Cuerpo Gobernante ichilla muntun an Jehovahuaj testigoguna organizacionda intiru mundui pushaj huauquiuna. Paiguna cai ishqui tarbanara ruranun:

•   Ñucanchi publicaciongunai, tandarinaunai, escuelagunais ima yachachina ashcara ricunun (Lucas 12:42).

•   Intiru mundui Jehovahuaj testigoguna tarbanara pushanun. Cai an, Bibliamanda yachachina, cuyashca cullquira imasna utilizanas.

 Cai Cuerpo Gobernante huauquiuna punda siglo Jerusalembi apostolguna, “cuiraj rucuunas” ejemplora catinun. Tucui Jesusta catijcunaj valij iyaigunara apinuca (Hechos 15:2). Shinajpi paiguna mana apu cuinta sirvij anuca, shinallara cai timpui cai Cuerpo Gobernante huauquiuna tucui huras Bibliara estudianun Jehová pushashcara charingaj, shinallara sirtu quirinun Jehová paihua churi Jesusta ajllashca congregación uma cuinta mandachu (1 Corintios 11:3; Efesios 5:23).

 Cuerpo Gobernante sirvij huauquiuna anun Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane y Jeffrey Winder. Tucui paiguna intiru mundui pushaj oficinai sirvinun Warwick, New York, Estados Unidos llactaibi.

 Intiru mundui ñucanchi tarbanara imasna pactachingaj ricunuchu sucta comité nishcaunara churanushca. Cuerpo Gobernantemanda caran huauqui cai comitegunara yanapan.

•   Comité de Coordinadores. Cai comité sirvij huauquiuna leygunamanda tucushcaunara alichingaj shinallara shinzhi llaquiuna tiajpi yanapangaj ima rurana ashcara ricunun, astaumbas Jehovahuaj testigoguna cungaimanda ima llaqui pasajpi, paiguna Diosta sirvingaj arcanujpi lugar sirvinuchu yanapanun.

•   Comité de Personal. Cai comité intiru mundui Jehovahuaj testigoguna sucursalgunai sirvij huauqui paniuna ministishcara cungaj ricunun.

•   Comité de Publicación. Cai comité Bibliamanda publicaciongunara llucchingaj, shu llactaunama cachangaj ricunun, shinallara ricunun tandarina huasiunara, shuj shimima pasachingaj oficinagunara, Betel oficinagunaras shayachingaj.

•   Comité de Servicio. ‘Dios mandana pacha evangelio ali shimira’ imasna yachachingaj ricunun (Mateo 24:14).

•   Comité de Enseñanza. Cai comité huauquiuna ricunun ñucanchi tandarinaunai, escuelagunai, grabashcaunai, videogunais ima yachachina ashcara.

•   Comité de Redacción. Cai comité huauquiuna puruntunun Bibliamanda publicaciongunai ñucanchi página Internetpi tiaj yachachishcaras shinallara shuj shimima pasachina tarbanara alira rurachu ricunun.

 Cuerpo Gobernantemanda huauquiuna cai comitegunai tarbashas paigunapura caran semana tandarinun ricungaj organizaciombi ima ministishcaunara charin. Chi tandarinaunai Biblia ima nishcara ricusha Diospa espíritu santo paigunara pushachu saquinun. Shina rurasha ursarinun pariju shujlla iyaira apingaj (Hechos 15:25).

 Cai Cuerpo Gobernante yanapajcuna Yaya Diosta chuyaj shungu sirvij huauquiuna anun. Shinallara caran comitegunai mingashca tarbanara ali rurangaj yachanun (1 Corintios 4:2). Cai huauquiuna caran semana comité tandarinaunama rinun. Paiguna iyaigunara mana apishas, cuintashcamanda ali iyaigunara cunun, shinallara apishca iyaira pactarichu ricunun, huasha apishca iyaira pactachishcamanda imasna yanapashcaras ricunun. Astaumbas Cuerpo Gobernante huauquiuna maican huras paigunara shuj llactaunama cachanun Jehovahuaj testigogunara pasiangaj, shinallara huata tandarinaunai, Escuela de Galaad graduacionda rurashcai yachachinuchu mañanun.