancharuspanku mana allinkunata ruwarqaku.+ Jehova Diosta mana kasukuspankum wasintapas manaña qawarirqakuñachu.+
7 Diospa wasinman yaykunapi punkukunatapas wichqarurqakum,+ hinaspam mecherokunatapas wañurachirqaku.+ Manañam Diospaqqa inciensotapas* kañapurqakuñachu,+ manataqmi chuya wasipiqa animalkunatapas kañapurqakuñachu.+
8 Chayraykum Jehova Diosqa piñakururqa Jerusalen llaqtapi yachaqkunapaqwan* Juda nacionpi kaq wakin llaqtakunapi yachaqkunapaq,+ chaymi paykunataqa hatun sasachakuyman churaspan runakunapa asipayananta hinaspa mancharikuypaqta ruwarurqa. Chayna kasqantaqa qamkunapas rikurqankichikmi.+
9 Chaynapim ñawpaq abuelonchikkunaqa wañuchisqa karqaku,+ warminchikpas, qari churinchikpas hinaspa warmi churinchikpas presom apasqa karqaku.+
10 Chaymi kunan Jehova Dioswan tukuy sunquymanta contrato* ruwayta munani,+ chaynapi ñuqanchikwan manaña piñasqa kananpaq.
11 Llaqtamasillaykuna, Jehova Diosmi qamkunataqa sapaqchasurqankichik wasinpi llamkanaykichikpaq,+ animalkunata kañapunaykichikpaq.+ Chaynaqa imam ruwanaykichiktaqa amayá saqiychikchu”, nispa.
12 Hinaptinmi Leviy ayllukunaqa llamkayta qallaykurqaku. Koatpa mirayninmantam+ karqa Amasaipa churin Maat hinaspa Azariaspa churin Joel. Meraripa mirayninmantañataqmi+ Abdipa churin Quis hinaspa Jealelelpa churin Azarias. Guersonpa mirayninmantañataqmi+ Zimapa churin Joa hinaspa Joapa churin Eden.
13 Elizafanpa mirayninmantañataqmi Simriwan Jewel. Asafpa mirayninmantañataqmi+ Zacariaswan Matanias.
14 Hemanpa mirayninmantañataqmi+ Jeyelwan Simei. Jedutunpa mirayninmantañataqmi+ Semayawan Uziel.
15 Paykunam ayllunkuta huñururqaku, hinaspam kamachiqpa nisqanman hina yupaychanankupaq alistakuspa Jehova Diospa wasintapas chuyancharqaku. Chaytaqa ruwarqaku Jehova Diospa kamachisqanman hinam.+
16 Sacerdotekunam Jehova Diospa wasinman* yaykurqaku chuyanchanankupaq, hinaspam Jehova Diospa wasinmanta taytachakunata hurqumurqaku. Hurqumurqakuqa Jehova Diospa wasinpa pationmanmi,+ chaymantañataqmi Leviy ayllukuna Cedron wayquman aparqaku.+
17 Chaynatam chuyancharqaku punta kaq killapa qallariynin punchawpi, pusaq kaq punchawpiñataqmi Jehova Diospa wasinpa corredorninta chuyancharqaku.+ Jehova Diospa wasintaqa pusaq punchawmi chuyancharqaku, chay killapa 16 punchawninpiñataqmi lliwta tukurqaku.
18 Chaymantam kamachiq Ezequiasta nimurqaku: “Jehova Diospa wasin chuyanchaytaqa ñam tukurunikuña, chuyancharamunikutaqmi altartapas,+ Diospaq sapaqchasqa tanta* churana mesatapas+ chaynataq chaypi servichikuna kaqkunatapas.+
19 Diosta qipanchaq Acazpa wischusqan+ serviciokunatapas allicharuspaykum Diospaq sapaqcharamuniku,+ kunanqa Jehova Diospa altarninpa ñawpaqninpim kachkan”, nispa.
20 Kamachiq Ezequiasñataqmi tutapay hatarispan kamachiypi yanapaqkunata qayachimurqa, hinaspam Jehova Diospa wasinman rirqaku.
21 Pusarqakutaqmi qanchis torokunata, qanchis carnerokunata, qanchis malta carnerokunata hinaspa qanchis chivokunata. Chayta kañaptinku Diospa wasin sapaqchasqa kananpaq hinaspa kamachiqpa ayllunwan Juda runakunapa huchan pampachasqa kananpaq.+ Hinaspam Aaronpa mirayninmanta sacerdotekunata nirqa Jehova Diospaq kañanankupaq.
22 Paykunam torokunata nakarqaku,+ hinaspam yawarninta chaskispanku altarman challarqaku.+ Chaymantañataqmi carnerokunata nakaspanku yawarninta altarman challarqaku, chaynatam ruwarqaku malta carnerokunawanpas.
23 Hucharayku qusqanku chivokunatañataqmi kamachiq Ezequiaspa hinaspa huñunasqa runakunapa qayllanman pusarqaku. Hinaptinmi makinkuta hawanman churarqaku.
24 Sacerdotekunañataqmi chivokunata nakaruspanku Israel runakunapa huchan pampachasqa kananpaq yawarninta altarman tallirqaku. Chaynataqa ruwarqaku kamachiqpa nisqanman hinam, nirqam chay kañanapaq animalkunawan hucharayku qusqanku animalkunaqa Israel runakunapa huchanrayku kananta.
25 Kamachiq Ezequiasqa Leviy ayllukunatam nirqa Jehova Diospa wasinpi platilloyuqkama, cuerdayuq tocanayuqkama chaynataq arpayuqkama+ kanankupaq. Chaykunatam Jehova Diospa nisqanman hina kamachirqa David,+ musquypi hina* qawaq Gad+ chaynataq Diosmanta willakuq* Natan.+
26 Chaynapim Leviy ayllukunaqa Diospa wasinpi sayarqaku Davidpa ruwachisqan tocanayuqkama. Sacerdotekunañataqmi karqaku cornetillayuqkama.+
27 Chaymantam Ezequiasqa kamachirqa animalkunata nakaspa Diospaq kañanankupaq.+ Hinaptinmi Jehova Diospaq takiyta qallaykurqaku, cornetillakunata tocarqaku, tocarqakutaqmi Davidpa ruwachisqan tocanapaq kaqkunatapas.
28 Llapallan runakunam kumuykurqaku takiptinku hinaspa cornetillakunata tocaptinku. Chaykunataqa ruwarqaku nakasqa animalkunata kañayta tukunankukamam.
29 Kañayta tukuruptinkum kamachiq Ezequiasqa hinaspa paywan kaq runakunaqa qunqurakuykuspa kumuykurqaku.
30 Ezequiaswan kamachiypi yanapaqninkunam Leviy ayllukunata nirqaku Davidpawan+ Asafpa+ takinkunawan Jehova Diosta hatunchanankupaq. Chaymi kusikuyllawanña takispanku qunqurakurqaku. Asafqa karqa musquypi hina qawaqmi.
31 Chaymantam kamachiq Ezequiasqa nirqa: “Kunanqa Jehova Diospaq sapaqchasqañam kankichik, chaynaqa Jehova Diospa wasinmanyá apamuychik kañanapaq kaqkunata hinaspa agradecekuspa imapas qusqaykichikta”, nispa. Chaymi runakunaqa Diospa tukuy ima ruwasqanmanta agradecekuspanku apamurqaku kañanapaq kaqkunatawan sunqumanta quy munasqankuta.+
32 Jehova Diospaq nakaspa kañanankupaqmi apamurqaku 70 torokunata, 100 carnerokunata hinaspa 200 malta carnerokunata.+
33 Qurqakutaqmi 600 torokunatapas hinaspa 3.000 ovejakunatapas.
34 Sacerdotekunaqa manam haypakurqakuchu animalkunapa qaranta chustunankupaqqa, chaymi wakin sacerdotekuna chuyanchakunankukama Leviy ayllukuna yanaparqaku.+ Chaytaqa ruwarqaku sacerdotekunamantaqa Leviy ayllukuna chaylla chuyanchakusqankuraykum.+
35 Achka-achka animalkunatam kañarqaku.+ Kañarqakutaqmi Dioswan hawkalla kasqankurayku animalkunapa wirantapas+ chaynataq vinotapas. Chay vinotaqa animal kañasqankumanmi talliqku.+ Chaynatam Jehova Diospa wasinpi yupaychayta qallaykurqaku.
36 Chaykunata ruwanankupaq Dios chaylla yanapasqanraykum Ezequiaswan llapallan runakunaqa anchata kusikurqaku.+
Willakuykuna
^ Kayqa karqa wakin sachakunapa miski asnaq wiqinmi.
^ Utaq: “Tiyaqkunapaqwan”.
^ Utaq: “Pacto”. Qaway kay palabrapa ima ninan kasqanta.
^ Utaq: “Templonman”.
^ Utaq: “Patanasqa tanta”.
^ Utaq: “Profeta”.
^ Utaq: “Revelacionpi”.
