Ñucanchiga Biblia ricuchishca cuinta Jesús huañushcara iyarinchi. Cai Jesús huañushcara iyaringaj tandarina, ‘Señorba cena’ shinallara puchucai cena cuinta ricsishca an (1 Corintios 11:20). Shinajpi shuj religionguna Jesús huañushcara iyaringaj quirishcauna, rurashcaunas mana Bibliamanda shamun.

 Jesús ñucanchimanda huañushcara iyaringaj shinallara pagarachushca sintirishcara ricuchingaj tandarinchi (Mateo 20:28; 1 Corintios 11:24). Mana tandarinchi ñucanchi uchaunara perdonashca tucungaj, cai tandarina mana an shu sacramento nishca.  a Biblia yachachin Yaya Dios ñucanchi uchaunara perdonangaj, religionguna rurashcaunara catina randimanda Jesuspi quirishcara ricuchina anchi (Romanos 3:25; 1 Juan 2:1, 2).

 Jesús paita catijcunara mandaca pai huañushcara iyarinuchu, shinajpi mana nica masna cuti rurana anuca (Lucas 22:19). Huaquin runauna quirinun caran quilla rurana ashcara shujcuna ninun caran semana, caran punzha, punzhai huaquin cuti, manasha runa munashca caran cuti. Shinajpi caimanda Biblia ima intindichishcara yachana ministinchi.

 Judioguna Pascua rurana punzhai Jesús mandaca pai huañushca punzhara iyaringaj, huasha chi punzhallai huañuca (Mateo 26:1, 2). Cai mana yangamanda tucuca. Biblia nin Jesús huañushca Pascua quishpichina burigu cuinta an (1 Corintios 5:7, 8). Pascua caran huatai shu cutilla ruraj anuca (Éxodo 12:1-6; Levítico 23:5). Biblia ricuchin punda Jesusta catijcuna Jesús huañushcara iyaringaj caran huata shu cutilla tandarij anuca, chimanda Jehovahuaj testigoguna shinallara ruranchi. b

 Jesús pai huañushcara iyaringaj punda tandarina tunura catisha yachashun masna cuti, shinallara ima punzha, ima hora tandarina anchi. Bibliamanda calendario lunar nishcara catisha, huata 33​pi 14 de nisán Indi icushca huasha Jesús chi tandarinara rurarca (Mateo 26:18-20, 26). Chimanda Jehovahuaj testigoguna caran huata Jesús huañushcara iyaringaj, punda Jesusta catijcuna cuinta chi fechallai tandarinchi. c

 Huata 33​pi 14 de nisán quilla viernes punzha aca, shinajpi caran huatai chi fecha mana viernes punzhallai urman. Caran huatai 14 de nisán ima punzha ashcara yachangaj Jesuspa punzhaunai judioguna calendariora catinchi, mana cuna punzhaunai judioguna catij calendariora. d

 Jesús Pascuamanda punguichina pulvu illaj puchushca tandallara utilizaca cai mushuj tandarinara callarichingaj (Mateo 26:26-28). Chimanda Jehovahuaj testigoguna Jesús huañushcara iyaringaj tanda punguichina pulvu, shujtas mana charin, shinallara vino tinto nishcara utilizanchi imaras mana charin.

 Huaquin religionguna punguichishca tanda utilizanun. Shinajpi Bibliai punguichina pulvu ricuchin, ucha manalira ruranas (Lucas 12:1; 1 Corintios 5:6-8; Gálatas 5:7-9). Chiraigu punguichina pulvu illaj tanda Jesuspa ucha illaj aichara ricuchin (1 Pedro 2:22). Shuj religionguna uvas muyu jugo utilizanun vino randimanda shinajpi shina rurasha mana catinun Biblia ricuchishca cuinta (1 Timoteo 5:23).

 Jesús huañushcara iyaringaj mana punguichishca tanda vinoras ricuchin Jesuspa aicha shinallara paihua yahuardas. Shinajpi tanda, vino mana Jesuspa aicha, yahuar tucun imasna huaquin runauna quirinun. Ricushun imasna Biblia caita intindichin.

•   Jesús paita catijcunara paihua aicha micunuchu, paihua yahuar upinuchu mandajpi Dios yahuarda ama micuchu nisha mandashcara mana casunguichi nisha mandan maca (Génesis 9:4; Hechos 15:28, 29). Shinajpi chita mana tucuna ushaca Jesús Diospa mandashcaunara tucui huras pactachij ashcamanda (Juan 8:28, 29).

•   Apostolguna chi tutai Jesuspa yahuarda mana upinucachu, Jesusllara nica paihua yahuar talishca anga nisha, shina ricuchica huasha huañungaraushcara (Mateo 26:28).

•   Jesús paihua causaira “shu cutillara cuca huiñaigama” (Hebreos 9:25, 26). Jesús huañushcara iyaringaj tandara, vinora caran tandarinai paihua aicha paihua yahuar tucujpi, tandara micuj vinora upijcuna cutillara Jesús huañushca ashcara ricuchinun.

•   Jesús nica: “Caita ranguichi ñucara iyaringaj” mana nicachu “caita ruranguichi cangunamanda cuti huañungaj” (1 Corintios 11:24).

 Maican runauna quirinun tanda, vino Jesuspa aicha, yahuar tucun nisha. Bibliamanda huaquin textoguna shuj shimima pasachishcai manali intindichinushca. Huaquin Bibliagunai vinomanda rimasha nin: “Caimi ñuca yahuar” (Mateo 26:28). Shinajpi maican Bibliagunai cai Jesuspa shimiuna casna churanushca: “Cai nisha nin ñuca yahuar”, “Cai ricuchin ñuca yahuar”. e Caita rimashcai shu ejemplora apisha intindichina munaca (Mateo 13:34, 35).

 Jehovahuaj testigoguna Jesús huañushcara iyariushcai ansaunalla tandara vinora upinun. ¿Imarasha?

 Jesús paihua yahuarda talishcai ‘mushuj pactachina shimira’ callarichica ñaupa Israel llactahua pactachina shimi randimanda (Hebreos 8:10-13). Cai mushuj pactachina shimi partihua ajcuna Jesús huañushcara iyariushcai tandara vinoras upinun. Mana tucui Jesusta catijcuna micuna, upina ushanun astaun ‘cayashca runaunalla’ (Hebreos 9:15; Lucas 22:20). Cai Diosta sirvijcunalla Jesushua ahua pachai mandanunga. Biblia yachachin 144.000 runaunalla ajllashca anun (Lucas 22:28-30; Apocalipsis 5:9, 10; 14:1, 3).

 Cai “ichilla muntun runauna” Jesucristohua mandanunga, randi “ashca atun muntun runauna” huiñaigama cai Allpai causangaj chapanara charinun (Lucas 12:32; Apocalipsis 7:9, 10). Cai Allpai causangaj chapanara charijcuna, tandara vinora mana upinchi, shinajpi Jesús huañushcara iyaringaj tandarisha ñucanchi pagarachushcara ricuchinchi paihua causaira ñucanchimanda cushcaraigu (1 Juan 2:2).