•   ¿Imasnara sintiringui shujcuna manali shimiunara rimanujpi?

  •  Ña yacharishcami ani cai tunu shimiunara uyangaj.

  •  Ansa manali sintirini, shinajpi shina rimasha catinuchu saquini.

  •  Yapa manali ashcara quirini.

•   ¿Manali shimiunara rimanguichu?

  •  Mana ima huras.

  •  Maican huras.

  •  Tucui huras.

•   ¿Can quiringuichu cai manali ashcara?

  •  Mana.

  •  Ari.

 ¿Quiringuichu manali shimiunara rimana sirtu pacha manali ashcara? Can iyanguichari, “mana, ashca mas manali cosasguna tian. Astaumbas cai timpui tucui runauna manali shimiunara rimanun”. Shinajpi, ¿chiga sirtuchu?

 Cai quiringaj shinzhi ajpis, maican runauna ursarinun manali shimiunara mana rimangaj. Ricushun imarasha cai tunu shimiunara mana rimanun.

•  Manali shimiuna mana shimiunalla an. Camba rimashca tunura ricuchin camba shungüi ima charishcara. Manali shimiunara rimasha shujcuna sintishcara mana valichingui. ¿Can quiringuichu cai sirtu ashcara?

   Biblia nin: “Shimimanda llucshij, shungu ucumanda shamun” (Mateo 15:18).

•  Manali shimiunara rimasha shujcuna ñaupai manali saquiringui. Shu libro manali shimiuna rimanara saquingaj nin: “Can rimashca tunu ricuchin ima tunu amigoguna charingui, ima tupugama camba ailluuna, tarbanamanda cumpañajcunas canda respetanunga. Shinallara imasna shujcunahua apanushcara. Astaumbas ricuchin shu tarbana tupanara, tarbanai ima puistu charinara, canda mana ricsij runauna canmanda ima iyashcaras”. Cai libro shinallara camachin: “Tapuri, ¿Ñuca amigoguna manali shimiuna rimanara saquisha mas ali runa tucunungachu?”.

   Biblia nin: “Caparinaunara, milli shimiunara anzhuchichi” (Efesios 4:31).

•  Manali shimiunara rimasha ali, iyayuj runa cuinta mana ricuringuichu. ¡Qué maleducado! nishca librora quillcaj runa nica, runauna irus shimiuna rimajcunara tucui huras uyashcamanda sambayanun, shina rimaj runa “sabiru, ali sintichij shimiunara mana rimanzhu”. Shinallara nin: “Chi tunu rimanara charijpi mana yanapan ali runa angaj”.

   Biblia nin: “Canguna shimimanda ama ima manali shimis llucshichu” (Efesios 4:29).

•  Shu metara churari. Shu intiru quillai manali shimiunara mana rimangaj ursari. Pactachiushcara yachangaj shu calendarioi quillcai. Shinajpi, manali shimiunara saquingaj mana chilla ministingui.

•  Manali shimiunara charij cushiyachij ranaunara saqui. Biblia nin: “Manali runaunahua cumpañausha, ali causanara huajlichin” (1 Corintios 15:33). Cai textoi manali cumpañajcunamanda rimasha mana runaunamandalla intindichina munan, astaun peliculaguna, videojuego nishcauna, canciongunamandas riman. Kenneth 17 huatayuj nin: “Huaquimbi can gustashca cancionda cantangaj callaringui shinashas mana riparangui manali rimaiguna charishcara. Ali uyarishcamandalla gustangui”.

•  Shunguyuj runa ashcara ricuchi. Maicanguna quirinun manali shimiunara rimasha iyayuj runa cuinta ricurishcara. Shinajpi Biblia nin, sirtu iyayuj runa “alira manaliras ricsingaj” ushan (Hebreos 5:14). Shinallara Dios mandashcauna pactachinara mana saquin shujcuna ñaupai ali saquiringajlla.

 Manali shimiuna huairara turuyachij cushni cuinta an. Manali shimiunara rimajpi irus iyaigunara apichin. Ashca runauna shina tucunun. Ñaupa rimashca libro nin, “Ashca ursari shujcunahua ali shimiunahua cuintaringaj, shina rurasha ali sintiringui, shinallara shujcuna canhua cuintarisha ali sintirinunga”.