1 Samuel 6:1-21
-
Filistea runakuna Diospa baulninta Israel runakunaman kutichipusqanmanta (1-21)
6 Filistea runakunapa allpanpim Jehova Diospa baulninqa+ qanchis killa karqa.
2 Chay punchawkunapim Filistea runakunaqa sacerdotekunata hinaspa qawaqkunata qayachispanku+ tapukurqaku: “¿Imatataq ruwasaqku Jehova Diospa baulninwan? Niykuwaykuyá Israelpa mirayninkunapa allpanman imaynata kutichinaykupaq”, nispa.
3 Chaymi paykunaqa nirqaku: “Israel runakunapa Jehova Diosninkupa baulninta* kutichispaqa amam mana imayuqtaqa kutichinkichikchu. Pantarusqaykichikraykuyá ofrendaykichikta apachiychik.+ Chayta ruwaspallaykichikmi sanoyankichik hinaspa yachankichik imanasqa ñakarisqaykichikta”, nispa.
4 Filistea runakunañataqmi tapukurqaku: “¿Ima ofrendatataq apachisaqku pantarusqaykumantaqa?”, nispa. Chaymi sacerdotekunawan qatipaqkunaqa nirqaku: “Qamkunapas chaynataq kamachiqnikichikkunapas hina chay unquyllawanmi ñakarichisqa kachkankichik. Chaynaqa, Filistea runakunapa kamachiqninkuna+ pichqa kasqanraykuyá chupuman* rikchakuq pichqa alaqakunata qurimanta ruwaychik, ruwaychiktaqyá ukuchaman rikchakuq pichqa quri alaqakunatapas, hinaspayá apachiychik.
5 Chaynaqa, ruwanaykichikmá chupuman rikchakuq alaqakunata chaynataq chakraykichikpi kawsaykunata tukuq ukuchakunaman rikchakuq alaqakunatapas.+ Israel runakunapa yupaychasqan Diostam hatunchanaykichik. Ichapas chaynapi manaña castigasunkichikmanñachu qamkunata hinaspa taytachaykichikta chaynataq chakraykichiktapas manaña imananmanchu.+
6 Amayá qamkunaqa kaychikchu Egipto nacionta kamachiq* hinaspa runankuna hina mana uyarikuqqa.+ Paykunatam Dios llumpayta ñakarichirqa,+ chayñam Israel runakunata kachaykurqaku pasakunankupaq.+
7 Chaynaqa carretatayá ruwaychik, maskaychiktaqyá uñayuq iskay vacakunatapas. Chay vacakunaqa mana haykapipas yapuqmi kanan. Chay vacakunamanmi carretata watankichik. Uñankunatañataqmi corralninman kutichinkichik, manam mamanwan kuskaqa kananchu.
8 Chaymantañataqmi Jehova Diospa baulninta carretaman churkunkichik, waqtanpiñataqmi cajapi churankichik huchaykichikmanta pampachasqa kanaykichikpaq ruwasqaykichik qurimanta alaqakunata.+ Chaymantam vacakunata kachaykunkichik carreta aysayniyuqta,
9 hinaspam mayman risqanta qawankichik. Israel runakunapa Bet-semes llaqtanman+ riq ñanninta riptinqa yachankichikmi tukuy kaykunawan paykunapa Diosnin castigasusqaykichikta. Chay ñanninta mana riptinmi ichaqa yachankichik paykunapa Diosnin mana castigasusqaykichikta”, nispa.
10 Chay runakunapa kamachisqanman hinam ruwarqaku. Uñayuq iskay vacakunata pusamuspankum carretata watarurqaku. Uñankunatañataqmi corralpi wichqarurqaku.
11 Hinaspam Jehova Diospa baulninta carretaman churkurqaku, waqtanpiñataqmi cajapi hinarqaku ukuchaman rikchakuq qurimanta alaqakunata hinaspa chupuman rikchakuq alaqakunata.
12 Chay vacakunaqa Bet-semes llaqtaman+ riq ñannintam waqastin rirqaku. Manamá alliqmanpas nitaq ichuqmanpas* muyurqachu. Filistea runakunapa kamachiqninkunañataqmi vacakunapa qipanta rirqaku Bet-semes llaqtapa allpankama.
13 Bet-semes llaqtayuq Israel runakunaqa trigotam pampapi rutuchkarqaku. Chay runakunam Diospa baulninta rikuruspanku anchata kusikurqaku.
14 Carretata aysaq vacakunaqa Bet-semes llaqtayuq Josueypa chakranpim sayarurqa hatun rumipa waqtanpi. Hinaptinmi Bet-semes llaqtayuq runakunaqa carretata yantarurqaku, hinaspam vacakunata nakaruspanku+ Jehova Diospaq kañapurqaku.
15 Leviy ayllumanta+ kaqkunam Jehova Diospa baulninta hinaspa cajapi qurimanta alaqakunataqa carretamanta uraykachirqaku, hinaspam hatun rumipa hawanman churaykurqaku. Chay punchawmi Bet-semes llaqtayuqkunaqa+ Jehova Diospaq ofrendakunata hinaspa animalkunata nakaspa kañapurqaku.
16 Chayta qawaykuspankum Filistea runakunapa pichqa kamachiqninkunaqa chay punchawlla Ecron llaqtaman kutikurqaku.
17 Filistea runakunam chupuman rikchakuq qurimanta pichqa alaqakunata apachirqaku pantasqankumanta Jehova Dios pampachananpaq.+ Apachirqakuqa Asdod llaqtata,+ Gaza llaqtata, Asquelon llaqtata, Gat llaqtata+ hinaspa Ecron llaqtata pampachananpaqmi.+
18 Ukuchaman rikchakuq qurimanta alaqakunatañataqmi apachirqaku Filistea runakunapa pichqa kamachiqninkuna hayka llaqtata kamachisqankuman hina. Chay llaqtakunaqa wakinmi murallayuq karqa, wakinñataqmi mana murallayuq.
Jehova Diospa baulninta churasqanku chay hatun rumiqa Bet-semes llaqtayuq Josueypa chakranpim yuyarinapaq hinalla kachkan.
19 Bet-semes llaqtayuq runakunatam Jehova Diosqa wañurachirqa baulninta qawasqankurayku. Wañurachirqaqa 50.070 runakunatam. Hinaptinmi puchuqkunaqa waqarqaku chaynaña runata Jehova Dios wañurachisqanrayku.+
20 Chaymi Bet-semes llaqtayuqkunaqa ninakurqaku: “Jehova Diosqa chuyam, ¿pitaqsi qayllanpiqa kanman?+ ¡Kaymantaqa may llaqtamantaq apanqaku Diospa baulnintaqa!”, nispa.+
21 Hinaspankum Kiryat-jearim llaqtayuqkunaman+ willachimurqaku: “Jehova Diospa baulnintam Filistea runakuna kutirachimunku. Hamuspayá apaychik”, nispa.+
Willakuykuna
^ Hebreo rimaypiqa nichkan: “Dioswan pacto ruwasqanku baulta”, nispam.
^ Chay chupuqa karqa runapa hatun ispakunanpim.
^ Utaq: “Faraon”.
^ Utaq: “Pañamanpas nitaq lluqimanpas”.
