Ñucaca Roma llajta canlla ladomanmi huacharircani. Shuj pobrella barriopimi huiñarcani. Sinchi causaitami charircani. Ñuca mamataca mana rijsircanichu. Ñuca yayahuanpish mana alli apanacujchu carcani. Shuj peligroso barriopi ima shina causanata yachashpami huiñarcani.

Ñucaca 10 huatacunata charishpami shuhuai callarircani. Ña 12 huatacunata charishpaca huasimantami punta cutin llujshishpa rircani. Ñuca yayaca tauca cutinmi comisaría ucumanta llujchinaman rij carca. Ñucaca siempremi gentecunahuan litunacushpa pasaj carcani. Millai, mal geniomi carcani. Y 14 huatacunata charishpami ña huasimantaca de una vez llujshishpa rircani. Callepimi causarcani y drogarishpami pasaj carcani. Tutayajpica shuj carro punguta pascashpami chaipi dormij carcani. Pacarijpica maipi yacu tiyanpimi maillarinaman rij carcani.

Jatun shuhuami tucurcani. Tucui layami shuhuaj carcani. Maipica callecunapimi carteracunata shuhuaj carcani. Maipica tuta ladomi huasicunaman yaicuj carcani. Chashna shuhuajta ricushpami shuj rijsishca pandillaman yaicuchun ñucataca invitarcacuna. Chashnami ashtahuan shuhuai callarircani. Hasta bancocunapimi shuhuai callarircani. Ñuca yallitaj millai cajpimi ñuca grupopi caj caishuj shuhuacunapish respetajcuna carca. Maiman rishpapish pistolata apashpami rij carcani. Dormishpapish sauna ucupi pistolata churashpami dormij carcani. Ñucapajca macanacuna, drogarina, shuhuana, huainayana, mala palabracunata rimanaca normalmi carca. Policiapish siempremi ñucata japinalla purijcuna carca. Y tauca cutinmi japircacuna. Achca huatacunatami callepi mana cashpaca carcelpi pasaj carcani.

Shuj vezpi carcelmanta llujshishpaca shuj tiata visitanamanmi rircani. Paipish, ñuca ishqui primocunapish testigo de Jehová cashcataca mana yachashcachu carcani. Paicunami shuj tandanacuiman ringapaj invitarcacuna. Ima shina cashcata ricungapajllami rircani. Tandanacuna Huasiman chayashpaca pi yaicujta, llujshijta ricungapajmi pungu yaicunllapi tiyarircani. Ñuca pistola apashcami rircani.

Chai tandanacuiman rishcamantami ñuca causaita cambiarcani. Chaipi caj gentecuna laya shujta gentecunataca mana nunca ricushcachu carcani. Paicunaca cushilla, cꞌuyaihuanmi chasquircacuna. Chaitaca cunancamami yuyarini.

Testigo de Jehovacunahuan Bibliata estudianatami decidircani. Bibliata ashtahuan yachashpa catishpaca ñuca causaita cambiana cashcatami cuentata curcani. Por ejemplo, Proverbios 13:20-pi ima nishcata pajtachinatami decidircani. Chaipica: “Yachaisapacunahuan tandanacujca, yachaisapami tucun. Ashtahuanpish rumi shungucunahuan tandanacujca, jatun llaquipimi urman” ninmi. Chaimantami ñuca grupopi caj shuhuacunamanta de una vez caruyanata decidircani. Mana facilchu carca. Pero Jehová Dios ayudajpimi chaicunata saqui tucurcani.

Ñuca cuerpopi limpio cangapajpishmi esforzarircani. Chaimantami fumanata, drogarinata saquircani. Ñuca jatun ajchatapishmi ruturcani, rinrinmantapishmi aretecunata anchuchircani. Mala palabracunata rimanatapishmi saquircani. Ñuca causaipica punta cutinmi mana allicunata ruranamanta jarcari tucushcata sintircani.

Imata liyinata, estudianataca mana munarcanichu. Chaimantami Bibliata estudianaca ñucapajca sinchi carca. Shinapish asha ashami Jehová Diosta cꞌuyai callarircani. Pero mana allicunata rurashcata yuyarishpami Jehová Diosca mana nunca perdonangachu nishpa mana alli sintirij carcani. Chaimantami rey Davidpaj causaimanta yachaj carcani. Rey Davidtaca mana allicunata rurashca cajpipish Jehová Diosca perdonarcami. Chaita yachashpami ñucapish tranquilo sintirircani (2 Samuel 11:1-12:13).

Shinallataj huasin huasin rishpa predicanatami achcata manchaj carcani (Mateo 28:19, 20). Ñuca dañota rurashca gentecunahuan tupanatami dimastij manchaj carcani. Shinapish asha ashami chai manchaita saquircani. Ñucanchijta perdonaj Yaya Diosmanta gentecunahuan parlanatami munai callarircani.

Jehová Diosta rijsishcamantami causashpa catini. Ñuca ñaupa amigocunaca carcelpi o maijancunaca huañushcami can. Pero ñucaca cushillami cani. Shamuj punllapajpish shuj sumaj esperanzatami charini. Shinallataj humilde canata, cazuj canata, mal geniota jarcarinatami yachashcani. Chaimantami cunanca shujtajcunahuan alli apanacuni. Carmen shuti huarmihuanmi cazado cani. Cushillami causani. Ishquindijmi vecinocunaman Bibliamanta yachachinchij.

Cierto, maipica bancocunaman rishpami catini. Pero ña mana shuhuangapajchu rini. Sino pꞌichashpa trabajangapajmi rini. Chashnami cunanca honrado trabajani.