2 Corintios 6:1-18
6 Diospa llamkaqmasin+ kaspaykum ñuqaykupas nikiku: Amayá Diospa ancha kuyakuynin* chaskisqaykichikqa yanqapaqqa kachunchu.+
2 Diosmi nin: “Allin tiempopim uyarirqayki, salvakuna punchawpim yanaparqayki”, nispa.+ ¡Kunanmi chay allin tiempo! ¡Kunanmi chay salvasqa kananchik punchaw!
3 Manapunim imatapas ruwanikuchu pipas Diosmanta karunchakunanpaq hinaqa*, chaynapi Diospaq llamkasqaykumanta pipas mana imatapas ninanpaq.+
4 Aswanqa Dios serviq kasqaykutam lliwpi riqsichikuniku:+ Tukuy imata aguantaspa, ñakariykunapi kaspa, mikuymanta kaspa, sasachakuykunapi kaspa,+
5 maqasqa kaspa, presochasqa kaspa,+ chaqwakunapi kaspa, tutakunapas mana puñusqa kaspa, wakinpi mana mikusqa kaspa, anchata llamkaspa,+
6 mana huchallikuspa allinta kawsaspa, imam kaqta yachaspa, pacienciakuspa,+ allin sunquyuq kaspa,+ Diospa atiyninwan* yanapachikuspa, sunqumanta chiqaptapuni kuyakuq kaspa,+
7 chiqapta rimaspa, Diospa atiyninmanta mana iskayrayaspa,+ iskaynin makiykupi peleanapaq kaqkunata hapichkaq hina allin kaqta ruwaspa,+
8 alabasqa kaspa, pinqaypi kaspa, runakunapa allin hinaspa mana allin qawasqan kaspa. Ñuqaykuqa llullapaq hapisqa kaspaykupas chiqaptam rimaniku,
9 mana riqsisqa hina kaspaykupas riqsisqam kaniku, wañunaykutaña runakuna piensaptinkupas kawsachkanikuraqmi,+ azotesqa* kaspaykupas manam wañunikuchu,+
10 llakisqa hina kaspaykupas tukuy tiempom kusisqa kaniku, wakcha hina kaspaykupas achka runakunatam apuyachiniku, mana imayuq hina kaspaykupas tukuy imayuqmi kaniku.+
11 Corinto llaqtapi kaqkuna, mana imatapas pakaspam rimapayaykiku, ñuqaykuqa sunquykutam qamkunapaq kichariniku.
12 Ñuqaykuqa mana imapapas harkasqanmi tukuy sunquykuwan kuyarqaykiku,+ qamkunam ichaqa mana tukuy sunquwanchu kuyawarqankiku.
13 Chaynaqa churiykunata hinam rimapayaykichik, qamkunapas sunquykichiktayá kichariychik*.+
14 Amayá mana iñiqkunawanqa hukllawakuychikchu+ yuguman mana tupaqnintinta watarusqa hinaqa, ¿imaynataq allin ruwayqa tupanman mana allin ruwaywanqa*?+ Utaq, ¿imaynataq achkiqa tupanman tutayaywanqa?+
15 Chaymantapas, ¿imapitaq Cristoqa* tupanman satanaswanqa*?+ ¿Chaynallachu kanman Diospi iñiq* runaqa Diospi mana iñiq runawanqa?+
16 ¿Imatataq Diospa wasinpiqa taytacha-mamachakunaqa ruwanman?+ Ñuqanchikqa kanchik kawsaq Diospa wasin hinam,+ Diosmi nirqa: “Ñuqam paykunawan kuska yachasaq*,+ ñuqam qamkunata yanapasqaykichik, ñuqam paykunapa Diosnin kasaq, paykunañataqmi runaykuna kanqaku”, nispa.+
17 Chaymantapas, “Jehova* Diosqa kaynatam nin: ‘Paykuna ukumantayá lluqsiychik, hinaspayá paykunamanta rakikuychik, amañayá hapiychikchu millakuypaq kaqtaqa’,+ ‘hinaptinqa ñuqam chaskisqaykichik’”, nispa.+
18 “Tukuy atiyniyuq Jehova* Diosqa nintaqmi: ‘Hinaptinqa ñuqam qamkunapaq taytaykichik kasaq,+ qamkunañataqmi qari churiykuna hinaspa warmi churiykuna kankichik’”, nispa.+
Willakuykuna
^ Kaypiqa rimachkan mana kuyana kachkaspa kuyasqa kaymantam.
^ Utaq: “Urmananpaq hinaqa”.
^ Utaq: “Castigasqa”.
^ Utaq: “Hukkunatapas kuyanaykichikpaqyá kallpanchakuychik”.
^ Kaypiqa rimachkan Diospa kamachikuyninkunata mana kaqkaqpas hapiqmantam.
^ Utaq: “Diospa akllasqanqa”.
^ Griego rimaypiqa nichkan: “Belialwanqa”, nispam. Kay palabraqa hebreo rimaypi “mana imapaqpas valeq” niqmantam. Chaynatam satanasta sutichanku.
^ Utaq: “Diosman sunqu”.
^ Utaq: “Tiyasaq”.
^ Qaway A5 kaq yachachikuyta.
^ Qaway A5 kaq yachachikuyta.
