Apostol Pablom qillqarqa: ‘Allin kaqta ruwayta munaptiypas mana allin kaqta ruway munaymi ñuqapi kachkan’, nispa (Romanos 7:21). ¿Haykallanpipas Pablo hina tarikurqankichu? Chayna kaptinqa, kay yachachikuymi yanapasunki mana allin ruwayman mana chaylla wichiykunaykipaq.

•  Kaytam yachanayki

•  Kaytam ruwawaq

•  Wakin musu-sipaskunam ninku

 Mana allinkunata ruwanaykipaq pipas hikutasuptikiqa huchapakuyman wichiykunaykipaqmi tentasqa kawaq. Bibliapiqa ninmi: “Mana allin kawsakuq runakunawan hukllawakuspaykichikqa allin kaqkuna ruwasqaykichiktam saqirunkichik”, nispa (1 Corintios 15:33). Pipas hikutasuptikiqa utaq televisionpi sumaqllataña imatapas niptinkuqa yaqapaschá sunquykipi chaykuna ruwayta munawaq utaq achkallaña kasqankurayku qampas paykuna hina mana allin ruwaytaña munawaq (Exodo 23:2).

 Jeremym nin: “Allinpaq qawawananchikta utaq amistadninkupaq hapiwananchikta munaspanchikmi paykuna hinaña imatapas ruwayta qallaykuchwan”, nispa.

 Kaypi yuyaymanay: Sichu llumpayta preocupakunki qanmanta hukkuna ima ninanta hinaspaqa ¿atinkichu ima tentaciontapas qipanchayta? (Proverbios 29:25).

 Mana qunqanaykipaq: Amayá llamkaqmasikikunapa utaq estudiaqmasikikunapa hikutasusqaykiraykuqa Diospa kamachikuyninkunataqa qipanchaychu.

 Amayá iskayrayaychu imapas creesqaykimantaqa. Imapas creesqaykimanta iskayrayaspaqa hukkunapa makinpi pukllana hinam kawaq. Bibliapa kayna nisqanta kasukuynikim ancha allinqa kanman, ninmi: “Tukuy imamantayá allinta yachaychik, hinaspayá allin kaqkunata hinalla ruwaychik”, nispa (1 Tesalonicenses 5:21). Imapi creesqaykikunamanta allinta yachaspaykiqa atinkim Diospa kamachisqankunata kasukuyta hinaspa ima tentaciontapas qipanchayta.

 Kaypi yuyaymanay: ¿Imanasqataq allinnikipaq kanman Diospa kamachisqankunata kasukuynikiqa?

 Kimberlym nin: “Cuentatam qukuruni creesqaykunaman hina kawsakuptiyqa hinaspa ima tentacionmanpas mana chaylla wichiykuptiyqa hukkuna astawan respetawasqanta”, nispa.

 Bibliam willawanchik Danielmanta, payqa qatipakunapaqmi. Danielqa musullaraq kachkaspanchusmi “sunqunpi” tantiakururqa Diospa kamachikuyninkunata kasukunanpaq (Daniel 1:8).

 Cuentata qukuy imakunawan chaylla aysachikusqaykita. Bibliapim riman “musu-sipaskunapa munapayasqankumanta”, musu-sipasyasqankupim chay munapayasqankuqa llumpay kanman (2 Timoteo 2:22). Chay munapayasqankuqa manam qariwan utaq warmiwan puñuy munayllachu, kanmantaqmi hukkunapa allin qawasqan kay munaypas chaynataq manaraq listo kachkaspa sapallankuña yachay munaypas.

 Yuyaymanay bibliapa kayna nisqanpi: “Pipas sasachakuypiqa tarikun munasqankunawan aysachikuspanmi hinaspa apachikuspanmi”, nispa (Santiago 1:14). ¿Ima munapayasqaykiwantaq chaylla aysarachikuwaq?

 Sylviam nin: “Riqsikunaykim imakuna tentasusqaykita. Chay tentacionkunaman mana wichiykunaykipaq yachachikuykunata maskay hinaspa cuadernoykipi anotay yanapasunaykipaq hina kaqkunata. Hinaspaqa yachankiñam qipakunaman chay tentacion kaptin mana chaylla wichiykunaykipaq imakuna ruwayta”, nispa.

 Bibliam willawanchik Davidmanta, payqa qatipakunapaqmi. Wakinpim Davidqa hukkunapa hikutasqanta ruwarqa utaq sunqunpa munasqanta ruwarqa. Chaywanpas Davidqa pantasqankunamanta cuentata qukuspanmi kallpanchakurqa allin kaqkunataña ruwananpaq. Mañakuspanmi Jehova Diosta kaynata nirqa: “Dioslláy, chuya sunqu kanaypaqyá yanapaykullaway. Haykapipas sunqumanta allin kaqta ruwanaypaqyá yanapaykullaway”, nispa (Salmos 51:10).

 Qanmantam ima tentacionkuna qipanchayqa. Bibliapim nin: “Amayá mana allinwanqa vencechikuychu”, nispa (Romanos 12:21). Chay ninanqa tentacionkunawan mana vencechikuymi. Allin kaqkunata ruwanaykipaqqa kikikim tantiakuwaq.

 Kaypi yuyaymanay: ¿Imam yanapasunkiman ima mana allintapas ruwanaykipaq tentasqa kaspayki allin kaqtaña ruwanaykipaq?

 Sofiam nin: “Chay tentacionkunaman wichiykuspa imayna sientekunaypim piensani. Nikunim: ‘Chayta ruwaruspayqa ¿aswan allinchu sientekusaq? Yaqapaschá huk ratolla allin kasaq. Chaymanta qipakunamanqa ¿allinchu sientekusaq? Manam, aswanqa pasaypaq mana allinmi sientekusaq. Chaynaqa, ¿allinchu chaykunawan aysachikuyniy? Manamriki’”, nispa.

 Bibliam willawanchik Pablomanta, payqa qatipakunapaqmi. Pabloqa riqsikurqam mana allinkunawan aysachikusqanta, chaywanpas controlakuytam atirqa. Kikinmi nirqa cuerponta controlasqanta hinaspa sirvienteta hina kamachisqanta (1 Corintios 9:27).

 Mana qunqanaykipaq: Tentacionkunata imayna atipaynikiqa qanmantam kanqa.

 Yuyariy, ima tentacionpas pasaruqllam. 20 watayuq Melissam nin: “Sipaschallaraq kaptiy tentacionkunaqa kunanqa manam imapaschu”, nispa. Ninraqmi: “Chaywanmi piensani kunan tentacionkunapas mana wiñaypaq kananta. Qipa punchawkunaman yuyarispaymi nisaq chay tentacionkuna qipanchayniyqa allin kasqanta”, nispa.