Bibliaqa tukuytam willawanchik Dios kasqanmanta mana iskayrayanapaq. Chaymantapas bibliaqa ninmi Diospi iñinanchikpaqqa manam hukkunapa nisqallankupichu hapipakunanchik, aswanqa kikinchikmi Diosmanta imam kaqta yachananchikpaq kallpanchakunanchik (1 Juan 5:20; Romanos 12:1). ¿Imakunaraykutaq Dios kasqanmanta yachanchik? Kaykunaraykum:

•   Kay allpa pachapi tukuy imapas suma-sumaq ruwasqa kasqanraykum. Bibliapas ninmi: “Wasiqa runapa ruwasqanmi, Diosmi ichaqa tukuy imata ruwarqa”, nispa (Hebreos 3:4). Bibliapa chayna nisqanmantaqa yachaysapa runakunapas manam iskayrayankuchu. a

•   Imayna unanchasqa kasqanchikraykum. Llapallanchikmi kusisqa kawsakuyta munanchik, chayna kawsakuytaqa munanchik chayna sunquyuqta Dios unanchawasqanchikraykum. Ichaqa kusisqa kawsakunapaqqa manam mikusqa hinaspa pachasqa kayllamantachu, aswanqa kusisqaqa kanchik Diosta riqsispallam, bibliapas ninmi: “Mayna kusisqam Diosta maskaqkunaqa”, nispa. Kusisqa kawsakuyta munaspaqa Diostam kasukunanchik (Mateo 5:3; Apocalipsis 4:11). Yaqa lliw runam Diostaqa maskanchik kusisqa kayta munasqanchikrayku, chaymantapas kuyakuq Diosninchikqa paymanta yachay munaqtam unanchawarqanchik (Mateo 4:4).

•   Bibliapa nisqankuna cumplikusqanraykum nichwan bibliaqa mana runakunallapa qillqasqan kasqanta aswanqa Diosmanta kasqanta (2 Pedro 1:21).

•   Bibliapa nisqan yachaysapa runakunapa nisqankuwan tupasqanraykum. Ñawpaqtam runakunaqa niqku kay allpa pachanchikqa elefantepa, monte kuchipa, toropa utaq huk rikchaq animalpa hawanpi kasqanta. Bibliam ichaqa nirqaña kay allpa pachanchikqa “mana imapa hawanpi” kasqanta (Job 26:7, Chuya Qellqa, CQ). Chaymantapas bibliaqa nirqañam kay allpa pachanchikqa “ruyrunpa” kasqanta (Isaias 40:22, CQ). Tukuy kaykunataqa manam biblia qillqaqkunaqa kikillankumantaqa yachayta atinmankuchu karqa. Chayraykum achka runakuna ninku Dioslla tukuy chaykunata willasqanmanta.

•   Bibliapiqa yachachwantaqmi runamasinchikkunapa tapukusqankumantapas. Paykunam ninku: “Diosqa kuyakuq hinaspa tukuy atiyniyuq kachkaptinqa, ¿imanasqataq kan mana allin ruwaykuna hinaspa ñakariykuna? ¿Imanasqataq religionkunaqa runakunata sasachan?”, nispa (Tito 1:16). Kaykunamanta hinaspa huk tapukuykunamanta yachayqa yanapasunkim Diospi iñinaykipaq.