Runakunaqa guerra ruwasqankupim achka qullqita gastanku.

•   The Washington Post sutiyuq periodicopim nin: “Enteron pachapi guerrapi militarkunapa gastonmi chayan 2,2 billones de dolares nisqan qullqiman”, nispa (13 de febrero de 2024).

 Ichaqa manam chayllachu, guerrapiqa achkallay-achka runakunam wañunku. Rimachwanmi Ucrania nacionpi guerramanta.

•   Soldadokuna. Ucrania nacionpim iskay wata guerra kachkan. Chaypim yaqa 500.000 soldadokuna wañunku, wakinqa heridom kachkanku.

•   Llaqta runakuna. Kunankamanqa yaqa 28.000 runakunam wañunku, wakinqa heridom kachkanku. Chaytam ninku Naciones Unidas nisqanku. Chaypi huknin kamachikuq runapas ninmi: “Manam yachanchikchu kay guerra kasqanrayku hayka runa wañusqantaqa utaq ñakarisqantaqa”, nispa. a

 Enteron allpa pachapim achkallay-achka runamasinchikkuna ñakarillachkanku guerra kasqanrayku.

•   114 millon runakunam guerra kasqanrayku llaqtankumanta huklawman ayqikunku, wakinñataqmi tukuy imawan ñakarichkanku. Chayqa septiembre 2023 watamantam.

•   783 millon runakunam guerra kasqanrayku mana mikuyniyuq yarqaypi tarikunku. Programa Mundial de Alimentos nisqanmi nin: “Guerrapa kasqan nacionpim yaqa lliw runakuna mana mikusqa kallanku, chayraykum hatun ñakariypi tarikullanku”, nispa.

 ¿Haykapikamataq guerrakunaqa kanqa? ¿Tukunqachu haykallapipas, icha yanqa rimayllachu? ¿Wakchallaypas yarqaypas tukunqachu? ¿ima nintaq biblia chaymanta?

 Bibliapim nirqaña guerrakuna achka nacionkunapi kananmanta. Chaytam tupachirqa nina kaqlla colorniyuq caballopi sillakuqwan.

•   “Hinaptinmi nina kaqlla colorniyuq caballopas lluqsiramurqa, sillakuqninmi atiyta chaskirqa kay pachamanta hawkayayta chinkachinanpaq, chaynapi runakuna kikinkupura wañuchinakunankupaq, payqa chaskirqataqmi hatun espadatapas” (Apocalipsis 6:4).

 Bibliapitaqmi willakurqa yarqaypas chaynataq unquykunapas kananmanta. Chaytapas tupachirqataqmi iskay caballokunawanraq (Apocalipsis 6:5-8). Chay rikchanachisqa caballokunamanta chaynataq sillakuqninmanta astawan yachayta munaspaykiqa leey “¿Imakunawantaq tupan tawa caballopi sillakuqkunaqa?” niqta.

 Manapas unaymantam manaña kanqañachu guerrakunaqa. Hinaptinmi manaña kanqañachu wakchallaypas nitaq yarqaypas. Chayna kawsakuyqa kanqa Diosllawanmi. Bibliapim nin:

•   Diosqa “kay allpapi wañuchinakuytapas chinkachinmi” (Salmos 46:9).

•   Guerrakuna manaña kaptinqa “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa pasarunñam” (Apocalipsis 21:4).

•   Diosqa niwanchikmi: “Runaykunaqa hawkañam kawsakunqaku, mana pipa imanasqanñam kanqaku, hawkayaypa kanan sitiopim kawsakunqaku, samarinapaq sitiopim kawsakunqaku”, nispa (Isaias 32:18).

 Bibliapa tukuy nisqankuna cumplikusqanwanmi yachanchik guerrakuna chaynataq ima ñakariypas manapas unaymanta manaña kananmanta.

 ¿Imaynatataq Diosqa chayta ruwanqa? Kay allpa pachanchikta kamachiyta qallaykusqanwanmi (Mateo 6:10). Chaymanta astawan yachanaykipaq qaway kay videota: ¿Imaynatam Diosqa allpa pachata kamachimunqa? niqta.