1. ¿Ima ancha ’rejsiscka oraciunmanta aprendesúysh?

 ANCHA ashca ashca persunas ’rejsincu oraciun Tata Yayáysh o Señorpa Oraciunnin. Jishu cá oraciunta utilisara yachachíypaj discipulusninta orayta. Jishu cá oraciunpi, ¿imát mañara? ¿Ímaj importante can unanchanayshta cá oraciún nisckanta?

2. ¿Ima quimsa imastis importantes Jishu mañayta yachachiaráysh?

² Jishu nera: «Ckamcuna, chayna oranayquísh tían: ‹Tataycu ima cieluspi tianqui, sutiyqui santificascka cachun. Reinuyqui amuchun. Voluntarniyqui ’ruacuchun, cielupi ina, áshpap saanpipas›» (Mateo 6:9-13 léey). ¿Ímaj Jishu yachachiaráysh orayta mañas cá quimsa imastis? (Ckáay Astaan yacháypaj 20, paginapi 216).

3. Cá capitulopi, ¿imát apréndej ’ríysh?

³ Na aprenderáysh Tata Yáyap sutin Jehová casckanta. ’Rimaráysh mayckan can Tata Yáyap voluntarnin persunáspaj y Ashpápaj. Pero, ¿ima niyta munara Jishu, pay niptin: «Reinuyqui amuchun»? Cá capitulopi apréndej ’ríysh imátaj can Tata Yáyap Reinun, imát ’rúaj ’rin, imaina ’rúaj ’rin Tata Yáyap sutin santu ’ruascka canánpaj.

4. ¿Ima can Tata Yáyap Reinun y pi can Reynin?

⁴ Tata Yáyap Reinun can suj Gobiernu ima Jehová cielopi churara y Jishút ajllara rey canánpaj o gobernante chá Reinumanta. Biblia nin Jishu can «Rey  picunasmanta gobernancu reyes ina y Señor picunasmanta gobernancu señores ina» (1 Timoteo 6:15). Jishu capas can nockayshraycu ’ruayta astaan ima máyckanp cachun gobernante humanumanta. Nátaj, pay astaan atiyníyoj can túcuy gobernantesmanta.

5. a) Tata Yáyap Reinun, ¿maymanta gobérnaj ’rin? b) ¿Maypi gobérnaj ’rin?

⁵ Taa chunca (40) punchaus resucitasckanmanta chaymanta, Jishu cieloman voliacora. Astaan ñauckepi, Jehová payta Rey Reinumanta nombrara (Hechos 2:33). Tata Yáyap Reinun cielomanta Áshpap saanpi gobérnaj ’rin (Revelación [Apocalipsis] 11:15). Chayraycu Biblia nin Tata Yáyap Reinun suj gobiernu celestial can (2 Timoteo 4:18).

6, 7. ¿Imajchus Jishu can astaan alli máyckanp cachun gobernante humanumanta?

⁶ Biblia nin Jishu can astaan alli máyckanp cachun gobernante humanumanta, imaraycu «pay ni aicappas huáñoj ’rin» (1 Timoteo 6:16). Túcuy gobernantes humanus huañus puchucancu, pero Jishu ni aicappas huáñoj ’rin. Chayna túcuy alli imastis Jishu nockayshraycu ’ruachun únay unáypaj cancka.

⁷ Nátaj, Biblia yachachin Jishu suj rey justu y compasivu cancka. Suj profecía nin Jishu chasquinman «Jehóvap espiritunta, espíritu sabiduriamanta y unanchaymanta, espíritu consejumanta y atiymanta, espíritu ’rejsiymanta y Jehóvap temorninmanta». Y ninpas: «Pay mana júsgaj ’rin aparienciancunallata imastismanta ñahuisninta, ni añancka uyarisckanllamanta. Y justiciaan jusganan tían picunasta humildes cancu» (Isaías 11:2-4). ¿Munanquiman reyniyqui chayna cachun?

8. ¿Imaina yacháysh Jishu mana sapallan gobérnaj ’risckanta?

 ⁸ Biblia nin Tata Yaya huaquin persunasta ajllara Jishuan cielupi gobernanancunápaj. Por ejemplo, apóstul Pablu Timoteót nipora: «Aguantas seguispá cuscas réinaj ’ríysh» (2 Timoteo 2:12). ¿Aica persunas Jishuan gobérnaj ’rincu?

9. a) ¿Aicas persunas Jishuan gobernaj ’rincu? b) ¿Áicap Tata Yaya 144.000 ajllayta ckallarera?

⁹ Imaina capitulopi 7 aprenderáysh, apóstul Juanchu suj visiún apera maypi Jishút Rey ina ckaara cielopi y payuan 144.000 reyes. ¿Picunas cancu cá 144.000? Juanchu nin: «Caycuna cancu picunas Corderút seguis ’rincu mana importas mayman ’rin». Y nerapas paycuna «humanusmanta ’rantisckas carancu» (Revelación 14:1, 4 léey). Cordero Jishu can. Y 144.000 cancu cristianus fieles picunasta Tata Yaya ajllara Jishuan «áshpap saanpi gobernanancunápaj». Áicap paycuna huañuncu, cielupi causachisckas cancu (Revelación 5:10). Jehová ajllayta ckallarera 144.000 huámaj siglupi.

10. ¿Imajchus Jehová munayninta ckaachera ajllas Jishút y 144.000 humanusta gobernaanayshta?

¹⁰ Jehová ancha munaáysh chayraycu ajllara humanusta Jishuan gobernanancunápaj. Jishu suj alli gobernante caj ’rin imaraycu paypas humanu cara y ashcát usora. Apóstul Pablu nera Jishu yachan imaina senticúysh y pay «debilidaresniyshta» unanchayta atin, imaraycu pay «túcuypi nockáysh ina probascka cara» (Hebreos 4:15; 5:8). 144.000 unanchancu sentisckayshta, imaraycu paycunapas imperfecciunuan y onckoycunasuan lucharancu. Chayraycu, seguros tiayta atíysh Jishu y 144.000 sentimientusniyshta y problemasniyshta unánchaj ’rincu.

11. ¿Imajchus Jishu mañayta yachachera Tata Yáyap voluntarnin cielopi ’ruacuchun?

¹¹ Jishu discipulusninta yachachera oraciunpi mañayta Tata Yáyap voluntarninta Ashpapi y cielopi ’ruacuchun. ¿Imajchus mañanancu tiara Tata Yáyap voluntarnin cielopi ’ruacuchun? Capitulopi 3 aprenderáysh Súpay Jehóvap contranpi churacora. Jehová sackera Súpay y ángeles mana casucojcuna, o demonius, cielopi cuticunancunata suj tiempullata. Cay ckaachin mana túcuy causajcuna cielopi Tata Yáyap voluntarninta ’ruashcarancu. Capitulopi 10, Supaymanta y demoniusmanta astaan apréndej ’ríysh.

12. Revelación 12:10, ¿ima íshcay sucesusmanta ’riman?

¹² Biblia nera Jishu Rey Tata Yáyap Reinunmanta nombrascka captin chaymanta, Supaypa contranpi pelianman (Revelación 12:7-10 léey). Revelación 12:10 ’riman íshcay importantes sucesusmanta. Huámaj, Jishu gobernayta ckallarin. Y, huámaj huasan, Súpay cielomanta Ashpaman chockascka cara. Imaina ckáaj ’ríysh, cá íshcay sucesus na sucederancu.

13. ¿Imát sucedera cielopi áicap Súpay cielomanta chockascka cara?

¹³ Ángeles casúcoj ashcát cusicorancu áicap Súpay y demonius cielomanta chockasckas carancu. Biblia nin: «¡Cusicuychis, cielos, y picunas chaypi causancu!» (Revelación 12:12). Cunan cielopi ashca pas y unidar tían imaraycu tucuycuna Tata Yáyap voluntarninta ’ruancu.

14. ¿Ima sucedera Ashpapi áicap Súpay cielomanta chockascka cara?

¹⁴ Pero Ashpapi cáusay mana quiquin can. Ashpa usuymanta unta tían imaraycu «Súpay uraycora»  cayman «ancha piñacus, yachas mana ashca tiempu apisckanta» (Revelación 12:12). Súpay ancha piñacus tían imaraycu Cielomanta chockascka cara, yachan mana unas amchiyascka caj ’rin. Chayraycu ’ruan túcuy atisckanta nánay y úsuy apamúypaj, túcuy Ashpapi.

15. Tata Yaya Ashpápaj, ¿imát munan?

¹⁵ Tata Yáyap voluntarnin Ashpápaj mana cambiara. Pay munan Ashpa suj jardín ina cachun y persunas mana defectusníyoj canayshta y únay unáypaj causanayshta (Salmo 37:29). ¿Imaina Tata Yáyap Reinun chayta ’ruancka?

16, 17. ¿Imát yachachiáysh Daniel 2:44 Tata Yáyap Reinunmanta?

¹⁶ Daniel 2:44 profecian nin «Chackaycuna reyespa punchausnincupi, Yaya cielomanta suj reinu chúraj ’rin, ni aicappas amchiyascka caj ’rin. Y cá reinu mana suj puebluman crúsaj ’rin. Cá túcuy reinusta amchiyáchej ’rin y caycunaan puchúcaj ’rin, y cá reinulla únay unáypaj caj ’rin». Cá profecía, ¿imát yachachiáysh Tata Yáyap Reinunmanta?

¹⁷ Huámaj, yachachiáysh Tata Yáyap Reinun gobernayta ckallarinman «Chackaycuna reyespa punchausninpi». Cay niyta munan tiancuman sujcuna gobiernos Ashpapi Tata Yáyap gobiernun gobernayta ckallariptin. Huámaj huasan, yachachiáysh Tata Yáyap Reinun únay unáypaj canman, y nima ckari gobérnaj ’rin. Y quimsa, yachachiáysh gobiernus cá mundumanta Tata Yáyap Reinunpa contranpi guerrát ’ruancuman. Cá Reinu gánaj ’rin y paylla Ashpát gobérnaj ’rin. Cá profecía cumplicuptin, astaan súmaj gobiernu tucuycunamanta ápej ’ríysh.

18. ¿Imaina huajyacun guerra Tata Yáyap Reinunmanta gobiernus humanusuan?

 ¹⁸ ¿Ima sucedencka manáraj guerra tiaptin gobiernus humanus y Tata Yáyap Reinunuan? Demonius, «reyesta túcuy ashpamanta» llullapúcoj ’rincu, «tantanachicúypaj guerraman Tata Yáyap Túcuy Atiyníyoj atun punchaunpi». Cá guerra Armagedón huajyacun, caypi, gobiernus humanus Tata Yáyap Reinun contranpi péliaj ’rincu (Revelación 16:14, 16; Ckáay Astaan yacháypaj 10, paginapi 210).

19, 20. ¿Imajchus precisáysh Tata Yáyap Reinunta?

¹⁹ ¿Imajchus Tata Yáyap Reinunta precisáysh? Al menus quimsa rasones tían. Huámaj, uchallícoj cáysh, chayraycu onckóysh y huañúysh. Pero Tata Yáyap Reinun gobernaptin únay unáypaj cáusaj ’ríysh. Biblia nin: «Imaraycu Tata Yaya cá munduta anchata munara, ima Huaan unigenitunta ckora, chayna tucuycuna ima fe paypi apincu mana amchi ’ruascka canancunápaj, manapé únay unáypaj causayta apinancunápaj» (Juan 3:16).

²⁰ Huámaj huasan rasón, causáysh suj mundupi maypi tían ashca gente mana allis. Ashca llullancu, engañancu y mana decentes cancu. Y nockáysh mana impedipucuyta atíysh. Pero Jehová ari atinmi. Mana cambiaptincuna, pay Armagedonpi amchiachiconcka (Salmo 37:10 léey). Y quimsa rasón ímaj precisáysh Tata Yáyap Reinunta can imaraycu gobiernus humanus mana allis y herejes cancu, géntep túcuy problemasnincunata mana allichayta atincu. Nátaj gentét mana yanapayta munancu Tata Yayát casucunancunápaj. Chayraycu Biblia nin: «Ckari autoridarta apin ckarista dañút ’ruapucúypaj» (Eclesiastés 8:9).

21. ¿Imaina Reinu lograncka Tata Yáyap voluntarnin Ashpapi ’ruacuchun?

 ²¹ Armagedón chaymanta, Reinu ʼrúaj ’rin Tata Yáyap voluntarnin Ashpapi ’ruacuchun. Por ejemplo, Súpay y demoniusnin uyshckasckas caj ’rincu (Revelación 20:1-3). Tiempuan ni pipas onckoncka ni huañoncka. Jíshup huañuyninraycu túcuy persunas casucojcuna únay unáypaj causayta atenckancu, Ashpapi suj jardín ina ’ruascka captin (Revelación 22:1-3; Ckáay Astaan yacháypaj 21, paginapi 216). Nátaj, Reinu ’ruancka Tata Yáyap sutin santificascka y limpiascka cachun. Cay, ¿imát niyta munan? Reinu Ashpát gobernaptin, túcuy persunas Tata Yáyap sutinta respétaj ’rincu.

22. ¿Imaina yacháysh Jishu mana gobernayta ckallarera áicap Ashpapi tiara ni causachiscka cas chaymanta?

²² Áicap Jishu Ashpapi tiara discipulusninta yachachicora oraciunpi mañayta «Reinuyqui amuchun». Chay niyta munan Reinu manáraj amusa cara. Jehová huamajta gobiernunta churanan tiara y Jishút Rey ’ruayta. Áicap Jishu cieloman voliacora, ¿chayllapi Rey ’ruascka cara? Mana. Jishu suyanan tiara. Mana ashca tiempu chaymanta Jishu causachiscka  casckanmanta, Pilu y Pablu esplicarancu cá profecía Salmomanta 110:1 Jishupi cumplicushcasckanta. Cá profeciapi Jehová nisa cara: «Tiácuy checkaypi, churanaycama enemigusniyquita banquitu ina chaquisniyquípaj» (Hechos 2:32-35; Hebreos 10:12, 13). Cay niyta munara Jishu suyanan tiara, Jehová payta Rey ’ruanancama.

23. a) Jishu Rey ina Tata Yáyap Reinunmanta, ¿áicap ckallarera gobernayta? b) Ámoj capitulopi, ¿imát ckaasúysh?

²³ ¿Áicap Jishu gobernayta ckallarera? 1914 huatapi. Manáraj cá huata chayaptin, suj grupo cristianus sinceros unancharancu huata 1914 ancha importante canman Biblíap profeciasninpi. Sucedesckanta mundupi 1914 huatamantapacha ckaachin cháckay cristianus cierto casckanpi tiasckancunata: Chá huatapi Jishu gobernayta ckallarera (Salmo 110:2; Ckáay Astaan yacháypaj 22, paginapi 217). Utula tiempu chaymanta Súpay Ashpaman chockascka cara, y cunan «utula tiempu» apin (Revelación 12:12). Ámoj capitulopi, ckaasúysh astaan pruebas ima ckaachiáysh cá «utula tiempupi» causasckayshta. Astaanpas apredesúysh mana unas Reinun ’rúaj ’rin Tata Yáyap voluntarnin Ashpapi ’ruacuchun.