Áicap Jehová familiát ’ruara, tatasta responsabilidarta ckopucora huaasnincumanta cuidachuncu (Colosenses 3:20). Tata ina, responsabilidarniyqui can huaasniyquita yachachiyta Jehovát munayta, y ckaris y huarmis responsables ’ruacunancúpaj (2 Timoteo 1:5; 3:15). Nátaj, yachanayqui tían imát sonckoncupi apincu. Cháypaj ancha súmaj can ejemplu ima ckopucunqui. Huaasniyquita allít yachachíypaj Diuspa ’Rimayninmanta, huamajpi sonckoyquipi tianan tían (Salmos 40:8).

BIBLIA NISCKANTA: «Uyaríypaj dispuesto tianayqui tían, mana ligerót ’rimáypaj» (Santiago 1:19). Alli can munanayquita ima huaasniyqui mana manchacus tiachuncu ckamhuan ’rimáypaj. Pero cháypaj, ckaachinayqui tían ima túcuy tiempo dispuesto tianqui uyaripucúypaj imajcachun precisaptincuna. Esforsácuy paspi tianancúpaj y socegasckas, atinancúpaj ʼrimayta. (Santiago 3:18). Si paycuna creencu ima sinchi caj ’rinqui o piñacus ’rímaj ’rinqui, mana cierto casckanta nisuyta atincuman. Paciente cay y nipúcuy ima ashcata munacusckayquita (Mateo 3:17; 1 Corintios 8:1).

IMÁT ’RUAYTA ATINQUI:

• Esforsácuy tiáypaj áicap huaasniyqui ckamhuan ’rimayta munancu

• Sapa cutis huaasniyquian ’rímay, manalla problemas tiaptincuna

BIBLIA NISCKANTA: «Pi suj asuntopi ligerót unanchan, allít tárej ’rin» (Proverbios 16:20). Huaquin cutis ckaanayqui tían astaan chackaymanta nisckancunamanta, unancháypaj imata sentincu. Mositus alardesta ’ruayta yachancu o ’rimancu imastis ima mana pensancu. «Áicap pipas suj asuntót contestan, manáraj uyaris, chá paypa partenmanta suj tontera can.» (Proverbios 18:13). Chayraycu ama ligerót piñacuychu (Proverbios 19:11).

IMÁT ʼRUAYTA ATINQUI:

• Anchata esforsácuy upallas tiáypaj huaayqui ’rimaptin y ama piñacuychu nisusckanuan, mana importaspa imachus can

• Yúyay paypa edarninta apiptiyqui imaina senticoranqui, imachus ckámpaj astaan importante cara

BIBLIA NISCKANTA: «Huáay uyáriy, tatayqui reprendesuptin, y ama sackeychu mamáyquip leyninta» (Proverbios 1:8). Jehová tatanta y mamanta autoridarta ckopucora huaasnincu saamanta. Ishcaynincu huaasnincuta yachachinancu tían, casúcoj y respetuosos canancúpaj. (Efesios 6:1-3). Paycuna cuentata ckocuncu áicap tatasnincu mana tiancu «cuscas [...] quiquin layas pensaypi» (1 Corintios 1:10). Chayraycu, si mana quiquin pensanquísh, ama peliayshchu huaasniyquishpi ñauckenpi, chayna respetót ckamcunaraycu chíncaj ’rincu.

IMÁT ’RUAYTA ATINQUI:

• Huasniyquishta reprendéypaj de acuerdo churacuychis

• Si conyugeyquian mana quiquin pensanquísh imaina huaasniyquishta yachachiyta, esforsácuy unancháypaj conyugeyqui pensasckanta

BIBLIA NISCKANTA: «Muchachút yacháchiy conforme ñan páypaj» (Proverbios 22:6). Si huaasniyquita allít yachachiyta munanqui, mana yuyacuptiyquilla yachachicunayqui tían, manape sapa punchau. Suj arreglo ’ruanayqui tían imaina yachachicuyta y reprendecúypaj. (Salmos 127:4; Proverbios 29:17). Reprendeyta manalla can huasquiayta, ni mackacuyta manapé niyta munan yanapacuyta unanchanancúpaj imaraycu tatasnincu nisckancuta casucunancu tían. (Proverbios 28:7). Nátaj, yachachícuy Diuspa ’rimayninta munayta, y atinancuta unanchayta principiustas ima chaypi taricuncu. (Salmos 1:2). Chayna suj alli conciencia ápej ’rincu (Hebreos 5:14).

IMÁT ’RUAYTA ATINQUI:

• Esforsácuy huaasniyqui ckaanancúnapaj Yayát suj yanasu ina pip confiayta atincu

• Yanapácuy yachanancunápaj evitáypaj y rechasáypaj imajcachun ima peligrupi churan moralidarnincuta imaina ckaacun internetpi o redes socialespi. Yachachícuy degeneradusta rechasanancúpaj