1. ¿Imajchus alli can ángelesmanta yachanayshta?

 ÁNGELES Tata Yáyap familianmanta parte cancu. Biblia «Tata Yáyap huaasnin» huajyacun (Job 38:7). Y Jehová munan familianta ʼrejsinayshta. Ángeles, ¿imát ʼruancu? ¿Imaina ñaupapi persunastas yanaparancu? Y cunan punchau, ¿yanapaayshta atincu? (Ckáay Astaan yacháypaj 8, paginapi 210).

2. a) ¿Pichus angelestas ʼruara? b) ¿Aicas ángeles tían?

² Huamajta yachanáysh tían, pít angelestas ʼruara. Colosenses 1:16 niáysh Jehová Jishút huamajpi ʼruara y chaymantá, «túcuy sujcuna imastis ʼruasckas carancu cielupi y áshpap saanpi». Cá «sujcuna imastispi» ángeles tiancu. Jehová, ¿aicas ángeles ʼruara? Biblia nin ancha ashca ashca ángeles tían (Salmo 103:20; Revelación [Apocalipsis] 5:11).

3. Job 38:4-7, ¿imát niáysh angelesmanta?

³ Bibliapas niáysh Jehová angelestas ʼruara manáraj Ashpát ʼruaptin. ¿Imaina senticorancu áicap Jehová Ashpát ʼruara? Libru Jobmanta niáysh ancha cusisckas tiarancu. Túcuy ángeles suj familia cuscayascka carancu Jehovát siruis (Job 38:4-7).

4. ¿Imaina yacháysh ángeles persunastas yanapasckancunata?

⁴ Ángeles túcuy tiempu yanaparancu Jehóvap propositun cumplicunánpaj persunáspaj y Ashpápaj (Proverbios 8:30, 31; 1 Pedro 1:11, 12). Ancha llaquisckas  deberancu churacuyta áicap Adán y Eva Tata Yayát mana casucorancu. Y cunan astaan llaquisckas tiancu ckaas yacka túcuy persunas Jehovát mana casucuncu. Pero pillapas arrepenticus Tata Yayaman voliacuptin, paycuna cusicuncu (Lucas 15:10). Ángeles yanapancu picunastas Tata Yayát siruincu. Jehová angelesninta utilisan siervusninta yanapacunánpaj y protegecúypaj (Hebreos 1:7, 14). Ckaasúysh huaquin ejemplus.

5. ¿Imaina ñaupapi ángeles Tata Yáyap siervusninta yanapacorancu?

 ⁵ Jehová íshcay angelestas cachara Lot y familianta sorckonancunápaj manáraj Sodoma y Gomorra amchiyascka captincuna (Génesis 19:15, 16). Ancha ashca huatas chaymantá, profeta Daniel posoman chockascka cara maypi leones yarckasckas tiarancu, pero leones mana ni imátap ʼruaporancu, imaraycu «Tata Yaya angelninta cachara leonespa simincunata huishckanánpaj» (Daniel 6:22). Huámaj siglupi, áicap apóstul Pilu carcelpi tiara, Jehová suj angelta cachara sorckonánpaj (Hechos 12:6-11). Ángeles Jishutapas yanaparancu áicap Ashpapi tiara. Por ejemplo, bautisascka captin chaymanta, ángeles yanaparancu (Marcos 1:13). Manáraj Jishu huanchiscka captin, suj ángel «fortalecera» (Lucas 22:43).

6. a) ¿Imaina yacháysh ángeles Tata Yáyap siervusninta yanapacuncu? b) ¿Ima tapunas contéstaj ʼríysh?

⁶ Cunan punchau, ángeles persunastas mana ʼricuripucuncu. Pero Tata Yaya cachan ángelestas siervusninta yanapanancunápaj. Biblia nin: «Jehóvap angelnin acampas tían túcuy casucojcúnap muyuyninpi y ckeshpichicun» (Salmo 34:7). ¿Ímaj yanapát precisáysh? Imaraycu enemigus atiyníyoj apíysh y mana alli casckanta ʼruaayshta munancu. ¿Picunas cancu? ¿Pichus paycunát ʼruara? ¿Imaina tratancu dañút ʼruaayshta? Cá tapunastas contestáypaj, yachanáysh tían sucedesckanta Adán y Eva ʼruasckas captincuna chaymanta.

7. Súpay, ¿imát cunancama ʼruara?

⁷ Capitulopi 3 aprenderáysh suj ángel Tata Yáyap contranpi churacora y tucuycunát gobernayta munara. Biblia huajyan Súpay (Revelación 12:9). Súpay munara sujcunapas Tata Yáyap contranpi churacunancunata. Pay Evát llullapora, y chaymantá yacka túcuy persunastas  llullapucushcan cunancama. Pero, huaquin, Abel ina, Enoc y Noé, Jehovát casúcoj carancu (Hebreos 11:4, 5, 7).

8. a) Huaquin ángeles, ¿imaina demonius ʼruacorancu? b) Demonius, ¿ima ʼruarancu mana huañunancunápaj ancha atun para amuptin?

⁸ Nóep punchausninpi, huaquin ángeles Tata Yáyap contranpi churacorancu y cielót sackerancu, Ashpapi humanos ina causanancunápaj. ¿Ímaj? Biblia niáysh huarmisuan casaracuyta munarancu (Génesis 6:2 léey). Pero, mana alli tiara ángeles chayta ʼruanancunata (Judas 6). Quiquin mana allis ángeles ina, yacka túcuy persunas, chá tiempumanta, ancha mana allis ʼruacorancu. Chayraycu, Jehová mana allis persunasuan puchucayta decidera cháypaj suj ancha atun paraan Ashpát untachera. Pero pay siervusninta casucojcunata ckeshpichicora (Génesis 7:17, 23). Mana allis ángeles cieloman voliacorancu mana huañunancunápaj. Biblia mana allis angelesta demonius huajyacun. Paycuna Supayuan cuscayacuyta ajllarancu Tata Yáyap contranpi, y Súpay paycúnap gobernajnin ʼruacora (Mateo 9:34).

9. a) ¿Imát demoniusta sucedepucora áicap cieloman voliacorancu? b) ¿Imát aprendes seguisúyhs?

⁹ Áicap cieloman voliacorancu, Jehová demoniusta familianpi cutis mana aceptacora. (2 Pedro 2:4). Demonius na mana atincu apiyta cuerpu aichamanta y tullumanta humanus ina, pero «chincachicushcancu tucuycunata ima ashpapi causancu» (Revelación 12:9; 1 Juan 5:19). Aprendesúysh imaina ʼruancu persunasta engañáypaj y chincachicúypaj (2 Corintios 2:11 léey).

10. Demonius, ¿imaina persunasta engañancu?

¹⁰ Demonius persunasta ashca layasmanta engañancu. Huaquin persunas demoniusuan tratút apincu, paycunalla ʼruancu o suj persúnap yanapanuan, suj brujuan  o suj curanderoan. Cá practicasta espiritismu huajyancu. Biblia niáysh caruyacunayshta máyckanp cachun imasti espiritismuan ckaanan tiasckanta (Gálatas 5:19-21). ¿Ímaj? Quiquin suj casador trampát churan uyuasta trampianánpaj, demonius persunasta trampiáypaj y controláypaj espiritismút utilisancu (Ckáay Astaan yacháypaj 26, paginapi 221).

11. a) Curanderismo y brujería, ¿imát can? b) Chá imastismanta, ¿imajchus caruyacunáysh tían?

¹¹ Suj laya espiritismu curanderismo y brujería can, Demoniuspa atiynin can ampíypaj túcuy laya onckoycunas, maleficius ʼruáypaj, amarres ʼruáypaj. Cháypaj curanderos y brujus ashca layas yuyusta y gualichus utilisancu. Persunastas mañancu apanancunata ropa, fotos, chujchas, o huaquin imastis. Ashca persunas creencu cá imastis alli cancu, pero mana alli cancu. Ancha peligroso can. Curanderos yuyusta espiritismupi utilisancu. Manáraj remediusta ckopucus santusnincunata velas laurachincu y resapuncu paycúnap ñauckencunapi remediút churas. Biblia nin Jehová chejnin chá imastista y picunasta curanderismo practicancu (Deuteronomio 18:10-12).

12. a) ¿Imajchus mana alli can huañusckasuan ʼrimayta? b) ¿Imajchus Tata Yáyap siervusnin mana seguíysh huaquin costumbres veloriusmanta?

¹² Demonius suj laya espiritismu utilisancu persunastas llullapucúypaj. Paycuna creenayshta munancu huañusckasuan ʼrimayta atíysh y ciertu casckanta huañusckas suj lugarpi causasckas tiasckancunata. Por ejemplu, áicap suj yanasu o suj familiar huañun, pillapas suj espiritistaman ʼriyta atin, crees ima huañusckasuan ʼrimayta atin. Por ejemplu, tían espiritistas ima nincu huañusckasuan ʼrimayta atincu y quiquin ʼrimancu imaina huañuscka ʼrímaj cara. Pensayta atin huañusckasuan  ʼrimashcasckanta, pero demoniusuan ʼrimashcan (1 Samuel 28:3-19). Áicap pillapas huañun ashca persunas creencu causayníyoj tiasckanta suj lugarpi. Por ejemplo, veloriuspi ckaacun imaina túcuy laya velasta laurachincu, yacu y tantát churapuncu, churacuncu ropas yanas ckaachis de luto tiasckancuta, túcuy tuta resapuncu, alabansas cantapuncu, suj uyua huanchincu micunancunápaj, astaanpas tiancu novenas y cabo de año. Áicap Jehóvap Testigusnin mana participancu chá costumbrespi, familiaresnincu o vecinusnincuna criticacuyta atincuman, insultacuyta, o paycunaan nima tratu apiyta munancuman. Testigus yachancu huañusckas mana suj lugarpi causasckas tiasckancunata. Huañusckasuan mana ʼrimayta atíysh y paycuna mana dañút ʼruaayshta atincu (Salmo 115:17). Ancha ashca cuidau ápiy. Ni aicapas munaychu huañusckasuan o demoniusuan ʼrimayta, caruyácuy costumbresmanta ima Biblíap contranpi tiancu (Deuteronomio 18:10, 11 léey; Isaías 8:19).

13. ¿Imát ʼruarancu ashca persunas ima demoniusta mánchaj carancu?

¹³ Demonius manalla persunastas llullapucuncu, manapé sustuchicuncu. Cunan punchau, Súpay y demoniusnin yachancu «utula tiempu» cutipucusckanta mana alli imastista ʼruanancunápaj, manáraj Tata Yaya amchiyachicuptin. Chayraycu ancha piñacus tiancu (Revelación 12:12, 17). Ancha ashca persunas ñaupapi demoniusta mánchaj carancu, cunan, chaymanta na libracorancu. ¿Imát ʼruarancu libracunancunápaj?

14. Cristianus huámaj siglumanta ina, ¿imaina demoniusmanta ckeshpicuyta atíysh?

¹⁴ Biblia niáysh imaina demoniuspa contranpi churacuyta atíysh y paycunamanta ckeshpicuyta. Por  ejemplo, huaquincuna ciudarpi Efesomanta manáraj verdarta aprendes demoniusuan ʼrimaj carancu. ¿Imaina ckeshperancu? Biblia nin: «Ashcas picunasmanta brujería ʼrúaj carancu, librusnincunát pallarancu y tucuycúnap ñauckenpi ʼrupacherancu» (Hechos 19:19). Paycuna munarancu cristianus cayta, chayraycu librusnincunát brujeriamanta ʼrupacherancu. Cunan punchaupas chayna ʼruanancu tían túcuy picunas Jehovát siruipuyta munancu, máyckanp cachun imastis ima espiritismuan ckaanan tían, sorckonancu tían y ʼrupachinancu tían. Chá cayta atin, librus, revistas, horóscopos, películas, música, juegos y carteles ima brujeriaan ckaanan tían. Cancupas amuletos ima persunas apincu Supaymanta protegecunancunápaj (1 Corintios 10:21).

15. ¿Imát astaan ʼruanáysh tían Supaypa y demoniusninpa contranpi churacunáyshypaj?

¹⁵ Huaquin huatas chaymanta Efesios librusnincuta brujeriamanta ʼrupachiptincuna, apostúl Pablu nipucora esforsacunancuna tiara y peliayta «demoniuspa contranpi» (Efesios 6:12). Paycuna, túcuy librusnincunát, ʼrupachisa carancu aun chayna demonius dañút ʼruapucuyta munarancu. Chayraycu, ¿ima astaan ʼruanancuna tiara? Pablu nipucora utilisanancunata «atun escudo femanta» arcacúypaj Supaymanta y demoniusninmanta (Efesios 6:16). Suj soldadu suj escudu utilísaj cara arcacunánpaj, chayna, nockáysh feycuta utilisanáysh tían arcacunáyshpaj. Jehovapi confiaspá, pay protégeaj ʼríysh y capaces caj ʼríysh Supaypa y demoniusninpa contranpi peliayta (Mateo 17:20).

16. ¿Imát ʼruanáysh tían feycu Jehovapi astaan sinchi ʼruacunánpaj?

¹⁶ ¿Imát ʼruayta atíysh feycu Jehovapi astaan sinchi ʼruacunánpaj? Túcuy punchaus Bibliát leenáysh tían y aprendeyta paypi confiayta protegeanáyshpaj.  Confiansa Jehovapi apispá, Súpay y demoniusnin mana atenckancu dañút ʼruaayshta (1 Juan 5:5).

17. ¿Imát astaan ʼruanáysh tían demoniusmanta protegecúypaj?

¹⁷ Cristianus Efesomanta, ¿imát astaan ʼruanancuna tiara? Paycuna cáusaj carancu suj ciudarpi unta espiritismumanta. Chayraycu Pablu nipucora «túcuy ocaciunpi» oranancuna tiara (Efesios 6:18). Túcuy tiempu Jehová protegecunanta precisarancu. ¿Y nockáysh? Nockayshpas causáysh suj mundupi unta espiritismumanta. Chayraycu nockayshpas Jehovát protegeanayshta mañanáysh tían y oraptíysh sutinmata ʼrimapunáysh tían (Proverbios 18:10 léey). Jehovát oraciunpi mañas seguíysh Supaymanta ckeshpichianáyshpaj, dejuro Jehová oraciunniyshta contéstaj ʼrin (Salmo 145:19; Mateo 6:13).

18, 19. a) ¿Imajchus mana manchacunáysh tían Supayta y demoniusninta? b) ¿Ima tapuna ámoj capitulopi contestascka caj ʼrin?

¹⁸ Causayniyshpi sackeptíysh túcuy imastis ima ckaanan tían espiritismuan y ʼrupachíysh y Jehovapi confiáysh pay protegéaj  ʼríysh, Supaypa y demoniuspa contranpi peliayta atisúysh. Paycunát mana manchacunáysh tían (Santiago 4:7, 8 léey). Jehová astaan atiyníyoj can y mana demonius. Pay Nóep punchausninpi castigacora y astaan ñauckeman amchiyachiconcka (Judas 6). Yúyay, mana sapallas pelias tiáysh. Jehová angelesninta utilisashcan protegeanáyshpaj (2 Reyes 6:15-17). Seguros tiayta atíysh, Jehóvap yanapanuan ganayta atíysh Supaypa y demoniuspa contranpi peliaspá (1 Pedro 5:6, 7; 2 Pedro 2:9).

¹⁹ Súpay y demoniusninta túcuy persunastas ashcát usuchishcancu ¿Ímaj Tata Yaya Supayta y demoniusta manáraj amchiyachicun? Cá tapuna ámoj capitulopi contestascka caj ʼrin.