CAPÍTULO 2
Biblia Tata Yáyap ’Rimaynin can
1, 2. ¿Imajchus Biblia Tata Yáyap ancha súmaj regalun can?
¿IMÁT ’ruanquiman suj yanasu ckosuptin suj regalút? Chayllapi quicharinqui, cusicunqui yanasuyqui ckampi pensasckanraycu. Ckam agradecepunqui.
2 Biblia can Tata Yáyap regalun. Yachachiáysh imastis sujcuna librus mana yachachiasckayshta. Por ejemplu, niáysh Tata Yaya ’ruasckanta cielosta, Ashpát, y huámaj ckari y huámaj huarmi. Principius ckoáysh yanapaanáyshpaj problemasta apiptíysh. Bibliapi aprendéysh imaina Tata Yaya Ashpát suj ancha súmaj lugar ’rúaj ’rin. ¡Biblia ancha súmaj regalu can!
3. Bibliát estudiaptiyqui, ¿imát apréndej ’rinqui?
3 Bibliát estudiaptiyqui apréndej ’rinqui, Tata Yaya munan yanasun canayquípaj. Paymanta astaan aprendeptiyqui, astaan ckaylla paymanta tíaj ’rinqui y amistarninta apinqui.
4. Bibliamanta, ¿ima astaan gustasun?
4 Biblia astaan 2.800 ckalluspi traduciscka cara, y sapa Bibliamanta ancha ashcas ’ruarancu. Yacka túcuy personas túcuy mundupi Bibliát ckallusnincupi leeyta atincu. Y sapa semana ¡ancha ashca personas suj Bibliát chasquincu! Ari, mana ni suj libru Biblia ina tían.
5. ¿Imajchus niyta atíysh Biblia «Yayamanta inspirascka» can?
5 Biblia «Yayamanta inspirascka can» (2 Timoteo 3:16 léey). Pero, huaquin pensayta atincu, ‹Bibliát ckaris escriberancu, ¿imaina Tata Yayamanta amuyta atin?› Biblia contestan: «Ckaris Yáyap partenmanta ’rimarancu, pusasckas (o guiasckas) espiritu santuraycu» (2 Pedro 1:21). Cay can suj patrón ina, peonninta nipun suj cartát escribinánpaj. Cá carta, ¿pipát can? Patronmanta y mana peonpa. Bibliaan quiquin can, autor Bibliamanta Tata Yaya can y mana ckaris ima pay ajllara escribinancunápaj. Tata Yáyap pensamientusninta escriberancu. Biblia «Yáyap ’Rimaynin» can (1 Tesalonicenses 2:13; Ckáay Astaan yacháypaj 2, paginapi 207).
Traducción del Nuevo Mundo de las Santas Escrituras ashca ckalluspi tían.
BIBLIA CIERTO CASCKANTA NIN
6, 7. ¿Imajchus niyta atíysh túcuy Biblia nisckan armoniapi tían?
6 Bibliát escribinancunápaj astaan 1.600 huatas unarancu. Escritoresnin mana quiquin epocas causarancu. Túcuy mana quiquin estudios aperancu. Por ejemplu, suj dotor cara. Sujcunas tarpojcuna, challueros, pastores ovejasmanta, profetas, jueces y gobernajcuna carancu. Aunque ashca laya escritores carancu, túcuy Biblia nisckanta armoniapi tían. Mana suj imasti suj capitulopi nin y suj capitulopi contrariu nin. *
7 Huámaj capítulos Bibliamanta niáysh imaina mundupi problemas y úsuy ckallarerancu, huasa capítulos niáysh imaina Tata Yaya chá problemasta allíchaj ’rin Ashpa suj jardín ina canánpaj. Biblia ’rimaáysh mundu ckallarisckanmantapacha y chá na ancha ashca huatas apan y ckaachin Tata Yaya túcuy nisckanta ’ruan.
8. Niy ejemplus maypi ckaachincu Biblia cierto casckanta nin áicap cenciamanta ’riman.
8 Biblia mana escribiscka cara cenciamanta yachachíypaj o suj manual escuelapi yachachíypaj, cenciamanta ’rimaspá cierto casckanta nin. Chayta suyayshman suj librumanta ima Tata Yayamanta amun. Suj ejemplu, libru Leviticomanta apin instrucciones Tata Yayamanta israelitáspaj ckaachicora imát ’ruanancu tiara mana onckonancunápaj. Cá escribiscka cara únay manáraj gente yachaptin ima laya bacterias o virus onckoyta apamuncu. Biblia yachachin, Ashpa mana nimapipas huarcuscka tían (Job 26:7). Áicap yacka túcuy gente creera Ashpa plana casckanta, Biblia nera muyu casckanta (Isaías 40:22).
9. ¿Imaina yacháysh Biblíap escritoresnin honestos carancu?
9 Biblia historiamanta ’rimaspá cierto casckanta nin. Ashca librus historiamanta túcuy nisckancunata mana cierto can, imaraycu escritoresnin mana honestos carancu. Por ejemplu, mana túcuy cutis escriberancu nis naciunesnincuna vencesckas carancu. Biblíap escritoresnin honestos carancu, aun Israelta venceptincuna. Escriberancu mana alli imastis ’ruasckancumanta. Por ejemplu libropi Numerosmanta, Moisés niáysh pay suj sajra imastít ’ruara, chayraycu Tata Yaya payta reprendenan tiara (Números 20:2-12). Honestidar Escritoresmanta ckaachin Biblia Tata Yayamanta amun. Cay niyta munan Bibliapi confiayta atíysh.
SUJ LIBRU ASHCA IMASTISPI YANAPAÁYSH
10. ¿Imajchus Biblia nisckanta cunan punchau yanapaáysh?
10 Biblia «Yayamanta inspirascka can y siruin yachachíypaj, añáypaj, imastista allicháypaj» (2 Timoteo 3:16). Ari, Biblia nisckan cunan punchau nockayshta yanapaáysh. Jehová yachan imaina ’ruasckas tiáysh, chayraycu yachan imát pensáysh, ima sentíysh. Pay astaan nockayshmanta allít ’rejsiáysh, y cusisckas canayshta munan. Pay yachan alli casckanta y mana alli casckanta nockáyshpaj.
11, 12. (a) ¿Ima imastis Jishu niaráysh Mateopi capítulospi 5 a 7? (b) Bibliamanta, ¿imát astaan aprendeyta atíysh?
11 Capitulospi 5 a 7 Mateomanta leéysh Jishu nisckanta imaina cusisckas cayta, imaina sujcunaan allít pusacuyta, imaina orayta, imaina ckoshckét allít gastayta. Aunque cá consejus Jishu ancha únay ckora, cunan punchauspipas ashcata yanapaáysh.
12 Bibliapi Jehová yachachiáysh principius yanapaanáyshpaj, allít causayta familia ina, alli llamcajcuna cayta, sujcunaan paspi causanáyshpaj. Biblíap principiusnin yanapaáysh mana importas picunas cáysh, maypi causáysh o imastis usúysh (Isaías 48:17 léey; Ckáay Astaan yacháypaj 3, paginapi 207).
CKAM CONFIAYTA ATINQUI TÚCUY PROFECIASCKA CUMPLÍCOJ ’RINCU
Escritor Isaías nera ima Babilonia chamckayascka canman.
13. ¿Imát nera Isaías Babiloniát sucedépoj ’risckanta?
13 Ashca profeciasckas Bibliamanta na cumplicorancu. Suj ejemplu, Isaías nera Babilonia chamckayascka canman (Isaías 13:19). Pay nera imaina cá ciudar vencescka canman. Cá ciudar atun puncusuan y suj mayuan arcascka tiara. Isaías nera mayu chaquícoj ’risckanta y puncus quicharisckas tiancuman. Enemigusnin ciudarman yaicuncuman mana pelias. Isaías nera suj ckari Ciro huajyascka Babiloniát véncej ’risckanta (Isaías 44:27–45:2 léey; Ckáay Astaan yacháypaj 4, paginapi 208).
14, 15. Isaías nisckanta Babiloniamanta, ¿imaina cumplicora?
14 Suj ejercitu chayara Babiloniaan peliáypaj 200 huatas chaymanta cá profecía escribiscka casckanmanta. ¿Pichus cá ejercitút guiara? Imaina Isaías nera, Ciro cara, rey Persiamanta. Túcuy na preparascka tiara túcuy Biblia nisckan cumplicunánpaj.
15 Chá tuta, babilonios suj fiestapi tiarancu. Creerancu seguros tiayta imaraycu arcasckas tiarancu atun y sinchis paredesuan y suj mayuan. Aapi ciudarmanta, Ciro y ejercitun suj canal asperancu yacu mayumanta chayman ’rinánpaj. Yacu mayumanta utula cutera chayna soldados marchas crusayta aterancu. Pero, ¿imaina ejercitu Babiloniapi yaicuyta atinman? Imaina profecía nera, puncus ciudarmanta quicharisckas cutisa carancu, chayraycu soldados mana pelias ciudarpi yaicorancu.
16. (a) Isaías, ¿imát astaan nera Babiloniamanta? (b) ¿Imaina yacháysh Isaías nisckanta cumplicora?
16 Isaías nera ni pipas Babiloniapi cutis causayta voliacunman. Pay escribera: «Ni aicappas ni pipas chaypi causancka» (Isaías 13:20). ¿Cay cumplicora? Ari. Maypi Babilonia tiara, 80 km surpi Bagdadmanta, Irak, ’rumislla cuterancu. Cunan punchaucama, ni pipas chaypi causan. Jehová Babiloniaan unáypaj puchucara (Isaías 14:22, 23). *
Babilóniap ’rumisnin
17. ¿Imajchus confiayta atíysh túcuy Tata Yáyap promesasninpi?
17 Ashca profecías Bibliamanta na cumplicorancu, niyta munan confiayta atíysh Biblia nisckanpi ámoj pachamanta. Seguros tiayta atíysh Jehová promesasninta cúmplej ’rin Ashpa suj jardín ina canánpaj (Números 23:19 léey). Ari, apíysh suyana «únay unáypaj causayta Tata Yaya mana llullayta atin, ancha únay unaymantapacha prometera» (Tito 1:2). *
BIBLIAMANTA APRENDESCKAYQUITA CAUSAYNIYQUIPI YANAPASUYTA ATIN
18. ¿Imát nin Pablu «Yáyap ’Rimayninmanta»?
18 Aprenderáysh suj libru Biblia ina mana tían. Túcuy nisckan armoniapi tían, y áicap cenciamanta o historiamanta ’riman cierto casckanta nin. Allít yachachiáysh y ashca profecías apin na cumplicorancu. Pero Biblia mana chayllata ’ruan. Apóstul Pablu escribera: «Yáyap ’Rimaynin cáusay apin, y atiyta apin». Chá, ¿imát niyta munan? (Hebreos 4:12 léey).
19, 20. (a) ¿Imaina Biblia yanapasuyta atin yachanayquípaj ima laya persuna canqui? (b) ¿Imaina ckaachiyta atinqui agradecesckayquita cá regalút, ima Biblia can?
19 Bibliamanta aprendesckayquita causayniyquipi yanapasuyta atin. Yanapasuyta atin yachanayquípaj ima laya persona canqui. Yanapasuyta atin unanchanayquípaj pensamientusniyquita y sentimientusniyquita astaan ucuyquimanta. Suj ejemplu, pensayta atíysh Tata Yayát munasckayshta. Ckaachíypaj munasckayshta Biblia nisckanta casucunáysh tían.
20 Dejuro Biblia Tata Yáyap ’Rimaynin can. Pay munan leenayquita, estudianayquita, y munanayquita. Agradecescka cay cá regaluraycu, y estudias séguiy. Chayna unánchaj ’rinqui Tata Yaya tucuycunápaj munasckanta. Capítulo amojpi, astaan apréndej ’ríysh Tata Yaya tucuycunápaj munasckanta.
^ párr. 6 Huaquin personas nincu túcuy Biblia nisckan mana armoniapi tían, chá mana cierto can. Ckáay capítulo 7 librupi La Biblia... ¿la Palabra de Dios, o palabra del hombre? Jehóvap testigusninraycu ’ruascka.
^ párr. 16 Astaan yachanaaspá profecías Bibliamanta, leeyta atinqui páginas 27-29 folletumanta Un libro para todo el mundo, Jehóvap testigusninraycu ’ruascka.
^ párr. 17 Isaías nisckanta Babiloniamanta sujlla profecía Bibliamanta can y na cumplicora. Profecías Jishumanta tariyta atinqui, maypi nin Astaan yacháypaj 5, paginapi 208.
