Caran shuj quiquin munashca cuinta alichirinun churarinun. Bibliamanda iyaiguna rimashcasna catisha ñucanchi munashcasna churarishas Jehová Diosta cushiyachina ushanchi. Bibliamanda huaquin iyaigunara estudiashunchi.

1. ¿Maican camachishcauna yanapanga ñucanchi churarinai alichirinais?

Diosta quirij ajllana an ‘ali tunu churarinara, ali quillparinara, ali iyaihua’. Astaumbas tucui huras limpio ana an “Diosta aduraj” ajta ricuchingaj (1 Timoteo 2:9, 10, TNM). Ricushun Bibliamanda chuscu iyaigunara. 1) ‘Ali tunura churarina’ anchi. Diospa llactai caran tunu sami churarishcauna tian tandarinaunai ricushcasna shinajpis ñucanchi churarina paiñanas Diosta respetashcara ricuchin. 2) “Ali quillparisha” churarina anchi. Dai churarisha ucha iyaigunara charinuchu rurachishun o ñucanchillara yapajta gustachishun. 3) “Ali iyaihua” churarisha caran timpui maicans mushuj llucchishca churarinaunara paiñanaunaras mana catinchi. 4) “Diosta aduraj” ashcara ricuchingaj ñucanchi ali churarina alichirinas anchi, runauna ñucanchi ali churarinara ricusha ñucanchi sirtu Diosta adurashcara yachanunga (1 Corintios 10:31).

2. ¿Imarasha ñucanchi huauqui paniunai iyarina anchi churarinara ajllangahua?

Caran shuj imasna churarinara ajllana dirichura charinchimi. Shinajpis shujcunara mana pandachingahua ali iyarisha churarina alichirinas anchi. Ursarina anchi shujcunara ama manali sintichingahua. Cai camachishcara catinchi: “Ñucanchimanda caran duiñu paihua mayambi causajta cushiyachichu ali ranahua, paita shinzhiyachingaj” (leai Romanos 15:1, 2).

3. ¿Imasnara ñucanchi imasna churarishca shujcunaras Jehovamanda yachana munaira charingaj yanapanga?

Caran tunu ruranaunai ministishca churarinaunara churarinchi. Shinajpis tandarinama ringaj Bibliamanda yachachingahua ringajpas mas ali riparashca iyaihua churarina anchi. Dios partimanda ali gustu cuintashcaunara runauna uyanuchu ‘tucuibi ñucanchira Quishpichij Diospa yachachinara ali sumajyachichu’ munanchi (Tito 2:10).

 MAS YACHAI

4. Ali churarina alichirinas Jehová Diosta respetashcara ricuchin

¿Imarasha sumajta churarina alichirinas anchi? Leaichi Salmo 47:2, huasha catij tapuigunamanda rimaichi:

• Ñucanchi alichishcara churarishcaras ricusha ¿imara runauna Jehová Diosmanda iyanunga?

• Can ¿imara ningui, tandarinama ringahua Bibliamanda yachachingahua ringajpas churarinara alichirinaras ali ricuna ashcara? ¿Imarasha can shina iyangui?

 5. ¿Imasnara ali ajllana ushanchi ñucanchi churarinara alichirinaras?

VIDEORA ricuichi.

Churarina ansalla o ashca valij ajpis sumaj tacsashca ali ricurinas an. Leaichi 1 Corintios 10:24; 1 Timoteo 2:9, 10. Huasha catij tapuigunamanda rimaichi:

• ¿Imarasha mana churarinalla anchi ima tunu churarinaunara?

• ¿Imarasha yapa dai churarinara mana churarina anchi?

Moisesma cushca Leyra ñucanchi ña mana casuna ajpis ñucanchira iyachinmi ima Jehová Dios iyashcara. Leaichi Deuteronomio 22:5, huasha catij tapuimanda rimaichi:

• ¿Huarmi, cari shina ricuringaj churarina alichu an? ¿Cari, huarmi shina ricuringaj churarina alichu an? ¿Imarasha shina iyangui?

Leaichi 1 Corintios 10:32, 33; 1 Juan 2:15, 16, huasha catij tapuigunamanda rimaichi:

• Ñucanchi causaushca lugarbi congregaciombis ñucanchi churarinara alichirinaras manali ricunujpi ¿imara rurana anchi?

• Can causaushca lugarbi ¿ima tunu churarina alichirinas tian?

• ¿Diosta sirvij casna tunu alichirina churarinas alichu? ¿Imarasha can casna iyangui?

 IMARA YACHASHCANGUI

Ñucanchi imasna churarinara alichirinaras ali ajllasha Jehová Diosta shujcunaras respetashcara ricuchinchi.

Iyaringaj

• ¿Imasnara Jehová munan ñucanchi churarichu alichirichumbas?

• ¿Maican Bibliamanda iyaiguna ñucanchira yanapanga ali churaringahua alichiringahuas?

• ¿Imasnara runaunara yanapanga ñucanchi ali churarina alichirinas Jehovara adurana munaira charinuchu?