1 Reyes 15:1-34
15 Israel naciontam Nebatpa churin Jeroboan 18 wataña kamachichkarqa,+ hinaptinmi Abiyam Juda nacionta kamachiyta qallaykurqa.+
2 Paymi Jerusalen llaqtamanta kimsa wata kamachirqa. Mamanpa sutinmi karqa Maaca,+ payqa karqa Abisalompa willkanmi.
3 Taytanpa huchallikusqanman hinam Abiyampas huchallikurqa. Payqa manam ñawpaq abuelon David hinachu Jehova Diosta tukuy sunqunwan yupaycharqa.
4 Chayna kaptinpas, Jehova Diosqa David kasukusqanraykum+ Jerusalen llaqtapi miraynin kamachinanpaq saqirqa*+ chaynataq Jerusalen llaqta hinalla kananpaqpas.
5 Davidqa Jehova Diospa munasqanman hinam ruwarqa, hinaspapas wañukunankamam Diospa lliw kamachisqanta kasukurqa. Huchallikurqaqa Het kasta Uriasta mana allinta ruwasqallanwanmi.+
6 Reoboamqa Jeroboanwanmi wañukunankama peleayllapi karqa.+
7 Abiyampa imayna kawsakusqanmanta hinaspa tukuy ima ruwasqanmantaqa Judapi kamachiqkunamanta willakuq libropim qillqasqa kachkan.+ Abiyanwan Jeroboanpas peleayllapim karqaku.+
8 Abiyam wañukuptinñataqmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi. Hinaptinmi churin Asaña+ kamachirqa.+
9 Israel naciontam Jeroboan 20 wataña kamachichkarqa, hinaptinmi Asaqa Juda nacionta kamachiyta qallaykurqa.
10 Payqa Jerusalen llaqtamantam 41 wata kamachirqa. Abuelanpa sutinmi karqa Maaca,+ payqa karqa Abisalompa willkanmi.
11 Asaqa ñawpaq abuelon David hinam Jehova Diospa munasqanman hina kawsakurqa.+
12 Payqa taytacha-mamachankuta yupaychaspa qarimasillanwan kakuqkunatam Judamanta qarqururqa.+ Asaqa chinkarachirqataqmi ñawpaq abuelonkunapa ruwasqanku millakuypaq* taytacha-mamachakunatapas.+
13 Abuelan Maacam+ millakuypaq taytachata ruwarachirqa sayachisqa kulluta yupaychanankupaq. Chaymi Asaqa abuelan Maacata kamachiq kasqanmanta qarqururqa. Asaqa chay millakuypaq* taytacha ruwachisqanta hurqurachispanmi+ Cedron wayqupi kañarurqa.+
14 Yupaychanapaq ruwasqa muqukunatam ichaqa mana chinkachirqachu.+ Chaywanpas Asaqa wañukunan punchawkamam tukuy sunqunwan Jehova Diosta yupaycharqa.
15 Asaqa Jehova Diospa wasinmanmi apachimurqa taytanpawan kikinpa sapaqchasqan qurita, qullqita hinaspa serviciokunata.+
16 Asaqa Israelta kamachiq Baasawanmi peleayllapiña karqaku.+
17 Kamachiq Baasaqa Rama llaqtatam allichachirqa*,+ chaynapi Asapa kamachisqan Judamanta pipas mana lluqsinanpaq hinaspa pipas mana yaykunanpaq. Chaynataqa ruwachirqa Juda runakunata chiqnispanmi.+
18 Asaqa Jehova Diospa wasinpi chaynataq kikinpa wasinpi puchuq quritawan qullqitam runankunawan apachirqa Siria nacionta kamachiq+ Ben-adadman. Ben-adadqa yachachkarqa* Damasco llaqtapim. Paypa taytanmi karqa Tabrimon, Tabrimonpa taytanñataqmi karqa Hezion. Asam Ben-adadman willachimurqa:
19 “Taytaymi taytaykiwan contratota ruwarqaku, chaynayá ñuqanchikpas contratota ruwasunchik. Quritawan qullqitam apachimuchkayki. Chaynaqa, Israelta kamachiq Baasawan rimasqaykitayá yanqacharuy, chaynapi manaña imanawananpaq”, nispa.
20 Chaymi Ben-adadqa Asata kasuspan soldadonkunapa kamachiqninkunata kacharqa Israelpi llaqtakunata munaychakamunankupaq. Chaymi munaychakururqaku Ijon llaqtata,+ Dan llaqtata,+ Abel-bet-maaca llaqtata, lliw Kineret lawta hinaspa Neftaliy ayllupa lliw allpanta.
21 Chayta Baasa yacharuspanmi allichachisqan Rama llaqta saqirurqa, hinaspanmi Tirza+ llaqtallapi karqa.
22 Kamachiq Asam Juda runakunata qayarachirqa, hinaspanmi Rama llaqtata allichachinanpaq Baasapa servichikusqan rumikunatawan qirukunata* aparachirqa. Chaywanmi Benjamin ayllupi Gueba llaqtata+ hinaspa Mizpa llaqtata+ allichachirqa*.
23 Kamachiq Asapa imayna kawsakusqanmanta, munayniyuq kasqanmanta, tukuy ima ruwasqanmanta hinaspa llaqtakunata allichachisqanmantaqa* Judapi kamachiqkunamanta willakuq libropim qillqasqa kachkan. Kamachiq Asam yuyaqña kachkaspan chakinwan unqururqa.+
24 Asa wañukuptinmi pamparurqaku ñawpaq abuelonkunapa pampakusqan Davidpa llaqtan sutiyuq llaqtapi. Hinaptinmi churin Jeosafatña+ kamachirqa.
25 Judapim iskay wataña Asa kamachichkarqa, hinaptinmi Jeroboanpa churin Nadab+ Israelpi kamachiyta qallaykurqa. Payqa iskay watam kamachirqa.
26 Nadabqa Jehova Diospa chiqnisqan kaqkunatam ruwarqa. Hinaspapas Israel runakunata huchallichiq taytan Jeroboan hinam+ huchakunata ruwarqa.+
27 Nadabwan llapallan Israel runakunam Filistea runakunapa yachasqan Guibeton llaqtata+ muyurirurqaku. Chaypim Aiyapa churin Baasa chiqnisqanrayku Nadabta wañurachirqa. Aiyaqa karqa Isacar ayllumantam.
28 Juda nacionta kimsa wataña Asa kamachichkaptinmi Baasaqa Nadabta wañurachirqa. Hinaspanmi payña Israelta kamachirqa.
29 Kamachiyta qallaykuspallanmi Baasaqa Jeroboanpa llapallan ayllunkunata wañurachirqa. Manam Jeroboanpa mayqin miraynintapas puchurqachu. Chaynataqa ruwarurqa Jehova Diospa willachisqanman hinam, willachirqaqa Silo llaqtayuq yupaychaqnin Aiyawanmi.+
30 Chaynaqa pasakurqa Jeroboanpa huchankunaraykum hinaspa Israel runakunata huchallichisqanraykum chaynataq Israelpa yupaychasqan Jehova Diosta llumpayta piñachisqanraykum.
31 Nadabpa imayna kawsakusqanmanta hinaspa tukuy ima ruwasqanmantaqa Israelpi kamachiqkunamanta willakuq libropim qillqasqa kachkan.
32 Asaqa Israelta kamachiq Baasawanmi peleayllapiña tukuy tiempo karqa.+
33 Judapim kimsa wataña Asa kamachichkarqa, hinaptinmi Aiyapa churin Baasaqa Israelpi kamachiyta qallaykurqa. Kamachirqaqa Tirza llaqtamantam, payqa 24 watam kamachirqa.+
34 Ichaqa Jehova Diospa chiqnisqan kaqkunatam ruwarqa.+ Kamachiq Baasaqa Israel runakunata huchallichiq Jeroboan hinam huchakunata ruwarqa.+
Willakuykuna
^ Hebreo rimaypiqa nichkan: “Jerusalen llaqtapi achkiynin kananpaq saqirqa”, nispam.
^ Hebreo rimaypiqa yaqachusmi “hatun ispay” niqwan yaqa chaynalla. Chaynataqa imatapas despreciaspallam rimaqku.
^ Hebreo rimaypiqa yaqachusmi “hatun ispay” niqwan yaqa chaynalla. Chaynataqa imatapas despreciaspallam rimaqku.
^ Utaq: “Kaqmanta hatarichirqa”.
^ Utaq: “Tiyachkarqa”.
^ Utaq: “Kaspikunata”.
^ Utaq: “Hatarichirqa”.
^ Utaq: “Hatarichisqanmantaqa”.
