1 Reyes 16:1-34
16 Baasata mana allin pasananmantam Jehova Diosqa Hananipa+ churin Jehuwan+ willachirqa:
2 “Baasataqa mana pipa qawarisqan kachkaptinpas Israel runaykunapa kamachiqnin kananpaqmi churarqani.+ Ichaqa Jeroboanta qatipakuspanmi Israel runaykunata huchallirachin, chaywanmi paykunaqa piñachiwan.+
3 Chayraykum Baasataqa miraynintinta chinkachisaq Nebatpa churin Jeroboanpa ayllunta hina.+
4 Llaqtapi wañuq Baasapa ayllunkunatam allqukuna mikunqa, hawapi wañuqkunatañataqmi alton pawaqkuna mikunqa”, nispan.
5 Kamachiq Baasapa imayna kawsakusqanmanta, munayniyuq kasqanmanta hinaspa imakuna ruwasqanmantaqa Israel nacionta kamachiqkunamanta willakuq libropim qillqasqa kachkan.
6 Baasa wañukuptinmi pamparurqaku Tirza llaqtapi.+ Hinaptinmi churin Elaña kamachirqa.
7 Jehova Diosmi willakuqnin* Jehuwan willachirqa kamachiq Baasata hinaspa mirayninkunata mana allin pasananmanta. Jehuqa karqa Hananipa churinmi. Willachirqaqa Jehova Diospa qayllanpi tukuy mana allinkunata Baasa ruwasqanraykum. Payqa mana allin ruwasqankunawanmá Diosta piñachirqa, hinaspapas Jeroboanpa mirayninkuna hinam karqa. Wañurachirqataqmi Jeroboanpa churin Nadabtapas.+
8 Juda nacionpim 26 wataña Asa kamachichkarqa, hinaptinmi Baasapa churin Elaqa Israel nacionta Tirza llaqtamanta kamachiyta qallaykurqa. Payqa kamachirqa iskay watam.
9 Huk kutipim kamachiq Elaqa Tirza llaqtapi Arzapa wasinpi sinkakuspan kachkarqa. Arzaqa karqa Tirza llaqtapi Elapa wasinmanta nanachikuqmi. Chaypi Ela kachkaptinmi yanapaqnin Zimri wañurachiyta munarqa. Zimriqa karqa Elapa wakin carretankunapi riq soldadokunapa kamachiqninmi.
10 Zimriqa wasinman yaykuruspanmi Elata wañurachirqa.+ Chayqa karqa Judapi Asa 27 wataña kamachichkaptinmi. Wañurachispanmi Zimriña kamachiyta qallaykurqa.
11 Kamachiyta qallaykuspallanmi Zimriqa Baasapa llapallan ayllunkunata wañurachirqa. Manam mayqin qaritapas puchurqachu ayllunña utaq riqsinakusqanña kaptinpas.
12 Chaynapimá Zimriqa Baasapa llapallan ayllunkunata wañurachirqa. Chayna kananmantam Jehova Diosqa willachirqaña willakuqnin Jehuwan.+
13 Chaynaqa karqa Baasa chaynataq churin Ela huchallikusqankuraykum hinaspa mana valeq taytacha-mamachakunawan Israel runakunata huchallichispa Jehova Diosta piñachisqankuraykum.+
14 Kamachiq Elapa imayna kawsakusqanmanta hinaspa tukuy ima ruwasqankunamantaqa Israelpi kamachiqkunamanta willakuq libropim qillqasqa kachkan.
15 Judapim 27 wataña Asa kamachichkarqa, chay kutipim Israel soldadokunaqa Filistea runakunapa yachasqan* Guibeton+ llaqtata yaykunankupaq carpankuta sayarachirqaku. Chayna kachkaptinkum Zimriqa Tirza llaqtapi kamachiyta qallaykurqa. Payqa kamachirqa qanchis punchawllam.
16 Chay carpankuta sayachiq Israel soldadokunam uyarirurqaku “Zimrim kamachiq Elata wañurachin” niqta. Chaymi chay soldadokunaqa kamachiqninku Omrita+ churarurqaku Israelta kamachinanpaq.
17 Omriqa llapallan Israel soldadokunapiwanmi Guibeton llaqtamanta rispanku Tirza llaqtata muyurirurqaku.
18 Chay llaqtata munaychakurusqankuta qawaykuspanmi Zimriqa kamachiqpa wasin ukupi pakakururqa, hinaspam wasita kañaykuspan chay ukupi wañururqa.+
19 Chaynaqa karqa Jehova Diospa chiqnisqan kaqkunata ruwaspan Jeroboanta qatipakusqanraykum hinaspa Israel runakunata huchallichisqanraykum.+
20 Kamachiq Zimripa imayna kawsakusqanmanta hinaspa Elata wañuchinanpaq tantiasqanmantaqa Israelpi kamachiqkunamanta willakuq libropim qillqasqa kachkan.
21 Chaymantam Israelqa iskayman rakikururqa. Wakin Israel runakunam karqaku Guinatpa churin Tibniwan, paytam kamachiq kananpaq churaruyta munarqaku. Wakin runakunañataqmi karqaku Omriwan.
22 Ichaqa Omriwan kaqkunam Tibniwan kaqkunata atiparurqaku. Chaymantam Tibni wañururqa, hinaptinmi Omriña kamachiq karqa.
23 Judapim 31 wataña Asa kamachichkarqa, hinaptinmi Omriqa Israelpi kamachiyta qallaykurqa. Kamachirqaqa 12 watam. Tirza llaqtamantam kamachirqa suqta wata.
24 Kamachiq Omrim Samaria urquta rantirurqa Semermanta 68 kilo masnin* qullqiwan. Chaypim llaqtata hatarirachirqa hinaspanmi suticharqa Samariawan*.+ Chaynataqa suticharqa chay urqupa dueñon Semer kasqanraykum.
25 Omriqa Jehova Diospa qayllanpim mana allinkunata ruwarqa, hinaspapas ñawpaq kamachiqkunamanta aswan mana allinraqmi karqa.+
26 Omriqa Nebatpa churin Jeroboan hinam huchallikurqa. Jeroboanqa Israel runakunatam huchallichirqa. Chaynam Omripas mana valeq taytacha-mamachakunawan Israelpa yupaychasqan Jehova Diosta piñachirqa.+
27 Kamachiq Omripa imayna kawsakusqanmanta, imakuna ruwasqanmanta hinaspa peleasqanmantaqa Israelpi kamachiqkunamanta willakuq libropim qillqasqa kachkan.
28 Kamachiq Omri wañukuptinmi pamparurqaku Samaria llaqtapi, hinaptinmi churin Acabña+ kamachiyta qallaykurqa.
29 Judapim 38 wataña Asa kamachichkarqa, hinaptinmi Omripa churin Acabqa Israelpi kamachiyta qallaykurqa. Samaria+ llaqtamantam kamachirqa 22 wata.
30 Omripa churin Acabqa ñawpaq kamachiqkunamantapas aswan mana allinraqmi Jehova Diospa qayllanpiqa karqa.+
31 Acabqa Jeroboanpa hucha ruwasqanmantapas+ aswan mana allintaraqmi ruwarqa. Sidon runakunapa+ kamachiqnin Etbaalpa churin Jezabelwanmi casarakururqa,+ hinaspanmi Baal taytachata yupaycharqa.+
32 Chaymantapas, Acabqa Samaria llaqtapim Baal taytachata yupaychanankupaq wasita ruwarachirqa,+ hinaspam chaypi ruwachirqa Baalpaq altarta.
33 Acabqa sayarachirqataqmi yupaychanankupaq kullutapas.+ Payqa tukuy ruwasqankunawanmi ñawpaq kamachiqkunamantapas astawanraq Jehova Diosta piñachirqa.
34 Acabpa kamachisqan watapim Betel llaqtamanta Hiel sutiyuq runa Jerico llaqtata kaqmanta hatarichirqa. Cimientonta churachiptinmi piwi* churin Abiram wañururqa. Llaqtapa punkunta churachiptinñataqmi sullka kaq churin Segub wañururqa. Chaynaqa karqa Nunpa churin Josueywan Jehova Diospa willachisqanman hinam.+
Willakuykuna
^ Utaq: “Profetan”.
^ Utaq: “Tiyasqan”.
^ Utaq: “Iskay talento”. Qaway B14 kaq yachachikuyta.
^ “Samaria” ninanqa: “Semerpa ayllunmanta kaq”, ninanmi.
^ Utaq: “Punta naceq”.
