1. ¿Imarashara angelgunamanda yachana anchi?

ANGELGUNA Diospa aillu anunmi. Bibliaga paigunara “Diospa churiuna” nin (Job 38:7). Chiraigu Yaya Dios ñucanchi paihua aillura ricsichu munan. ¿Imara ruranun angelguna? ¿Imasna runaunara pasashca punzhaunai yanapanushca? ¿Cunan punzhai yanapana ushanun? (Nota 8 ricungui).

2. a) ¿Pita angelgunara rurarca? b) ¿Masna angelguna tian?

² Ñaupa punda yachana anchi pita angelgunara rurarca. Colosenses 1:16 nin Jehová Dios ñaupa punda Jesusta rurashca, chi huasha “tucuira paihuajllai rashca anauca, ahua pachai tiajcunara cai pachai tiajcunaras”. Chigunapura angelguna tianun. ¿Masna angelguna rurashca? Bibliaga nin ashca huaranga huaranga angelguna tian (Salmo 103:20; Ricuchina 5:11).

3. ¿Imara nin Job 38:​4-7 angelgunamanda?

³ Bibliaga nin Yaya Dios manara Allpara rurashcallaira angelgunara rurarca. Paigunaga ¿imasna sintirinuca Yaya Dios Allpara rurashcara ricusha? Job libroga nin paiguna ashca cushiyanuca. Tucui angelguna gunlla shu aillu cuinta Jehová Diosta sirvij anuca (Job 38:​4-7).

4. ¿Imasnara yachashun angelgunaga runaunara yanapana munanun?

⁴ Tucui huras runaunara yanapangaj, Jehová munaira imasnara cai Allpai pactaringaraun angelguna yachana  munanushca (Proverbios 8:​30, 31; 1 Pedro 1:​11, 12). Adán Evahua Dioshua cuntra tucushcai, angelguna ashca llaquirinuca. Cunan runauna Diosta mana casushcara ricusha mas llaquirishca sintirinun. Shinajpi shu runa aripintirijpi, Diosma tigrashcara ricusha ashca cushiyanunmi (Lucas 15:10). Angelguna purunturishca anun Diosta sirvijcunara yanapangaj (Hebreos 1:​7, 14). Ricushun imasna yanapanun.

5. ¿Imasnara angelguna Diosta sirvijcunara yanapanuca pasashca punzhaunai?

 ⁵ Jehová Dios ishqui angelgunara cachamuca Lotta paihua familiaras Sodoma, Gomora llacta manara tucuchishcallaira quishpichingahua (Génesis 19:​15, 16). Ashca huata huasha, profeta Daniel liunguna tiashca uctui shitashca tucuca. Shinajpi pai mana imas tucuca, “Dios paihua angelda cachamuca liunguna shimira tapangaj” (Daniel 6:22). Jesuspa punzhaunai Yaya Dios shu angelda cachamuca apóstol Pedrora carcelmanda llucchingaj (Rashcauna 12:​6-11). Jesús cai Allpai tiashcai angelguna paita yanapanuca. Shinallara bautisarishca huasha, “angelguna paita sirvinauca” (Marcos 1:13). Astaun manara huañushcaira shu ángel ricurimuca “paita shinzhiyachingaj” (Lucas 22:43).

6. a) Cunan punzhai ¿imasnara yachanchi angelguna Diosta sirvijcunara yanapashcara? b) ¿Ima tapuigunara cutipangaraunchi?

⁶ Runauna ñaupai angelguna ña mana ricurimunun. Shinajpi Yaya Dios paita sirvijcunara angelgunahua yanapanmi. Bibliaga nin: “Jehovahua ángel paita manzhajcunara muyurisha cuiraun, paigunara quishpichinmi” (Salmo 34:7). ¿Imamanda cuirarina anchi? Ñucanchira milli ushayuj chijnijcuna llaquichina munanun. ¿Piguna anun? ¿Maimanda shamunuca? ¿Imasnara ñucanchira llaquichina munanun? Yachangahua ricushun imara tucuca Adanda Evaras rurashca huasha.

7. ¿Imara Satanás ashca runaunahua rurashca?

⁷ Tema 3​pi yachashcanchi shu ángel Diosta cuntra tucusha, runaunara mandangahua munaca. Biblia yachachin chi ángel Supai Satanás nishcami an (Ricuchina 12:9). Shinallara Satanás munaca runaunas Diosta  cuntra tucunuchu. Evara umachishcamanda runaunara umachisha catin. Shinasha ashca runauna Jehová Diosta casuj anuca Abel, Enoc, Noé cuinta (Hebreos 11:​4, 5, 7).

8. a) ¿Imasnara angelguna supai tucunuca? b) ¿Imara supaiguna ruranuca atun tamiamanda quishpiringaj?

⁸ Noé punzhaunai huaquin angelguna Dioshua cuntra tucunuca, ahua pachai causanara saquisha cai Allpama runauna cuinta causangaj shamunuca. ¿Imarasha? Bibliaga nin paiguna huarmiuna charingaj munanuca (leapai Génesis 6:2). Chita paiguna mana rurana anuca (Judas 6). Chi manali angelguna cuinta chi punzhaunai runauna milli tucunuca. Jehová Dios intiru mundui shu atun tamia apamusha chi manalira rajcunara tucuchica. Shinajpi paihua casuj sirvijcunara quishpichicami (Génesis 7:​17, 23). Cai atun tamiamanda quishpingahua chi cuntra angelgunaga ahua pachama tigranuca. Bibliaga chi manali angelgunara nin ‘supaiguna’. Paiguna Satanashua llutarisha mana casuj tucunuca, Satanás paihua mandaj tucuca (Mateo 9:34).

9. a) ¿Imara tucuca supaiguna ahua pachama tigrashcai? b) ¿Imara ricushun?

⁹ Supaiguna ahua pachama tigrashcai, Jehová mana saquica cutillara paihua aillu tucuchu (2 Pedro 2:4). Supaiguna runa cuinta tucungaj ña mana ushashaga, ‘intiru mundura umachisha’ catinun (Ricuchina 12:9; 1 Juan 5:19). Ricushun imasna ashca runaunara umachishcara (leapai 2 Corintios 2:11).

10. ¿Imasnara supaiguna runaunara umachinun?

¹⁰ Supaiguna runaunara ashca tunui umachinun. Huaquinguna supaigunallahua cuintanun o shuj runaunamanda supaigunahua cuintanun, shu brujomanda,  shu shamanmanda, o shu yachaj runamandas. Supaigunahua cuintanaras “sagranauna” an. Yaya Dios mana munan ñucanchi supaiguna rashcaunahua masarichu (Gálatas 5:​19-21). Imasnara shu aichara apij runaga animalgunaras tujllaunahua apin, supaiguna huaquin rashcaunahua runaunara umachinun (nota 26 ricungui).

11. a) ¿Imahua supaiguna ñucanchira umachinun? b) ¿Imarasha chita mana rurana anchi?

¹¹ Supaigunaga yachaj runaunahua umachinunmi. Paiguna shamuj punzhauna ima pasanaras o mana ricsishcaras yachangahua, supaiguna ushaihua ruranun. Astaumbas huaquin runauna caita rurangahua estrellagunara ricunun, yachaj runama rinun, velaibi ricunun, cartas del tarot o maquira leanun. Ashca runauna quirinun cai rashcauna ali ashcara, shinajpi yapa mana ali an. Ñucanchira huajlichina ushanmi. Bibliaga nin supaiguna yachaj runaunahua pariju tarbanun. Rashcauna 16:​16-18 nin “shu supai icushca yachaj” shu huarmira yanapaca shamuj punzhauna ima pasanaras yachangahua. Apóstol Pablo chi supaira huarmimanda llucchijpi, paiga chi ushai chingarica.

12. a) ¿Imarashara mana ali an huañushcaunahua cuintaringaj? b) ¿Imarasha Jesusta catijcuna supaiguna rashcaunara mana ruranun?

¹² Supaiguna runaunara umachingaj quirichinun ñucanchi huañushcaunahua cuintana ushashcara. Huañushcauna shuj lugarbi causasha catishcara, ñucanchihua cuintana, yanapana, llaquichina ushashcara quirichingaj munanun. Shu runa paihua aillu o amigo huañujpi huaquimbi yachaj runama rin, paiga huañushcaunahua cuintarij ani nishcaraigu. Yachaj runa cierto yachashcara ninga huañushcamanda o pai cuinta rimana ushanga. Pai yachajma rijpi, huañushcahua cuintashcara quirina ushanga, shinajpi supaigunahua rimanmi  (1 Samuel 28:​3-19). Huaquin runauna huañushcaunara pambangaj ashca ruraigunara ruranun, huañushcauna shuj lugarbi causasha catishcara quirishcaraigu. Huaquinguna istara, huañushcamanda aniversario, huaccha cari o huarmi rashcaras ruranun, huañushcaunara cuyanun, astaumbas huaquin supaiguna rashcaunara velorioibis ruranun. Jesusta catijcuna chi tunu ranaras mana rurashcamanda paihua aillu, vecinogunas camisha rimanun, paigunahua ña mana rimana munanun. Shinajpi Jesusta catijcuna yachanun huañushcauna mana causasha catishcara. Paigunahua mana cuintana ushanchi, ñucanchira yanapana, llaquichina mana ushanunzhu (Salmo 115:17). Ashcara cuiraringui. Huañushcaunahua, supaigunahuas ama cuintarichu, tucui supaiguna rashcaunai ama pandarichu (leapai Deuteronomio 18:​10, 11; Isaías 8:19).

13. Ashca runauna supaigunara manzhajcuna ¿imara rurana ushanushca?

¹³ Supaiguna runaunara mana umachishallara, astaun paigunara manzhachinun. Cunaga Satanás paihua supaigunandi yachanun paiguna “timpu ña pactariupi”. ¿Imarasha? Yaya Dios paigunara manalira rurasha catichu ña mana saquingachu. Chiraigu paiguna mas milli, manali anun (Ricuchina 12:​12, 17). Shinajpi huaranga runauna ñaupa supaigunara manzhasha, cunan ña mana manzhanun. ¿Imara paigunara yanapashca?

14. Jesuspa punzhaunai causashca quirijcuna cuinta, ¿imasnara supaigunamanda anzhurina ushanchi?

¹⁴ Bibliaga yachachin imasnara supaigunamandas cuirarisha anzhurina ushanchi. Jesuspa punzhaunai  huaquin Éfeso llactaibi causajcunaga Jesusta catijcuna manara tucushcallaira, supaiguna rashcaunara ruraj anuca. ¿Imasnara supaigunamanda anzhurinushca? Bibliaga nin: “Ashca sagrana yachajcuna paiguna yachaushca quillcaunara apamusha tucuihua ñaupajpi rupachinauca” (Rashcauna 19:19). Jesusta catijcuna tucungaj munashcamanda tucui paiguna magiamanda libroguna ichunuca. Cunan shinallara rurana anchi. Jehová Diosta sirvingaj tucui supaigunamanda yachashcaras saquinami anchi. Libroguna, quillcauna, horóscopos, peliculaguna, musicara, pujllanauna, o letreroguna maicans ricuchinun supaiguna magiara, o mana quirihuajlla raigunara alimi nisha ricuchu munajta. Shinallara manalimanda quishpiringaj rurashca cosasgunahua, amuletoguna cuinta (1 Corintios 10:21).

15. ¿Imara mas rurana anchi Satanasmanda, supaigunamandas cuiraringahua?

¹⁵ Éfeso llactaibi causajcuna paiguna magiamanda librogunara ansa huata tucuchishca huasha, apóstol Pablo quillcaca paiguna chara shu “macanauna” charinuca “milli supaigunahuas” (Efesios 6:12). Paiguna libroguna ña rupachishca ajpi, supaiguna paigunara chara llaquichingaj munanushca. Shinasha paigunaga, ¿imara mas rurana anuca? Satanasta vinsingahua, Pabloga nica: “Diosta quirina, lurirara [o escudo] cuinta, apaichi” (Efesios 6:16). Imasnara shu escudo shu suldaru runara macanaunai yanapanmi, ñucanchi Diosta quirinara supaigunahua macanaunai yanapangami. Jehová Dios ñucanchira cuirashcara quirisha, Satanás supaigunandi tintashcara vinsingaraunchi (Mateo 17:20).

16. ¿Imara rurana anchi Jehová Diospi mas quiringahua?

¹⁶ ¿Imara rurana anchi Jehová Diospi mas quiringahua? Tucui punzhauna Bibliara leasha, Dios cuirangami  quirina anchi. Jehová Diospi shinzhi quirina charishaga, Satanás supaigunandi ñucanchira mana llaquichina ushanungachu (1 Juan 5:5).

17. ¿Imara mas rurana anchi supaigunamanda cuiraringahua?

¹⁷ Éfeso llactamanda quirijcunaga ¿imara mas rurana anuca? Paiguna llactai sagrana rashcaunahua undashcami aca. Chiraigu Pabloga paigunara nica “tucui huras mañaichi” (Efesios 6:18). Tucui huras Dios cuirahuai nisha mañana anuca. Shinallara ñucanchi, cai milli mundui sagranaunahua undashcami an. Chiraigu Jehová Dios yanapahuai nisha, ñucanchi mañaushcai paihua shutira rimashun (leapai Proverbios 18:10). Jehová Diosta cuti cuti Satanasmanda anzhuchihuai nisha mañajpi, pai ñucanchi mañashcaunara uyangami (Salmo 145:19; Mateo 6:13).

18, 19. a) ¿Imasnara Satanasta paihua supaigunaras vinsina ushanchi? b) ¿Ima tapuira cutipashun shamuj temai?

¹⁸ Tucui supaiguna rashcaunahua mana masarisha, Jehová Dios ñucanchira cuirangami quirijpi, Satanás supaigunandi ñucanchira mana llaquichingachu. Paigunara mana manzhanachu anchi (leapai Santiago 4:​7, 8). Jehová Diosga supaigunamanda mas ushayuj an. Ña ricushcanchi Noé punzhaunai imasna paigunara castigashcara, astaun huasha punzhaunai paigunara tucuchingami (Judas 6). Iyarishun, cai macanaunai mana sapallachu anchi. Jehová paihua angelgunahua yanapanmi (2 Reyes 6:​15-17). Jehová Dios yanapaihua, Satanasta paihua supaigunaras vinsishunchi (1 Pedro 5:​6, 7; 2 Pedro 2:9).

¹⁹ Ña ricushcanchi Satanás supaigunandi runaunara ashca llaquichinun. Chiraigu tapurishcanchichari: “¿Imarasha Yaya Dios paigunara chara mana tucuchishcachu?”. Shamuj temai cai tapuira cutipashun.