Biblia ricuchin Miguel, Jesús an, maican religiongunai ninun “San Miguel”. Pai Allpama manara shamushcallaira, shinallara ahua pachama tigrashca huasha cai shutillahuara charisha catica. a Biblia ninmi, Moisés huañushca huasha Miguel Satanashua piñaca, shinallara shu angelda yanapaca profeta Danielda Diosmanda cachamushca shimira cungahua (Daniel 10:13, 21; Judas 9). Miguel Jehová mandanara difindin shinallara paita chijnijcunahua macan. Chiraigu chi shutira apana valishca an, cai shuti nisha nin “¿Pita an Yaya Dios cuinta?” (Daniel 12:1; Apocalipsis 12:7, nota).

 Ricushun imarasha rimanchi Jesús, arcángel Miguel ashcara.

•   Miguel “arcángel” an (Judas 9). Arcángel nishca título ricsichin “angelguna atun apu ashcara”, cai título ishqui cuti Bibliai ricurin. Cai ishqui textogunai arcángel nisha shu runamandalla riman, cai intindichin cai título shu angellla apana ushan. Ña causarishca Jesusmanda rimasha, maican cai textomanda nin: “Quiquin Señor ahua pachamanda irgumungami, mandasha caparinahua, atun ángel shimihua” (1 Tesalonicenses 4:16). Cai textoi “atun ángel shimihua” nisha intindichina munan Jesús arcángel Miguel ashcara.

•   Miguel ángel suldaruunara mandaj an. Biblia nin: “Miguel paihua angelgunandi macananauca dragunhua”, cai dragun, Supaimi an (Apocalipsis 12:7). Jesús ahua pachai atun mandanara charin, chimanda Biblia casna nin: “mas valij reyba churi” shinallara, “reyba atun churi” an (Daniel 10:13, 21; 12:1). Cai titulogunamanda rimasha, Mushuj Testamentomanda yachaj runa David Aune nica: “Miguelga ángel suldaruunara mandaj an” nisha.

   Biblia angelgunara mandajmanda rimasha shu shutira cun, nin: “Señor Jesús ahua pachamanda ricurimujpi paihua ushaj angelgunahua, sindij ninahua shamunaunga” (2 Tesalonicenses 1:7, 8; Mateo 16:27). Shinallara 1 Pedro 3:21, 22 nin, Jesús “ahua pachama sicashca asha [...] angelguna, mandajcunas, ushajcunas paita uyanaun”. Yaya Dios mana shutichishcachu ishqui apuunara, angelgunara mandangaj. Cai ricuchin, Jesús, Miguel runallara an.

•   Miguel “shayaringami” “llaqui timpu huraspi” (Daniel 12:1). Daniel libroi “shayarina” shimi intindichina munan shu rey apu atun valij tarbanara rurangaj callarishcara (Daniel 11:2-4, 21). Biblia Jesusta “Diospa Shimi” nisha shutichin, pai “Rey Apuunamanda Rey Apu” cuinta, tucui paihua Yayara chijnijcunara tucuchinga Diospa llactara quishpichingaj (Apocalipsis 19:11-16). Chita ruranga cai Biblia rimashca timpu pactariushcai, “atun turmindarina timpu tiangami, callari hurasmanda pacha mana casna tucushcachu, cuna hurascamas” (Mateo 24:21, 42).