2 Cronicas 16:1-14
16 Asa 36 wataña kamachichkaptinmi, Israel nacionta kamachiq Baasa+ allichachirqa* Rama llaqtata,+ chaynapi Asapa kamachisqan Judamanta pipas mana lluqsinanpaq hinaspa pipas mana yaykunanpaq. Chaynataqa ruwachirqa Juda runakunata chiqnispanmi.+
2 Chaymi Asaqa Jehova Diospa wasinpi chaynataq kikinpa wasinpi quritawan qullqita+ apachirqa Siria nacionta kamachiq Ben-adadman.+ Payqa yachachkarqa* Damasco llaqtapim. Asam nirqa:
3 “Imaynam taytay taytaykiwan contratota* ruwarqaku, chaynam ñuqanchikpas contratota ruwarqanchikña. Quritawan qullqitam apachimuchkayki. Chaynaqa, Israelta kamachiq Baasawan rimasqaykitayá yanqacharuy, chaynapi manaña imanawananpaq”, nispa.
4 Chaymi Ben-adadqa Asata kasuspan soldadonkunapa kamachiqninkunata kacharqa Israel nacionpi llaqtakunata munaychakamunankupaq. Chaymi munaychakamurqaku Ijon llaqtata,+ Dan llaqtata,+ Abel-maim llaqtata hinaspa Neftaliy ayllupa wakin llaqtankunata.+
5 Chayta Baasa yacharuspanmi allichachisqan Rama llaqtataqa manaña tukuchirqachu.
6 Kamachiq Asañataqmi Juda runakunata qayarachirqa, hinaspanmi Rama llaqtata+ allichachinanpaq Baasapa servichikusqan rumikunatawan qirukunata* aparachirqa.+ Chaywanmi Gueba llaqtatawan+ Mizpa llaqtata allichachirqa.+
7 Chaymantam qawaq Hanani+ rispan Asata nirqa: “Jehova Diospi mana hapipakuspa Siria nacionta kamachiqpi hapipakusqaykiraykum paykuna munaychakuytaqa mana atinkichu.+
8 Ñawpaqtam Etiopia nacionwan Libia nacionqa achka carretayuq chaynataq silladayuq karqaku. Chayna kaptinpas Jehova Diospi hapipakusqaykiraykum paykunataqa munaychakurqanki.+
9 Jehova Diosqa qawamuchkanmi+ tukuy sunqunwan yupaychaqninkunata yanapaykunanpaq.+ Qanmi ichaqa mana yuyayniyuq hina ruwarunki, chaymi kunanmantapacha qanwan peleaq hamunqaku”, nispa.+
10 Chaynata niykuptinmi Asaqa piñakururqa, hinaspam Hananitaqa carcelman* hinarachirqa. Chay watakunapim Asaqa wakin runakunatapas ñakarichirqa.
11 Asapa kawsakusqanmantaqa Juda nacionpi hinaspa Israel nacionpi kamachiqkunamanta willakuq libropim qillqasqa kachkan.+
12 Asaqa 39 wata kamachichkaspanmi chaki nanaywan llumpayta unqururqa, chayna unquchkaspanpas manam Jehova Diostaqa maskarqachu, aswanqa hampiy yachaqkunatam maskarqa.
13 Asaqa 41 wata kamachichkaspanmi wañukurqa,+ hinaptinmi ñawpaq abuelonkunapa pampakusqanpi pamparurqaku.
14 Paytaqa Davidpa llaqtan sutiyuq llaqtapim pamparqaku,+ chaytaqa kikinmi suma-sumaqta ruwachirqa. Chakanamanmi miski asnaq aceitetawan qurakunamanta ruwasqa miski asnaqta hinarurqaku,+ hinaspam Asapa ayantaqa hawanman hinaykurqaku. Kañapurqakutaqmi miski asnaq qurakunatapas.
Willakuykuna
^ Utaq: “Kaqmanta hatarichirqa”.
^ Utaq: “Tiyachkarqa”.
^ Utaq: “Pactota”. Qaway kay palabrapa ima ninan kasqanta.
^ Utaq: “Kaspikunata”.
^ Hebreo rimaypiqa nichkan: “Makitawan chakita tablawan hapichinanku wasiman”, nispam.
