2 Cronicas 12:1-16
12 Kamachiq Reoboanmi munayniyuq rikuriruspan+ Jehova Diospa kamachikuyninkunata mana kasukurqachu.+ Israel runakunapas manam kasukurqakuchu.
2 Reoboam pichqa wata kamachichkaptinmi Jehova Diosta qipancharusqankurayku Egipto nacionta kamachiq Sisacqa+ Jerusalen llaqtata munaychakuq hamurqa.
3 Kamachiq Sisacmi 1.200 carretakunawan, 60.000 silladakunawan, achkallay-achka soldadonkunawan hamurqa. Paywanmi hamurqa Libia lawmantawan Etiopia lawmanta runakuna, hamurqataqmi Sukiyim runakunapas.+
4 Juda nacionpi hatun llaqtakunata munaychakuruspanmi Sisacqa Jerusalenmanpas chayarurqa.
5 Juda nacionta kamachiq Reoboanmi yanapaqninkunapiwan Sisacta manchakuspanku Jerusalenman huñunakamurqaku, hinaptinmi Diosmanta willakuq* Semaya+ hamuspan nirqa: “Jehova Diosmi nisunkichik: ‘Qamkuna saqiruwasqaykichikraykum ñuqapas kamachiq Sisacpa makinpi saqiruykichik’”, nispa.+
6 Chaymi kamachiq Reoboanwan yanapaqninkuna huchankuta riqsikuspa+ nirqaku: “Jehova Diosqa allin ruwaqmi”, nispa.
7 Chaytam Jehova Dios qawarqa, chaymi Jehova Diosqa Semayata kaynata nirqa: “Huchankumantam wanakurunku, chaymi mana chinkachisaqchu,+ aswanqa chayllam yanapasaq. Piñasqa kaspaypas manam saqisaqchu Jerusalen llaqtata qalaypaq Sisac chinkachinantaqa.
8 Paykunam Sisacta servinqaku, chaynapim yachanqaku huklaw nacionniyuq kamachiqkunata serviymantaqa ñuqata serviwayninku aswan allin kasqanta”, nispa.
9 Chaymantam Egipto nacionta kamachiq Sisac Jerusalen llaqtaman yaykururqa. Hinaspam Jehova Diospa wasinpi chaynataq kamachiqpa wasinpi quri-qullqimanta kaq tukuy imata apakurqa.+ Apakurqataqmi Salomonpa ruwachisqan qurimanta llapallan harkachikunatapas.+
10 Chaymi kamachiq Reoboamqa chaykunapa rantinpi ruwachirqa broncemanta harkachikunataña, hinaspam waqaychaqnin soldadokunapa kamachiqninkunata* nirqa cuidanankupaq, paykunaqa kamachiq Reoboampa wasin punkupim kaqku.
11 Jehova Diospa wasinman Reoboam riptinmi llapallan harkachikunata hurquspanku riysiqku, chaymantañataqmi maymi kasqanman kutiykachiqku.
12 Kamachiq Reoboam huchanmanta wanakuruptinmi Jehova Diosqa manaña llumpaytachu piñakurqa,+ chaymi manaña qalaypaqchu chinkachirqa.+ Juda nacionpiqa allin kaqkunataqa ruwarqakuraqmi.+
13 Reoboamqa hinallam Jerusalen llaqtapi kamachirqa, hinaspam munayniyuq rikurirurqa. Payqa 41 watanpim karqa kamachiyta qallaykuspanqa. Jerusalenpim kamachirqa 17 wata, chay llaqtatam Jehova Diosqa Israel nacionpi lliw ayllukunamanta akllarqa sutinta riqsichikunanpaq. Reoboampa mamanmi karqa Ammon kasta Naama sutiyuq warmi.+
14 Reoboamqa manam tukuy sunquwanchu Jehova Diostaqa yupaycharqa, chaymi mana allinkunata ruwarqa.+
15 Reoboampa kawsakusqanmantaqa qillqarqaku Diosmanta willakuq Semayawan+ musquypi hina* qawaq Idom.+ Reoboanwan Jeroboanqa peleasqallankupiñam kaqku.+
16 Reoboam wañukuptinmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi.+ Chaymantam Reoboampa churin Abiasña+ kamachiq karqa.
Willakuykuna
^ Utaq: “Profeta”.
^ Hebreo rimaypiqa nichkan: “Kallpaqkunata”, nispam.
^ Utaq: “Revelacionpi”.
