Ashca llactaunai gobiernoguna runaunara mandanushca shuj runaunama mana mayanllanuchu shinallara mana tandarinuchu. Jehovahuaj testigoguna cai mandashcaunara pactachingaj munanchi shinajpi ñucanchi tandarinaunara mana saquina munanchichu. Chimanda congregacionguna Zoom nishca aplicaciongunara utilizanun videoconferenciamanda tandaringaj.

 Ñucanchi tandarinaunara caran semana charisha catingaj, Jehovahuaj Testigogunara Cuiraj Muntun mandaca cuyashca cullqui partihua cuentas de Zoom nishcara congregaciongunaj randingahua. Maican congregaciongunara cai ashcara yanapashcami, cai cuentasgunamanda shu 15, 20 dólares yali valin shinajpi pagangaj cullquira mana charinun. Chimanda cai congregacionguna gratis aplicaciongunara utilizaj anuca shinajpi mana ashcauna tandarinai icuna ushanun astaumbas mana seguro an. Organizacionmanda pagashca Zoom cuentasgunara utilizaj congregacionguna ali ricuna ushanun tandarinai icushcauna seguro ashcara shinallara ashca runauna chi ratullai tandarinai icuna ushanun. Cunagama 65.000 yali congregacionguna, 170 yali llactaunai cai cuentasgunara utilizanun.

 Manado (provincia de Célebes Septentrional, Indonesia) llactai Kairagui congregación, gratis aplicacionmanda ñucanchi organización pagashca Zoom cuentama turcarica. Huauqui Hadi Santoso nin: “Maican tecnología mana ashca yachaj huauquiunas ñucanchi tandarinaunamanda gustana ushanun, tandariushcai ña mana ashca cuti icuna ashcamanda”.

 Léster Jijón churi, Guayaquil (Ecuador) llactai, Guyacanes Oeste congregacionmanda tandarijcunara cuiraj huauqui nin: “Huauquiuna mana ashca cullqui charishcamanda, ashca congregacionguna mana charina ushanushca Zoom cuentara pagangaj, tucui congregacionguna chi ratullai tandarina ushanuchu. Shinajpi ñucanchi organizacionmanda shu Zoom cuentara charina ushanchi chi ratullai ashcauna tandarinai icunuchu. Cuna ashca runaunara cumbirana ushanchi ñucanchi tandarinaunama icungaj tandarinai ashcauna icuna ushashcamanda”.

 Jhonson Mwanza, Lusaka (Zambia) llactai Norte Ngwerere congregacionmanda huauqui quillcaca: “Ashca cuti huaquin huauquiuna ninushca: ‘Organizacionmanda pagashca Zoom ñucanchi huauquiunajma mayanlla sintichingaj yanapan shinallara Jehová ñucanchira llaquishcara ricuchin’”.

 Cai Zoom cuentasgunara randingaj ministishcai yanapanamanda huacachishca cullquira utilizashcanchi. Cai cullqui intiru mundui Bibliamanda yachachingaj cuyashca cullquimanda charinchi. Ashca runauna Internetpi donate.jw.org nishca puistui cullquira cuyanun. Ashca pagarachu canguna cuyashca cullquimanda, chi cullquihua intiru mundui ministirishcai yanapangaj utilizanchi (2 Corintios 8:14).