“Chaymantam Dios nirqa: ‘Runatayá ruwasunchik ñuqanchikman rikchakuqta, paypa makinpiyá kachun yakupi challwakuna, alton pawaqkuna, uywa animalkuna chaynataq qasqunpa puriq animalkunapas. Makinpitaqyá kachun allpa pachapas’”, nispa (Genesis 1:26, Musuq allpa pachapi kawsaqkunapaq biblia).

 ‘Chaymantam Dios nirqa: “Runata ruwasun ñuqanchikman rikchakuqta, ñuqanchik kaqllata; challwakunapi, alton pawaq animalkunapi, qasqunpa puriq urukunapi chaynallataq tukuy rikchaq animalkunapi munaychakunanpaq”’, nispa (Genesis 1:26, Chuya Qellqa 2012).

 Runakunataqa unanchawarqanchik Diosman rikchakuqtam, chaymi Dios imayna kasqanta qatipakuyta atichwan. Payqa kuyakuqmi, llakipayakuqmi hinaspa allin ruwaqmi, chaymi payman rikchakuqta unanchawasqanchikrayku chayna kayta atichwan.

 ‘Diosmi nirqa: “Runatayá ruwasunchik ñuqanchikman rikchakuqta”’, nispa. Manaraq imatapas unanchachkaspanmi Jehova a Diosqa Jesusta puntata unancharqa, payqa atiyniyuq angelmi karqa. Chaymi ‘tukuy imakunatapas Diosqa churinwan unancharqa hanaq pachapipas chaynataq kay pachapipas’ (Colosenses 1:16). Jesusqa taytan Jehova kaqllañam imayna kayninpipas. “Churinqa mana rikuy atina Diospa rikchayninmi” (Colosenses 1:15). Chaymi Diosqa churin Jesusta nirqa: “Runatayá ruwasunchik ñuqanchikman rikchakuqta”, nispa.

 “Paypa makinpiyá kachun […] uywa animalkuna” chaynataq “qasqunpa puriq animalkunapas”. Diosqa animalkunataqa manam payman rikchakuqtachu unancharqa. Manataqmi runakuna hinachu unanchasqa karqaku. Animalkunaqariki mana concienciayuqmi, mana kuyakuqmi. Chaywanpas Jehova Diosqa munanmi animalkunaqa allin cuidasqa kanankuta. Chaymi Diosqa nirqa animalkunaqa ‘runapa makinpi kananpaq’. Chuya Qellqa bibliapipas “munaychakunanpaq” ninmi. Chayna nisqanwanqa Jehova Diosqa runakunataqa kamachirqa animalkunata cuidananpaqmi (Salmos 8:6-8; Proverbios 12:10). Jehova Diosqa munan runakuna kay allpa pachata cuidanankuta chaynataq tukuy rikchaq animalkunatapas cuidanankutam.

 Genesis libropa punta kaq hinaspa iskay capitulonkunam willawanchik kay pachapi kawsaqkuna hinaspa cielopi kaqkuna imayna unanchasqa kasqanmanta. Jehova Diospa tukuy ima unanchasqankunaqa suma-sumaqmi, runakunatam ichaqa aswan admirakuypaqta unanchawarqanchik. Jehova Diosqa tukuyta unanchayta tukuruspanmi “tukuy ima ruwasqanta qawarqa, hinaptinmi chay ruwasqankunaqa suma-sumaq karqa” (Genesis 1:31).

 Genesis libropi Diospa unanchasqankunamanta astawan yachanaykipaq qawaykuy kay videota.

 Hukkunam ninku: “Genesis 1:26 nisqanwanmi yachanchik Jesusqa Dios kasqanta”, nispanku.

 ¿Chaynachu kanman?: Dioswan Jesusqa anchatam kuyanakunku, chaywanpas Diosqa churin Jesuswanqa manam chaynallachu kanku. Jesusmi yachachirqa taytanqa paymanta aswan atiyniyuq kasqanta (Juan 14:28). Chaykunamanta astawan yachayta munaspaykiqa qaway ¿Jesusqa tayta Dioschu? Sutiyuq videota utaq leey ¿Imanasqataq Jesustaqa ninku: “Diospa churin”, nispanku? niqta.

 Genesis libro imamanta rimasqanta yachanaykipaq kay videota qawaykuy.