Wañuchisqanku Judio runakunapa ayllunkunam yachaykuyta munanku imanasqa wañuchisqankumanta, munankutaqmi sunqunkuta tiyaykachinatapas. Wakinñataqmi ninku: “Llakipayakuq Dios kaptinqa manachá chayna ñakariypiqa kachwanchu”, nispa.

Wakin runakunam ninku: “Imanasqa Judiokunata wañuchisqankumanta Diosta tapuyqa hucham”, nispanku.

 ¿Chaynachu? Manam, ñawpaqpi Diosman sunqu achka runakunapas tapukurqakum imanasqa ñakariykuna kasqanmanta. Habacuc sutiyuq runapas Diostam kaynata tapukurqa: ‘¿Imanasqataq qawachiwachkanki mana allin ruwaykunataqa? ¿Imanasqataq rikuchiwachkanki sasachakuykunataqa?’, nispa (Habacuc 1:​3 a). Tapukusqanmanta Habacucta qaqchananmantaqa, Jehova Diosqa palabranpim qillqaykachirqa llapallanchik yachananchikpaq.

 Wakin runakunam ninku: “Diostaqa manam imapas qukunchu ñakarisqanchikmantaqa”, nispanku.

 ¿Chaynachu? Manam, Diosqa anchatam llakikun tukuy mana allinkunawan runakuna ñakarisqankuta qawamuspan (Proverbios 6:​16-19). Bibliapim willawanchik Noeypa tiemponpi runakuna tukuy mana allinkuna ruwasqankuta qawamuspan Jehova Diosqa ‘sunqunpi llakikusqanmanta’ (Genesis 6:​5, 6). Judio runakunata pasaq watakunapi llumpayta ñakarichispa wañuchiptinkupas Diosqa anchatam llakikurqa (Malaquias 3:6).

 Wakin runakunam ninku: “Dios castigaptinmi Judio runakunataqa wañuchirqaku”, nispanku.

 ¿Chaynachu? Manam, Roma nacionmanta soldadokuna Jerusalen llaqtata kañarusqankumanta qipataqa Jehova Diosqa manam mayqin llaqtatapas castigarqachu nitaq mayqinmanpas sayapakurqachu (Mateo 23:37–24:2). Jehova Diosqa Judio runakunatapas chaynataq mana Judio runakunatapas llapankutam llakipayan (Romanos 10:​12).

 Wakin runakunam ninku: “Diosqa mana atiyniyuq hinaspa mana kuyakuq kasqanraykum Judio runakunata wañuchinankuta saqirqa”, nispanku.

 ¿Chaynachu? Manam, Jehova Diosqa wakinpim saqin ñakarinanchikta ichaqa manam payqa pitapas ñakarichinchu (Santiago 1:13; 5:11).

 Bibliapim niwanchik runakunaqa imanasqa ñakarisqanchikmanta, niwanchiktaqmi kay pachata diablo kamachisqanrayku ñakarisqanchikmantapas (Lucas 4:​1, 2, 6; Juan 12:31). Chaymanta allinta entiendenapaq qatiqninpi yachaykusun.

1.   Diosqa runatam kikinmanta tantiakuqta unancharqa. Diosqa Adanman hinaspa Evamanmi kamachikuyninta qurqa ichaqa manam obligarqachu kasukunankupaqqa. Adanwan Evaqa kikinkumantam tantiakunanku karqa “allin kaqta utaq mana allin kaqta” ruwanankupaqqa. Mana kasukusqankuraykum llumpay sasachakuy qallaykurqa (Genesis 2:17; 3:6; Romanos 5:12). Chaymantapacham paykunapas hinaspa mirayninkunapas ñakariyta qallaykurqaku. Huk qillqapipas ninmi: “Runaqa sunqunpa munasqallanta ruwasqanraykum ima sasachakuymanpas wichiykuspa llumpayta ñakarin”, nispa (Declaración de principios del judaísmo conservador). Chayna kaptinpas Diosqa hinallam saqin runakuna pantasqankumanta cuentata qukunankupaq.

2.   Wañuchisqanku Judio runakunatam Diosqa kawsarichinqa.

   Diosqa niwanchikmi wara-waranqantin runakunata kawsarichimunanmanta, wañuchisqanku Judio runakunatapas kawsarichimunqam. Chaymantapas manañam pipas yuyarinqachu imawanpas ñakarisqankutaqa (Isaias 65:17; Hechos 24:15). ‘Diosqa ancha-anchata runakunata kuyasqanraykum’ llapallan nisqakunata cumplinqa (Juan 3:16).

 Judiokunata wañuchisqanku tiempopi ñakariq runakunam hawkayayta tarirunku Jehova Diospa nisqankunamanta imam kaqta yacharuspanku.