1. ¿Moisesca Jehová Diospi confiashcataca ima shinataj ricuchirca?

 HEBREOS libropica Jehovapi sinchi feta charijcunamantami yachachin. Por ejemplo, Moisés sinchi feta charishcatami nin (Hebreos 3:​2-5; 11:​23-25). Paica sinchi feta charishcamantami israelitacunataca Egiptomanta llujchirca. Shinallataj mandaj faraontapish, paipaj soldadocunatapish manchanapaj randica Jehová Diospimi tucui shunguhuan confiarca. Chaimantami israelitacunataca puca mama cucha chaupita pasashpa chaquishca pambaman pusharca (Hebreos 11:​27-29). Shinapish achca israelitacunaca Jehová Dios paicunata cudana cashcapica mana confiarcacunachu. Pero Moisesca Jehová Diospimi tucui shunguhuan confiashpa catirca. Chaimi Jehová Diosca israelitacuna chaquishca pambapi ama huañuchunca micunatapish, yacutapish curca a (Éxodo 15:​22-25; Salmo 78:​23-25).

2. ¿Jehová Diosca imamantataj Moisestaca: “¿Manachu ñuca maquica chaita rurai tucunga?” nishpa tapurca? (Números 11:​21-23).

² Egiptomanta shuj huata llujshishca qꞌuipaca Jehová Diosca israelitacunamanca aichatami cusha nirca. Pero Moisesca sinchi feta charishpapish Dios nishcata crinaca sinchimi carca. Paica: “¿Cai achca millón gentecunaman carangapajca maipitaj aichaca tiyanga?” nishpami tapurirca. Chaimi Jehová Diosca paitaca: “¿Manachu Jehová Diospaj maquica chaita rurai tucunga? ¿Manachu ñuca nishcata pajtachi tucunata cringui?” nishpa tapurca (Números 11:​21-23-ta liyipai). Cai versopica Diospaj maquica Diospaj podertami ricuchin. Jehová Diosca paipaj poderhuanmi tucuita rurai tucun.

3. ¿Huaquinpica ñucanchijpish imatataj dudanchij?

³ ¿Canpish cambaj familiaman Jehová Dios tucui minishtishcata  cuna cashcatachu dudashcangui? Cai yachaipica Moisespish, israelitacunapish imamanta Jehová Diospi confianata saquishcatami yachashun. Shinallataj Jehová Dios tucuita rurai tucuj cashcapi ashtahuan confiangapajmi huaquin versocunata yachashun.

¿MOISESMANTA, ISRAELITACUNAMANTACA IMATATAJ YACHAI TUCUNCHIJ?

4. ¿Achca israelitacunaca Jehová paicunata cuidanataca imamantataj dudai callarircacuna?

⁴ ¿Achca israelitacunaca Jehová Dios paicunata cuidana cashcataca imamantataj dudai callarircacuna? Egiptomanta llujshishca qꞌuipaca israelitacunapish, achca mana israelitacunapish Dios cusha nishca allpaman ringapajmi chaquishca pambapi achcata puricurcacuna (Éxodo 12:38; Deuteronomio 8:15). Pero mana caj israelitacunaca maná micunata mana micusha nishpami quejari callarircacuna. Chaimi achca israelitacunapish quejari callarircacuna (Números 11:​4-6). Paicunaca Egiptopi micushca micunatami micusha nircacuna. Chaita ricushpaca Moisesca paillataj maimanta cashpapish aichatami paicunaman carasha nirca (Números 11:​13, 14).

5, 6. ¿Charishcacunamanta agradicij cangapajca imatataj rurana canchij?

⁵ Israelitacunaca mana israelita cajcunapaj ejemplota catishpami paicunapish mana agradici callarircacuna. Cunan tiempopish achca gentecunaca mana agradicijcunachu can. Paicunapaj ejemplota catishpami ñucanchijpish Dios cushcacunahuan cushiyarinapaj randica quejari callarishun. Ashtahuanpish ñaupaman charishcacunata cutin charisha nishpami shujtajcunatapish envidiai callarishun. Cutin charishcacunallamanta siempre agradicishpaca cushillami causashun.

⁶ Jehová Diosca chaquishca pambapi allicunata cunataca manataj nishcachu carca. “Ñuca cusha nishca allpaman chayajpimi achca allicunata cusha” nishcami carca. Israelitacunaca Jehová Dios chashna bendiciagrishcatami yuyarina carca. Chai shinallatajmi cai millai mundopi imata mana charishcamanta llaquirinapaj randica Jehová Dios Paraíso Allpapi imallata cugrishcapi yuyana canchij. Shinallataj Jehová Dios tucuita rurai tucuj cashcata ricuchij versocunapipishmi yuyana canchij.

7. ¿Maipi cajpipish Jehová Dios ayudanataca imamantataj seguros canchij?

⁷ Jehová Diosca Moisestaca: “¿Nachu ñuca maquica chaita rurai tucunga?” nishpami tapurca. ¿Imamantataj chashna tapurca? Puntapica Jehová Diosca mana tucurij poderta charishcatami intindichisha nirca. Ishquipica Moisés maipi cajpipish, carupi cajpipish Jehová Diosca paita ayudai tucushcatami intindichisha nirca. Chaimantami israelitacuna chaquishca pambapi cajpipish Jehová Diosca achca aichata paicunaman cui tucurca. Paipaj pueblo maipi cajpipish tucuita rurai tucuj paipaj maquihuan, paipaj rigrahuan siempre ayudanatami ricuchirca (Salmo 136:​11, 12). Ñucanchijpish maipi cashpapish, ima llaquita apacushpapish Jehová Dios ñucanchijta ayudai tucushcatami seguros cana canchij (Salmo 138:​6, 7).

8. ¿Ashtahuan charina yuyailla ama causangapajca imatataj rurana canchij? (Fotomantapish parlapai).

⁸ Jehová Diosca israelitacunamanca dimastij, achca codornizcunatami curca. Pero paicunaca chai milagromantaca mana agradicircacunachu. Chaipaj randica micunallapi yuyashpami shuj punlla yallita achca codornizcunata tandashpa pasarcacuna. Chaimi Jehová Diosca achcata pꞌiñarishpa micuna yuyailla cajcunata castigarca (Números 11:​31-34). ¿Cai ejemplomantaca imatataj yachai tucunchij? Charijcuna cashpapish, pobrecuna cashpapish bancopi o huasipi  ashtahuan cullquita huaquichina yuyaillaca mana causanachu canchij. Chaipaj randica jahua pachapimi charinacunata huaquichina canchij. Chaipajca Jehová Dioshuanpish, Jesushuanpish alli apanacungapajmi esforzarina canchij (Mateo 6:​19, 20; Lucas 16:9). Chaita rurajpica Jehová Diosca ñucanchij minishtishcacunatami cunga.

9. ¿Llaquicunata apajpipish Jehová Diosca imatataj ruranga?

⁹ Cunan punllacunapipish Jehová Diosca ñucanchijta ayudangapajca listomi can. Pero chaica mana nisha ninchu cullquitapish, micunatapish siempre charina cashcata. b Cai llaquicunata apajpipish Jehová Diosca ñucanchijta manataj saquishpa ahuantachunmi fuerzasta cunga. Por ejemplo, mana tanto cullquita charijpipish, ña mayoryajpipish Jehová Diosca ñucanchijtaca siempremi cuidanga. Cai ishqui yuyaicunamanta cunanca yachashun.

MANA TANTO CULLQUITA CHARISHPAPISH JEHOVAPI CONFIASHUNCHIJ

10. ¿Cai tucuri punllacunapica ima llaquicunatataj chari tucushun?

¹⁰ Cai pachapaj ruraicuna tucurimucushcamantami minishtirishca cosascunata charinaca mana jahualla canga. Mana alli gobiernocuna tiyashcamanta, guerracunamanta, terremotocunamanta, jatun acapanacunamanta, millai ungüicuna tiyashcamantapish trabajo illaj, maipi causana illajchari  saquirishun. Chaipica shujtaj trabajota mashcanami tucunga. Mana cashpaca shujtaj ladopi causagrinachari tucunga. Pero ¿cai llaquicunata apashpapish Jehovapi confiashcataca ima shinataj ricuchishun?

11. ¿Cullqui illaj, trabajo illaj cashpapish imatataj rurana canchij? (Lucas 12:​29-31).

¹¹ Shina laya llaquicunata apacushpaca ima shina sintirishcatami Jehová Diosmanca tucuita parlana canchij (Proverbios 16:3). Shinallataj alli decisioncunata agllangapaj, ama yalli preocuparingapaj, charishcacunallahuan cushicungapajpishmi alli yuyaita cuchun Jehová Diosta mañana canchij (Lucas 12:​29-31-ta liyipai; 1 Timoteo 6:​7, 8). Ashtahuancarin imata ruranata yachangapajpish ñucanchij publicacioncunapimi alli consejocunata mashcana canchij. Achcacunataca jw.org paginapi tiyaj videocuna, yachaicunami ayudashca.

12. ¿Shuj trabajota japigrishpaca imacunallapitaj yuyana canchij?

¹² Achcacunami paicunapaj familiata saquishpa caru llajtapi trabajanaman rishcacuna. Pero qꞌuipaca chai decisión mana alli cashcatami cuentata cushcacuna. Chaimantami shuj trabajota japigrishpaca mashna cullquita gananallapica mana yuyana canchij. Ashtahuanpish cashna nishpami tapurina canchij: “¿Cai trabajota chasquishpaca ñucapish, ñuca familiapish Diosta sirvishpa catishunchu? ¿Ñuca cusata o ñuca huarmita saquishpa carupi trabajanaman rishpaca imataj tucushun? ¿Tucui tandanacuicunaman ringapaj, huillanaman llujshingapaj, huauqui panicunahuan pasangapajpish tiempota charishachu? ¿Ñuca huahuacunata alli huiñachingapaj, paicunaman Diosmanta yachachingapajpish tiempota charishachu?” (Lucas 14:28; Efesios 6:4). Imata decidigrishpaca Diosta mana sirvij familiacuna o shujtajcuna nishca shinaca mana decidinachu canchij. Chaipaj randica Jehová Dios munashca shinami decidina canchij. c Asiamanta caj Tony shuti huauquimanca shuj alli pagashca trabajotami cusha nirca. Pero chaipajca paipaj familiata saquishpa shujtaj llajtapi causanamanmi rina carca. Chai trabajota manaraj chasquishpaca puntapica Jehová Dios ayudachunmi mañarca. Paipaj huarmisitahuanpishmi parlarca. Chaimi chai trabajotaca mana chasquirca. Menos cullquita gastangapajpishmi esforzarirca. ¿Chashna decidishcamantaca arrepintirinchu? Mana. Tonyca: “Chashna decidishcamantami achca gentecunataca Diosta rijsichun ayudai tucushcani. Ñuca huahuacunatapishmi Diosta sirvichun ayudai tucushcani. Mateo 6:​33-pi nishcacunata pajtachishcamantami Jehová Diosca tucuipi cuidashca. Chaitaca siempremi ricushcani” ninmi.

MAYORYACUSHPAPISH JEHOVAPI CONFIASHUNCHIJ

13. ¿Shamuj punllacunapi minishtishcacunata charingapajca imatataj rurana canchij?

¹³ Mayoryacushpapish Jehová ñucanchij minishtishcacunata cunapimi confiana canchij. Bibliapica shamuj punllacunapi minishtishcacunata charingapaj sinchita trabajachunmi yachachin (Proverbios 6:​6-11). Chaimantami pudishpaca shamuj punllacunapaj cullquita huaquichina canchij. Cullquica minishtishcacunata charingapajmi alli can (Eclesiastés 7:12). Pero cullquita charina yuyaillaca mana causanachu canchij.

14. ¿Mayoryacushpa Jehovapi confiangapajca imamantataj Hebreos 13:​5-ta yuyarina canchij?

¹⁴ Jesusca: “Achcata charij runaca Diospajta mana rurashpaca Diospaj ñaupajpica  huajchami can” nircami (Lucas 12:​16-21). Cayandij punlla ima tucunata mana yachashcamantami charishcacunallapica mana confiana canchij (Proverbios 23:​4, 5; Santiago 4:​13-15). Shinallataj maipica Jesusta catisha nishpaca ñucanchij charishcacunata saquingapajmi listo cana canchij (Lucas 14:33). Punta siglopica Juedeapi caj huauqui panicunaca cushicuihuanmi chaita rurarcacuna (Hebreos 10:34). Cunan punllacunapipish achca huauqui panicunaca politicapi mana chagrurishcamantami paicunapaj trabajotapish, charishcacunatapish saquishcacuna (Apocalipsis 13:​16, 17). Paicunaca Jehová Dios cusha nishcapimi confiancuna. Jehová Diosca: “Cantaca manataj saquishachu. Manataj shitashachu” ninmi (Hebreos 13:5). Ñucanchijpish mayorlla cai horaspaj minishtishcacunata charingapajmi esforzarinchij. Pero jarcaicuna ricurijpipish Jehová Dios ayudanapimi confianchij.

15. a) ¿Huaquincunaca imapajtaj huahuacunataca charincuna? b) ¿Diosta sirvij yaya mamacunaca imata rurana yuyaillataj causana can? (Fotomantapish parlapai).

¹⁵ Huaquincunaca yuyajyajpi paicunata cuidachun nishpallami huahuacunata charincuna. Pero Bibliapica yayacunami huahuacunataca cuidana can nin (2 Corintios 12:14). Alli huahuacunaca yaya mama yuyajyajpica cullquihuanpish, charishca cosascunahuanpishmi  ayudancuna (1 Timoteo 5:4). Shinapish Diosta sirvij yaya mamacunaca paicunallapi yuyanapaj randica paicunapaj huahuacuna Diosta sirvichun ayudana yuyaillami causana can. Chashnami yaya mamacunapish, huahuacunapish achcata cushicungacuna (3 Juan 4).

16. ¿Shamuj punllacunapajca yaya mamacunaca huahuacunamanca imatataj yachachina can? (Efesios 4:28).

¹⁶ Cꞌuyashca yaya mamacuna, cancunapaj huahuacuna uchilla cai horasmantami mantiniringapaj sinchita trabajachun asha asha yachachishpa rina canguichij. Pero tucuimanta yallica Jehová Diospi confiachunmi yachachina canguichij (Proverbios 29:21; Efesios 4:​28-ta liyipai). Paicuna escuelapi o colegiopi cajpica alli yachangapaj esforzarichunmi ayudana canguichij. Ña colegiota tucuchigrijpica imata ashtahuan estudianata, imata ruranata alli decidichunmi Bibliapaj consejocunata ricuchina canguichij. Cancunapaj huahuacunataca achca cullquita charichun ayudanapaj randica mantiniringapajlla shuj trabajato japichunmi ayudana canguichij. Chashnami paicunaca ashtahuan predicangapaj, precursor tucungapajpish tiempota charingacuna.

17. ¿Maipi cajpipish, ima jarcaicuna ricurijpipish Jehová Diosca imatataj ruranga?

¹⁷ Cai pacha ruraicuna tucurimucushcamantami ashtahuan jarcaicuna ricuringa. Chaimantami Jehová Dios paipaj poderhuan imata minishtishcata ñucanchijman cunapi ashtahuan confiana canchij. Ñucanchij maipi cajpipish, ima jarcaicuna ricurijpipish Jehová Diosca tucuita rurai tucuj paipaj maquihuanmi cuidanga.