1 Samuel 9:1-27
-
Saulwan Samuel tupasqanmanta (1-27)
9 Benjamin ayllumanta+ huk runam Quis sutiyuq karqa.+ Quispa taytanmi karqa Abiel, Abielpa taytanñataqmi karqa Zeror, Zerorpa taytanñataqmi karqa Becorat, Becoratpa taytanñataqmi karqa Afia. Quisqa apu runam karqa.
2 Paypa churinmi karqa Saul.+ Saulqa karqa kuyayllapaq musum, pay hinaqa manam Israel runakunapiqa pipas karqachu. Hatunkaray kasqanraykum runakunapas hombronkamalla chayaq.
3 Huk punchawmi Saulpa taytan Quispa china asnonkuna chinkarurqa. Chaymi Quisqa churin Saulta nirqa: “Ama hina kaspayá, huknin sirvientenchikpiwan asnonchikkunata maskaramuy”, nispa.
4 Hinaptinmi paykunaqa Efrain ayllupa urqunkunapi hinaspa Salisa llaqtapa allpankunapi maskaspankupas mana tarirqakuchu. Chaymantam Saalim lawman rirqaku, chaypipas manam tarirqakuchu. Benjamin ayllukunapa allpantapas kuchun-kuchunmi maskarqaku, ichaqa manamá tarirqakuchu.
5 Zuf allpamanña chayaruptinkum Saulqa riysiqnin runata nirqa: “Hakuña kutikusun, manachayqa asnokunamanta llakikunanmantaqa ñuqanchikmantañam taytayqa llakikunman”, nispa.+
6 Riysiqnin runam ichaqa nirqa: “Taytáy, wak llaqtapim Diospa runan yachan*. Paymantaqa lliw runakunam allinta riman. Paypa imapas nisqanqa cumplikunpunim.+ Hakuchik tapukuq, ichapas willaykuwachwan asnonchikkuna maypi kasqanta”, nispa.
7 Saulñataqmi nirqa: “Rispanchikqa, ¿imatataq apasunchik? Manañam tantanchikpas kapuwanchikñachu. Manamá imanchikpas kanñachu Diospa runanman qunanchikpaqqa, ¿icha imanchikraqmi kapuwachkanchik?”, nispa.
8 Chay runañataqmi Saulta nirqa: “Kapuwachkanmi qullqichay*, chaytachiki Diospa runanmanqa quykusunchik willawananchikpaq”, nispa.
9 Ñawpaqtaqa Israel runakuna Diosta tapukuq rispankuqa niqkum: “Qawaqpata hakuchik”, nispa.+ Chaynataqa niqku Diosmanta willakuqkunata* qawaqwan sutichasqankuraykum.
10 Chaymantam Saulqa sirviententa nirqa: “Allinmi, hakuchikyá”, nispa. Chaymi paykunaqa Diospa runanpa kasqan llaqtaman rirqaku.
11 Llaqtaman qispichkaspankum yakuman hamuq sipaskunawan tuparurqaku. Chaymi tapukurqaku: “¿Kaypichu qawaq+ kakullan?”, nispa.
12 Chay sipaskunañataqmi nirqaku: “Arí, llaqtapim kachkan. Utqayman riychik. Llaqtapi yachaqkunam Diospaq kunan punchaw animalta muqupi nakapunqaku,+ chaymi payqa kunallanraq chayaramun.
13 Paywanqa llaqtaman yaykuykuspallam tupankichik, muquman manaraq mikuq richkaptinyá hayparuychik. Paymi animal nakapusqankuta Dios chaskiykunanpaq mañakunqa, chayñam runakunaqa mikunqaku, manachayqa manaraqmi mikunqakuchu. Apurawman rispaykichikqa hayparunkichikmi”, nispa.
14 Chaymi llaqtaman qispirqaku. Llaqtaman yaykuykuchkaptinkum Samuelqa muquman rinanpaqña paykuna lawman hamuchkasqa.
15 Chay llaqtaman Saul manaraq chayachkaptinmi huk punchaw ñawpaqninta Jehova Diosqa Samuelta nirqaña:
16 “Paqarin kay horatam Benjamin ayllumanta kachamusqay runawan tupanki.+ Paytam aceitewan tallinki Israel nacionpa kamachiqnin kananpaq.+ Paymi runaykunata Filistea runakunapa makinmanta libranqa. Qawanim runaykunapa imayna ñakarisqanta, mañakamuwasqankutam uyariruni”, nispa.+
17 Saulta Samuel rikuruptinmi Jehova Diosqa Samuelta nirqa: “Paymi chay nisqay runaqa, paymi Israel runakunapa kamachiqnin kanqa”, nispa.+
18 Llaqtaman yaykunapim Saulqa Samuelman asuykuspan tapukurqa: “¿Maypitaq kakullan qawaqpa wasin? Riqsiykachillaway”, nispa.
19 Samuelñataqmi nirqa: “Ñuqam kani qawaqqa. Hakuchik muquman mikunaykichikpaq,+ paqarinñachiki kutikunkichik. Imapas yachay munasqaykitam willasqayki.
20 Kimsa punchawña maskasqayki asnokunamantaqa amaña llakikuychu,+ ñam tarirunkuña. Chaymantapas, Israel runakunapa quri-qullqinqa qampaq hinaspa taytaykipa ayllunkunapaqmi kanqa”, nispa.+
21 Chaynata niykuptinmi Saulñataq nirqa: “¿Imanasqataq chaynata niwanki? ¿Manachu ñuqaqa kani Israelpi llapallan ayllukunamanta taksan kaq Benjamin ayllumanta?+ ¿Manachu aylluypas Benjamin ayllupi kaqkunamanta mana ancha riqsisqa?”, nispa.
22 Chaymantam Samuelqa Saultawan riqmasinta mikunankupaq pusarqa, hinaspam paykunataqa yaqa 30 runakunapa chawpinpi allin tiyanapi tiyaykachirqa.
23 Hinaspam Samuelqa yanukuqta nirqa: “Sapaq churanaykipaq qusqay aychata apamuy”, nispa.
24 Hinaptinmi yanukuqqa enteron pierna yanusqan aychata Saulman quykurqa. Samuelñataqmi Saulta nirqa: “Kay aychatam qampaq churapurqayki. Kunan punchaw mikunaykipaqmi churapurqayki. Ñuqam nirqani: ‘Mikuqkunam hamunqaku’”, nispa. Chaynapim Saulqa Samuelwan chay punchaw mikurqaku.
25 Chaymantam llaqtaman kutimurqaku.+ Llaqtapipas Samuelqa hinallam wasipa hawanpi* Saulwan rimarqaku.
26 Paqarintinqa tutapaytam hatarirurqaku. Samuelmi wasipa hawanpi Saul kachkaptin qayarqa: “Saul, alistakuyña avianaypaq”, nispa. Chaymi alistakuruptin Samuelwan Saulqa llaqtamanta lluqsirqaku.
27 Llaqtamanta uraymanña richkaptinkum Samuelqa Saulta nirqa: “Sirvientekita niykuy+ puntachkananpaq”, nispa. Chaymi sirvienten puntaruptin Samuelqa Saulta nirqa: “Qamqa qipaykuyraq, Diospa niwasqantam willanay kachkan”, nispa.
Willakuykuna
^ Utaq: “Tiyan”.
^ Kayqa karqa yaqa kimsa gramo qullqim. Qaway B14 kaq yachachikuyta.
^ Utaq: “Profetakunata”.
^ Yaqa lliw wasikunapa qatanqa pampam karqa, chaypim imatapas ruwaqku.
