Bibliamanda pandara yachachishcamanda ashca runauna iglesiaunama mana rinun. Chiraigu Jehovahuaj testigoguna tandarinama ¿imarashara rina angui? Chibiga ¿ima tunu yanapaira tupangui?

Gustu llaquij runaunara tupangui. Apostolguna timpui, Jesús yachachiscauna o catijcuna, Yaya Diosta parijulla adorangahua, Diospa Shimira yachangahua, paigunapura cushi tucungahuas tandarij anuca (Hebreos 10:24, 25). Shina rasha gustu amigopuralla llaquinushcapuralla tiaj anuca (2 Tesalonicenses 1:3; 3 Juan 14,  15). Ñucanchi shinallara rashcamanda cushiyanchi.

Biblia mandashcara imasna pactachingahua yachanguimi. Biblia yachachishca cuintaga cariuna, huarmiuna, huahuaunas tandarinchimi. Bibliamanda ali yachachijcunara uyangaj tandarinchi, imasna tucui punzhauna Yaya Dios mandashcara pactachingaj yachangahua (Deuteronomio 31:12; Rashcauna [Hechos] 15:30-32). Rimana partii, tucui tandarishcauna maquira aisasha rimana ushanun. Shinallara cantana huras pactamujpi cantana ushanun. Shina rasha Yaya Diosta alabanun (Hebreos 13:15).

Camba quirinara shinzhiyachinguimi. Apóstol Pabloga pai timpui shuj tandarijcunama casnami nica: “Cangunara ricusha nini [...] ñuca cangunahua parijumanda cushi tucungaj, ñucanchi ishquindi quirishcai, canguna quirishca ñuca quirishcas” (Romanos 1:11, 12). Huauquiunahua, paniunahuas tandarina ucui tiasha ñucanchi fe shinzhiyan, shinallara ali ranara munais charishun.

Candas cumbiranchi ñucanchi tandarinama shamuchu, shamujpiga ñucanchi cushiyashunmi. Cullquira mana mañanchichu.

• Ñucanchi tandarinaunaga ¿imasnara an?

• Ñucanchi tandarinama shamushaga ¿ima tunu yanapaira tupangui?